ನೂರಾರು ಮಂದಿ ಪ್ರಾಣ ಉಳಿಸಿದ ಸ್ಮಿತ್ ಮಚ್ಚಾರ್ ಗೆ ಅತ್ಯುನ್ನತ ಗೌರವ: ಆಸ್ಪತ್ರೆಗೆ ತೆರಳಿ ವೀರ ಪೈಲಟ್ ಭೇಟಿಯಾದ ದುಬೈ ಕ್ರೌನ್ ಪ್ರಿನ್ಸ್ ಶೇಖ್ ಹಮ್ದಾನ್, ಸಾಹಸಕ್ಕೆ ಶಹಬ್ಬಾಸ್ ಗಿರಿ!

ದುಬೈ/ಅಬುಧಾಬಿ: ಬುಧವಾರ ದುಬೈನಿಂದ ಇಸ್ರೇಲ್‌ನ ಟೆಲ್ ಅವಿವ್‌ಗೆ ತೆರಳುತ್ತಿದ್ದ ಫ್ಲೈದುಬೈ ವಿಮಾನದಲ್ಲಿ ನಡೆದ ಭೀಕರ ಕಾಕ್‌ಪಿಟ್ ದಾಳಿಯ ನಡುವೆಯೂ ಅಸಾಧಾರಣ ಧೈರ್ಯ ತೋರಿ 174ಕ್ಕೂ ಹೆಚ್ಚು ಪ್ರಯಾಣಿಕರ ಜೀವ ರಕ್ಷಿಸಿದ ಭಾರತೀಯ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರ ಸಾಹಸಕ್ಕೆ ಜಗತ್ತಿನಾದ್ಯಂತ ಅಪಾರ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.

ಯುಎಇ ಉಪ ಪ್ರಧಾನಿ ಹಾಗೂ ದುಬೈ ಕ್ರೌನ್ ಪ್ರಿನ್ಸ್ ಶೇಖ್ ಹಮ್ದಾನ್ ಬಿನ್ ಮೊಹಮ್ಮದ್ ಅಲ್ ಮಕ್ತೂಮ್ ಅವರು ಅಬುಧಾಬಿಯ ಆಸ್ಪತ್ರೆಗೆ ಖುದ್ದಾಗಿ ತೆರಳಿ, ಚಿಕಿತ್ಸೆ ಪಡೆಯುತ್ತಿರುವ ಸ್ಮಿತ್ ಮಚ್ಚಾರ್ ಅವರನ್ನು ಭೇಟಿಯಾಗಿ ಯೋಗಕ್ಷೇಮ ವಿಚಾರಿಸಿದ್ದಾರೆ.

ಘಟನೆಯ ವಿವರ ಹಾಗೂ ಭೀಕರ ಕ್ಷಣಗಳು:

ದುಬೈನಿಂದ ಟೆಲ್ ಅವಿವ್‌‌ಗೆ ಹೊರಟಿದ್ದ ಫ್ಲೈದುಬೈ ಬೋಯಿಂಗ್ 737 ವಿಮಾನವು ಸೌದಿ ಅರೇಬಿಯಾದ ವಾಯುಪ್ರದೇಶದಲ್ಲಿ ಸುಮಾರು 34,000 ಅಡಿ ಎತ್ತರದಲ್ಲಿ ಹಾರಾಟ ನಡೆಸುತ್ತಿದ್ದಾಗ ಈ ಘಟನೆ ಸಂಭವಿಸಿದೆ. ವಿಮಾನದ ಸಹ-ಪೈಲಟ್, ಒಮಾನ್ ಮೂಲದ ಹಮಾಮ್ ಅಲ್-ಹಮ್ಮಾಮಿ ಎಂಬಾತ ಹಠಾತ್ತಾಗಿ ಕಾಕ್‌ಪಿಟ್‌ನಲ್ಲಿಲ್ಲಿದ್ದ ತುರ್ತು ಕೊಡಲಿಯಿಂದ (Crash Axe) ಮುಖ್ಯ ಪೈಲಟ್ ಸ್ಮಿತ್ ಮಚ್ಚಾರ್ ಅವರ ಮೇಲೆ ಮಾರಣಾಂತಿಕ ದಾಳಿ ನಡೆಸಿದನು. ವಿಮಾನವನ್ನು ಪತನಗೊಳಿಸುವ ಉದ್ದೇಶದಿಂದ ಈ ದಾಳಿ ನಡೆಸಲಾಗಿತ್ತು.

