ಮಹಿಳೆಯರೊಂದಿಗೆ ಅಸಭ್ಯ ವರ್ತನೆ, ಜಿಮ್ ನಿಂದ ಉಚ್ಚಾಟನೆ, ಕಾಂಡೋಮ್, ಪಿಸ್ತೂಲ್, ಚಾಕು ಪತ್ತೆ: ದೆಹಲಿ ಗ್ಯಾಂಗ್‌ರೇಪ್ ಆರೋಪಿಗಳ ಕರಾಳಮುಖ ಅನಾವರಣ!

ನವದೆಹಲಿ: ದೆಹಲಿಯ ಕಲ್ಕಾಜಿ ಮಂದಿರ ಸಮೀಪದ ಆಸ್ಥಾ ಕುಂಜ್ ಪಾರ್ಕ್‌ನಲ್ಲಿ 17 ವರ್ಷದ ಅಪ್ರಾಪ್ತ ಬಾಲಕಿಯ ಮೇಲೆ ನಡೆದ ಭೀಕರ ಸಾಮೂಹಿಕ ಅತ್ಯಾಚಾರ ಪ್ರಕರಣ ದೇಶಾದ್ಯಂತ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಪ್ರಕರಣದ ತನಿಖೆ ತೀವ್ರಗೊಳಿಸಿರುವ ದೆಹಲಿ ಪೊಲೀಸರು, ಘಟನೆಗೆ ಸಂಬಂಧಿಸಿದಂತೆ ಹಲವು ಆಘಾತಕಾರಿ ವಿವರಗಳನ್ನು ಬಹಿರಂಗಪಡಿಸಿದ್ದಾರೆ. ಬಂಧಿತ ಆರೋಪಿಗಳ ಭಯಾನಕ ಹಿಸ್ಟರಿ ಬಹಿರಂಗವಾಗಿದೆ.

ಬರ್ತ್‌ಡೇ ದಿನವೇ ನಡೆದ ದುರಂತ

ಫರೀದಾಬಾದ್ ಮೂಲದ 17 ವರ್ಷದ ಬಾಲಕಿ ತನ್ನ 17ನೇ ಹುಟ್ಟುಹಬ್ಬದ ಅಂಗವಾಗಿ ತನ್ನ ಸ್ನೇಹಿತನೊಂದಿಗೆ ಕಲ್ಕಾಜಿ ಮಂದಿರಕ್ಕೆ ಪ್ರಾರ್ಥನೆ ಸಲ್ಲಿಸಲು ಬಂದಿದ್ದಳು. ಪೂಜೆ ಮುಗಿಸಿದ ನಂತರ, ಇಬ್ಬರೂ ಸಂಜೆ ಸುಮಾರು 7:30ಕ್ಕೆ ಆಸ್ಥಾ ಕುಂಜ್ ಪಾರ್ಕ್‌ನ ಗೇಟ್ ನಂಬರ್ 7ರ ಮೂಲಕ ಒಳಗೆ ಪ್ರವೇಶಿಸಿದ್ದಾರೆ.

ಈ ವೇಳೆ ಮೂವರು ಆರೋಪಿಗಳು ಇವರನ್ನು ಹಿಂಬಾಲಿಸಿ, ತಾವು ಪೊಲೀಸರೆಂದು ಸುಳ್ಳು ಹೇಳಿ ಬೆದರಿಸಿದ್ದಾರೆ. “ನೀವಿಬ್ಬರೂ ಅಪ್ರಾಪ್ತರು, ಪಾರ್ಕ್‌ನಲ್ಲಿ ತಪ್ಪು ಕೆಲಸ ಮಾಡುತ್ತಿದ್ದೀರಾ, ನಿಮ್ಮ ವಿರುದ್ಧ ಪ್ರಕರಣ ದಾಖಲಿಸುತ್ತೇವೆ” ಎಂದು ಗದರಿಸಿದ್ದಾರೆ. ನಂತರ ಬಾಲಕಿಯ ಸ್ನೇಹಿತನಿಗೆ ಹಲ್ಲೆ ನಡೆಸಿ ಆತನನ್ನು ದೂರ ತಡೆದು ನಿಲ್ಲಿಸಿ, ಬಾಲಕಿಯನ್ನು ಪಾರ್ಕ್‌ನ ನಿರ್ಜನ ಪ್ರದೇಶಕ್ಕೆ ಎಳೆದೊಯ್ದಿದ್ದಾರೆ. ಬಂದೂಕು ಹಾಗೂ ಚಾಕು ತೋರಿಸಿ ಬೆದರಿಕೆ ಹಾಕಿ ಮೂವರೂ ಆಕೆಯ ಮೇಲೆ ಸಾಮೂಹಿಕ ಅತ್ಯಾಚಾರ ಎಸಗಿದ್ದಾರೆ.

