ಕೇವಲ ಬುರ್ಖಾ ಯಾಕೆ ನಿಷೇಧಿಸ್ತೀರಿ? ಲೇಬರ್ ರೂಮ್‌ನಲ್ಲಿ ಬುರ್ಖಾ ಬ್ಯಾನ್ ಮಾಡಿದ್ದಕ್ಕೆ ರೊಚ್ಚಿಗೆದ್ದು ಪ್ರತಿಭಟಿಸಿದ ಮೆಡಿಕಲ್ ವಿದ್ಯಾರ್ಥಿನಿಯರು!

ದೋಡಾ (ಜಮ್ಮು ಮತ್ತು ಕಾಶ್ಮೀರ): ಜಮ್ಮು ಮತ್ತು ಕಾಶ್ಮೀರದ ದೋಡಾದಲ್ಲಿರುವ ಸರ್ಕಾರಿ ವೈದ್ಯಕೀಯ ಕಾಲೇಜಿನ  ಪ್ರಸೂತಿ ಮತ್ತು ಸ್ತ್ರೀರೋಗ ವಿಭಾಗದ ಮುಖ್ಯಸ್ಥೆ ಡಾ. ಮಧು ಚಿಬ್ ಅವರು ಲೇಬರ್ ರೂಮ್‌ಗೆ ಬುರ್ಖಾ ಹಾಗೂ ಅಬಾಯಾ ಧರಿಸಿ ಬಂದಿದ್ದ ವಿದ್ಯಾರ್ಥಿನಿಯರು ಮತ್ತು ಇಂಟರ್ನ್‌ಗಳನ್ನು ಒಳಗೆ ಪ್ರವೇಶಿಸದಂತೆ ತಡೆದಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಈ ಘಟನೆಯನ್ನು ಖಂಡಿಸಿ ಕಾಲೇಜಿನ ವೈದ್ಯಕೀಯ ವಿದ್ಯಾರ್ಥಿಗಳು ಕಳೆದ ಮೂರು ದಿನಗಳಿಂದ ತರಗತಿ ಹಾಗೂ ಆಸ್ಪತ್ರೆ ಕೆಲಸಗಳನ್ನು ಬಹಿಷ್ಕರಿಸಿ ಧರಣಿ ನಡೆಸುತ್ತಿದ್ದಾರೆ.

ಪ್ರೊಫೆಸರ್ ಮತ್ತು ಆಸ್ಪತ್ರೆ ಆಡಳಿತದ ಸ್ಪಷ್ಟನೆ:

ಹೊರಗಿನ ಬಟ್ಟೆಗಳು ಕ್ರಿಮಿಗಳು ಮತ್ತು ಸೋಂಕುಗಳನ್ನು ಹೊತ್ತು ತರುವ ಸಾಧ್ಯತೆಯಿರುತ್ತದೆ. ಇದು ಹೆರಿಗೆ ಕೊಠಡಿಯಲ್ಲಿರುವ ಗರ್ಭಿಣಿಯರು ಮತ್ತು ನವಜಾತ ಶಿಶುಗಳಿಗೆ ಅಪಾಯವನ್ನುಂಟುಮಾಡುತ್ತದೆ. ಹೀಗಾಗಿ ಸೋಂಕು ನಿಯಂತ್ರಣ ನಿಯಮಾವಳಿಗಳ ಪ್ರಕಾರ ಬುರ್ಖಾ ಬದಲು ವೈದ್ಯಕೀಯ ಏಪ್ರಾನ್ ಧರಿಸುವಂತೆ ಸೂಚಿಸಲಾಗಿತ್ತು ಎಂದು ಮೂಲಗಳು ತಿಳಿಸಿವೆ.

ವಿದ್ಯಾರ್ಥಿಗಳ ಆರೋಪ ಹಾಗೂ ಬೇಡಿಕೆ:

ಪ್ರೊಫೆಸರ್ ಅವರ ಈ ನಡೆ ನಮ್ಮ ಧಾರ್ಮಿಕ ಹಕ್ಕಿನ ಮೇಲಿನ ದಾಳಿ ಹಾಗೂ ಕಿರುಕುಳ ಎಂದು ಪ್ರತಿಭಟನಾನಿರತ ವಿದ್ಯಾರ್ಥಿಗಳು ಆರೋಪಿಸಿದ್ದಾರೆ.

“ಲೇಬರ್ ರೂಮ್‌ನಲ್ಲಿ ಬುರ್ಖಾ ನಿಷೇಧಿಸುವುದಾದರೆ, ಉದ್ದನೆಯ ಉಗುರುಗಳು ಸೇರಿದಂತೆ ನೈರ್ಮಲ್ಯಕ್ಕೆ ಧಕ್ಕೆ ತರುವ ಇತರ ವಸ್ತುಗಳನ್ನು ಸಹ ನಿಷೇಧಿಸಿ, ಕೇವಲ ಬುರ್ಖಾವನ್ನಷ್ಟೇ ಏಕೆ ಗುರಿಯಾಗಿಸುತ್ತಿದ್ದೀರಿ?” ಎಂದು ವಿದ್ಯಾರ್ಥಿನಿಯರು ಪ್ರಶ್ನಿಸಿದ್ದಾರೆ.

ಪ್ರೊಫೆಸರ್ ಕ್ಷಮೆ ಯಾಚಿಸಬೇಕು ಎಂದು ವಿದ್ಯಾರ್ಥಿಗಳು ವೈದ್ಯಕೀಯ ಸೂಪರಿಂಟೆಂಡೆಂಟ್ ಅವರಿಗೆ ದೂರು ಸಲ್ಲಿಸಿದ್ದಾರೆ.

ತನಿಖೆ ಮತ್ತು ರಾಜಕೀಯ ಸ್ಪಂದನೆ:

ಆಸ್ಪತ್ರೆ ಆಡಳಿತ ಮಂಡಳಿಯು ಈ ವಿಷಯದ ಕುರಿತು ತನಿಖೆ ನಡೆಸಲು ಕಮಿಟಿ ರಚಿಸಿದ್ದು, ೨ ದಿನಗಳಲ್ಲಿ ವರದಿ ಸಲ್ಲಿಸುವಂತೆ ಸೂಚಿಸಿದೆ.

ಆಮ್ ಆದ್ಮಿ ಪಾರ್ಟಿಯ ದೋಡಾ ಶಾಸಕ ಮೆಹರಾಜ್ ಮಲಿಕ್ ಅವರು ಈ ವಿಷಯವನ್ನು ಜಮ್ಮು-ಕಾಶ್ಮೀರದ ಆರೋಗ್ಯ ಸಚಿವೆ ಸಕೀನಾ ಇಟೂ ಅವರ ಗಮನಕ್ಕೆ ತಂದಿದ್ದು, ಶೀಘ್ರ ಕ್ರಮಕ್ಕೆ ಆಗ್ರಹಿಸಿದ್ದಾರೆ.

ಪೊಲೀಸರು ಪ್ರತಿಭಟನಾನಿರತರೊಂದಿಗೆ ಮಾತುಕತೆ ನಡೆಸಿ ಪ್ರತಿಭಟನೆ ಹಿಂಪಡೆಯುವಂತೆ ಮನವೊಲಿಸಲು ಯತ್ನಿಸುತ್ತಿದ್ದಾರೆ.