ಒಂದೇ ಬೈಕ್‌ನಲ್ಲಿ 4 ಯುವಕರ ಅಪಾಯಕಾರಿ ಸವಾರಿ! ಸ್ನೇಹಿತನ ಹೆಗಲ ಮೇಲೆ ಕುಳಿತು ವೈರಲ್ ಸ್ಟಂಟ್; ಕಂಬಿ ಎಣಿಸಿದ ಪುಂಡರು!

ಅಹಮದಾಬಾದ್ (ಗುಜರಾತ್): ಇತ್ತೀಚೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಲೈಕ್ಸ್ ಹಾಗೂ ‘ರೀಲ್ಸ್’ ವೈರಲ್ ಪ್ರಚಾರಕ್ಕಾಗಿ ಯುವಕರು ತಮ್ಮ ಜೀವ ಹಾಗೂ ಇತರರ ಪ್ರಾಣವನ್ನು ಅಪಾಯಕ್ಕೆ ಸಿಲುಕಿಸುವ ಘಟನೆಗಳು ಹೆಚ್ಚಾಗುತ್ತಿವೆ. ಇದೀಗ ಗುಜರಾತ್‌ನ ಅಹಮದಾಬಾದ್‌ನಲ್ಲಿ ಇಂತಹುದೇ ಒಂದು ಅಚ್ಚರಿಯ ಹಾಗೂ ಆಘಾತಕಾರಿ ಘಟನೆ ನಡೆದಿದ್ದು, ಒಂದೇ ಬೈಕ್‌ನಲ್ಲಿ ನಾಲ್ವರು ಯುವಕರು ಸಾಗುತ್ತಿರುವ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.

ಘಟನೆಯ ಹಿನ್ನೆಲೆ ಹಾಗೂ ವಿವರ:

ವರದಿಗಳ ಪ್ರಕಾರ, ಈ ಘಟನೆಯು ಸೆಪ್ಟೆಂಬರ್ 20 ರಂದು ಮುಂಜಾನೆ ಸುಮಾರು 3:00 ಗಂಟೆಯ ವೇಳೆಗೆ ಅಹಮದಾಬಾದ್‌ನ ಎಲಿಸ್‌ಬ್ರಿಡ್ಜ್ ಪಂಚ್ ರಸ್ತೆ ಹಾಗೂ ವಿ.ಎಸ್. ಆಸ್ಪತ್ರೆಯ ನಡುವಿನ ಮಾರ್ಗದಲ್ಲಿ ಸಂಭವಿಸಿದೆ. ಹೀರೋ ಸ್ಪ್ಲೆಂಡರ್ ಬೈಕ್‌ನಲ್ಲಿ (Hero Splendor Plus) ನಾಲ್ವರು ಯುವಕರು ಒಂದೇ ಬಾರಿಗೆ ಸಂಚರಿಸುತ್ತಿದ್ದರು.

ಇದರಲ್ಲಿ ಅತ್ಯಂತ ಅಪಾಯಕಾರಿ ವಿಷಯವೆಂದರೆ, ಬೈಕ್ ಓಡಿಸುತ್ತಿದ್ದ ಸವಾರನ ಹಿಂದೆ ಇಬ್ಬರು ಕುಳಿತಿದ್ದರೆ, ನಾಲ್ಕನೇ ಯುವಕ ಹಿಂಬದಿ ಸವಾರನ ಹೆಗಲ ಮೇಲೆಕುಳಿತು ಪ್ರಯಾಣಿಸುತ್ತಿದ್ದನು. ಅಲ್ಲದೆ, ಚಾಲಕ ರಸ್ತೆಯ ಮಧ್ಯೆ ಬೈಕ್ ಅನ್ನು ಅಪಾಯಕಾರಿಯಾಗಿ ತೂಗಾಡಿಸುತ್ತಾ ಚಲಾಯಿಸುತ್ತಿದ್ದುದು ಕ್ಯಾಮೆರಾದಲ್ಲಿ ಸೆರೆಯಾಗಿದೆ.