ದಾಳಿಯ ಸಮಯದಲ್ಲಿ ವಿಮಾನವು ಕೆಲವೇ ಸೆಕೆಂಡುಗಳಲ್ಲಿ ಸುಮಾರು 14,000 ಅಡಿಗೂ ಹೆಚ್ಚು ಕೆಳಕ್ಕೆ ಕುಸಿಯಿತು. ತೀವ್ರವಾಗಿ ಗಾಯಗೊಂಡಿದ್ದರೂ ಧೈರ್ಯಗುಂದದ ಕ್ಯಾಪ್ಟನ್ ಸ್ಮಿತ್, ದಾಳಿಕೋರನನ್ನು ಎದುರಿಸಿ ಕಾಕ್‌ಪಿಟ್‌ನ ತುರ್ತು ಬಾಗಿಲನ್ನು ತೆರೆಯುವಲ್ಲಿ ಯಶಸ್ವಿಯಾದರು. ತಕ್ಷಣವೇ ಸನ್ನಿವೇಶ ಗ್ರಹಿಸಿದ ವಿಮಾನದಲ್ಲಿದ್ದ ಸಿಬ್ಬಂದಿ ಹಾಗೂ ಪ್ರಯಾಣಿಕರು ಕಾಕ್‌ಪಿಟ್‌ಗೆ ನುಗ್ಗಿ ದಾಳಿಕೋರನನ್ನು ಹಿಡಿದು ಬಂಧಿಸಿದರು. ಬಳಿಕ ವಿಮಾನದಲ್ಲಿದ್ದ ರಿಸರ್ವ್ ಪೈಲಟ್‌ಗಳ ನೆರವಿನಿಂದ ಸೌದಿ ಅರೇಬಿಯಾದ ತಬುಕ್ ವಿಮಾನನಿಲ್ದಾಣದಲ್ಲಿ ವಿಮಾನವನ್ನು ತುರ್ತು ಲ್ಯಾಂಡಿಂಗ್ ಮಾಡಲಾಯಿತು.

ರಾಜತಾಂತ್ರಿಕ ಭೇಟಿ ಹಾಗೂ ಪ್ರಧಾನಿ ಮೋದಿ ಮಾತುಕತೆ:

ದುಬೈ ಕ್ರೌನ್ ಪ್ರಿನ್ಸ್ ಶ್ಲಾಘನೆ: ಆಸ್ಪತ್ರೆಯಲ್ಲಿ ಸ್ಮಿತ್ ಅವರನ್ನು ಭೇಟಿಯಾದ ದುಬೈ ಕ್ರೌನ್ ಪ್ರಿನ್ಸ್ ಶೇಖ್ ಹಮ್ದಾನ್, “ಸ್ಮಿತ್ ಮಾನವ ಜೀವ ರಕ್ಷಣೆಗೆ ಅತ್ಯುನ್ನತ ಮಟ್ಟದ ಧೈರ್ಯ, ಜವಾಬ್ದಾರಿ ಹಾಗೂ ಕಾಳಜಿಯನ್ನು ಪ್ರದರ್ಶಿಸಿದ್ದಾರೆ. ಯುಎಇ ದೇಶವು ಶಾಂತಿ, ಕರುಣೆ ಮತ್ತು ಜೀವ ರಕ್ಷಣೆಗೆ ನೀಡುವ ಮೌಲ್ಯಗಳಿಗೆ ಇವರು ಮಾದರಿಯಾಗಿದ್ದಾರೆ” ಎಂದು ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.

ಪ್ರಧಾನಿ ಮೋದಿ ವಿಡಿಯೋ ಕಾಲ್: ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರು ಸ್ಮಿತ್ ಮಚ್ಚಾರ್ ಅವರೊಂದಿಗೆ ವಿಡಿಯೋ ಕಾಲ್ ನಡೆಸಿ, “ಅತ್ಯಂತ ಸಂಕಷ್ಟದ ಕ್ಷಣದಲ್ಲಿ ನೀವು ತಳೆದ ಕ್ಷಣಾರ್ಧದ ನಿರ್ಧಾರ ನೂರಾರು ಜೀವಗಳನ್ನು ಕಾಪಾಡಿದೆ. ಇಡೀ ದೇಶ ನಿಮ್ಮ ಸಾಹಸಕ್ಕೆ ಹೆಮ್ಮೆಪಡುತ್ತದೆ” ಎಂದು ಪ್ರಶಂಸಿಸಿದರು.

ಸಂಭಾಷಣೆಯ ವೇಳೆ ತೀವ್ರ ಭಾವುಕರಾದ ಕ್ಯಾಪ್ಟನ್ ಸ್ಮಿತ್, “ಆಪತ್ತಿನ ಕ್ಷಣದಲ್ಲಿ ನಾನು ಹನುಮಾನ್ ಚಾಲೀಸಾ ಪಠಿಸುತ್ತಾ ಧೈರ್ಯ ತಂದುಕೊಂಡೆ” ಎಂದು ತಿಳಿಸಿದರು. ದಾಳಿಕೋರ ಸಹ-ಪೈಲಟ್‌ನನ್ನು ಸೌದಿ ಪೊಲೀಸರು ವಶಕ್ಕೆ ಪಡೆದು ತನಿಖೆ ನಡೆಸಿ, ಪ್ರಸ್ತುತ ಯುಎಇ ವಶಕ್ಕೆ ಹಸ್ತಾಂತರಿಸಿದ್ದಾರೆ.