ಆರೋಪಿಗಳ ಕ್ರೂರ ಹಿನ್ನೆಲೆ ಹಾಗೂ ತನಿಖೆಯ ಸ್ಫೋಟಕ ಅಂಶಗಳು

ಪೊಲೀಸರು ತನಿಖೆ ನಡೆಸಿ ಘಟನೆ ನಡೆದ 12 ಗಂಟೆಗಳ ಒಳಗೆ ಮೂವರನ್ನೂ ಬಂಧಿಸಿದ್ದಾರೆ. ಆರೋಪಿಗಳ ವಿವರಗಳು ಹೀಗಿವೆ:

ಆಸಿಫ್ (32) – ಮಾಸ್ಟರ್‌ಮೈಂಡ್:

ಈತ ತರಕಾರಿ ಸಾಗಾಣಿಕೆ ವ್ಯಾಪಾರಿಯಾಗಿದ್ದು, ಮದುವೆಯಾಗಿ 13 ವರ್ಷದ ಮಗಳಿದ್ದಾಳೆ.

ಈತನ ಬಳಿಯಿಂದ ಪಿಸ್ತೂಲ್, ಚಾಕು ಹಾಗೂ ಕಾಂಡೋಮ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಈತನ ಮೊಬೈಲ್‌ನಲ್ಲಿ ಸಾಲು ಸಾಲು ಅಶ್ಲೀಲ ವಿಡಿಯೋಗಳು ಪತ್ತೆಯಾಗಿವೆ.

ಪೊಲೀಸರು ಈತನನ್ನು ಬಂಧಿಸಲು ತೆರಳಿದಾಗ ಎನ್‌ಕೌಂಟರ್ ನಡೆದು, ಈತನ ಕಾಲಿಗೆ ಗುಂಡು ಬಿದ್ದಿದೆ.

ಹೇಮಂತ್ (24):

ವಕೀಲ ವೃತ್ತಿಯಲ್ಲಿದ್ದ ಈತನನ್ನು ಮಹಿಳೆಯರೊಂದಿಗೆ ಅಸಭ್ಯವಾಗಿ ವರ್ತಿಸಿದ ದೂರುಗಳ ಹಿನ್ನೆಲೆಯಲ್ಲಿ, ಇತ್ತೀಚೆಗಷ್ಟೇ ಜಿಮ್‌ನಿಂದ ಉಚ್ಛಾಟನೆ ಮಾಡಲಾಗಿತ್ತು.

ಕೃತ್ಯದ ನಂತರ ತಗಲಾಕಿಕೊಳ್ಳಬಾರದೆಂದು ತನ್ನ ಫೋನ್‌ನ ಸರ್ಚ್ ಹಿಸ್ಟರಿಯನ್ನು ಡಿಲೀಟ್ ಮಾಡಿದ್ದ.

ಮಹೇಶ್ (24):

ಹೇಮಂತ್‌ನ ತಮ್ಮ ಹಾಗೂ ಬಿ.ಎಸ್ಸಿ ಗಣಿತ ಅಂತಿಮ ವರ್ಷದ ವಿದ್ಯಾರ್ಥಿ. ಈತನೂ ಸಹ ತನ್ನ ಫೋನ್‌ನಲ್ಲಿದ್ದ ಡೇಟಾವನ್ನು ಅಳಿಸಿಹಾಕಿದ್ದ.

ಸಾಕ್ಷ್ಯ ನಾಶಕ್ಕೆ ಯತ್ನ:

ಕೃತ್ಯ ಎಸಗಿದ ನಂತರ ಆರೋಪಿಗಳು ಸಮೀಪದ ಹೋಟೆಲ್ ಒಂದರಲ್ಲಿ ಆಹಾರ ಸೇವಿಸಿ, ಶ್ರೀನಿವಾಸಪುರಿಯ ತಮ್ಮ ಮನೆಗೆ ತೆರಳಿ ಬಟ್ಟೆಗಳನ್ನು ತೊಳೆದು ಸಾಕ್ಷ್ಯ ನಾಶಪಡಿಸಲು ಯತ್ನಿಸಿದ್ದಾರೆ.

ಕಾನೂನು ಕ್ರಮ

ಅಮರ್ ಕಾಲೋನಿ ಪೊಲೀಸ್ ಠಾಣೆಯಲ್ಲಿ ಭಾರತೀಯ ನ್ಯಾಯ ಸಂಹಿತೆ (BNS) ಹಾಗೂ ಪೊಕ್ಸೊ (POCSO) ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. ಆರೋಪಿಗಳ ಫೋನ್‌ಗಳನ್ನು ವಿಧಿವಿಜ್ಞಾನ (Forensic) ಪರೀಕ್ಷೆಗೆ ಕಳುಹಿಸಲಾಗಿದ್ದು, ಈ ಹಿಂದೆ ಪಾರ್ಕ್‌ನಲ್ಲಿ ನಡೆದ ಇತರ ಅಪರಾಧಗಳಲ್ಲಿ ಇವರ ಪಾತ್ರವಿದೆಯೇ ಎಂಬುದರ ಕುರಿತು ತನಿಖೆ ಮುಂದುವರಿದಿದೆ.