एक बाइक पर 4 युवकों का खतरनाक स्टंट

अहमदाबाद में एलिसब्रिज पुलिस स्टेशन के पास चार युवकों के एक ही मोटरसाइकिल पर खतरनाक तरीके से सफर करने का वीडियो सामने आया है. वीडियो में तीन युवक बाइक पर बैठे नजर आ रहे हैं, जबकि चौथा एक युवक के कंधे पर बैठा दिखाई दे रहा है.@AhmedabadPolice… pic.twitter.com/GliLuTS0p8

— zingabad (@zingabad) September 21, 2026

ಸುರಕ್ಷತಾ ನಿಯಮಗಳ ಸಂಪೂರ್ಣ ಉಲ್ಲಂಘನೆ:

ಸದರಿ ಬೈಕ್‌ನಲ್ಲಿದ್ದ ನಾಲ್ವರಲ್ಲಿ ಯಾರೊಬ್ಬರೂ ಹೆಲ್ಮೆಟ್ ಅಥವಾ ಯಾವುದೇ ರೀತಿಯ ಸುರಕ್ಷತಾ ಕವಚಗಳನ್ನು ಧರಿಸಿರಲಿಲ್ಲ. ತಡರಾತ್ರಿಯಲ್ಲಿ ಸಾರ್ವಜನಿಕ ರಸ್ತೆಯಲ್ಲಿ ನಡೆಸಿದ ಈ ಸ್ಟಂಟ್ ಸವಾರರ ಜೀವಕ್ಕೆ ಮಾತ್ರವಲ್ಲದೆ, ರಸ್ತೆಯಲ್ಲಿ ಚಲಿಸುತ್ತಿದ್ದ ಇತರ ವಾಹನ ಸವಾರರು ಹಾಗೂ ಹಾದಿಹೋಕರ ಜೀವಕ್ಕೂ ಕಂಟಕವಾಗುವಂತಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

ಪೊಲೀಸರಿಂದ ಕಠಿಣ ಕ್ರಮ ಹಾಗೂ ಬಂಧನ:

ಈ ಅಪಾಯಕಾರಿ ಸ್ಟಂಟ್‌ನ ವೀಡಿಯೋ ಇನ್‌ಸ್ಟಾಗ್ರಾಮ್ ಹಾಗೂ ಎಕ್ಸ್ (X) ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆಯೇ, ಎಲಿಸ್‌ಬ್ರಿಡ್ಜ್ ಪೊಲೀಸ್ ಠಾಣೆಯ ಸಿಬ್ಬಂದಿ ಕಾರ್ಯಾಚರಣೆಗೆ ಇಳಿದರು. ಸಿಸಿಟಿವಿ ಹಾಗೂ ವೀಡಿಯೋ ಆಧಾರದ ಮೇಲೆ ತನಿಖೆ ನಡೆಸಿದ ಪೊಲೀಸರು ಸೆಪ್ಟೆಂಬರ್ 21 ರಂದು ಆರೋಪಿಗಳನ್ನು ಪತ್ತೆಹಚ್ಚಿ ವಶಕ್ಕೆ ಪಡೆದಿದ್ದಾರೆ.

ಬಂಧಿತ ಯುವಕರನ್ನು ಅಹಮದಾಬಾದ್‌ನ ಘೀ ಕಾಂತ ಪ್ರದೇಶದ ನಿವಾಸಿಗಳಾದ ಅಶೋಕ್ ಠಾಕೂರ್ (36), ಅಲ್ಕೇಶ್ ಕನೋಜಿಯಾ (37) ಮತ್ತು ಮಿತ್ರೇಶ್‌ ಜಾಲಾ (21) ಎಂದು ಗುರುತಿಸಲಾಗಿದೆ.

ಪ್ರಕರಣ ದಾಖಲು:

ಪೋಲಿಸರು ಆರೋಪಿಗಳ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್ 281 (ಅಜಾಗರೂಕ ಚಾಲನೆ) ಹಾಗೂ ಸೆಕ್ಷನ್ 125 (ಇತರರ ಜೀವಕ್ಕೆ ಅಪಾಯವನ್ನುಂಟುಮಾಡುವುದು) ಸೇರಿದಂತೆ ಮೋಟಾರು ವಾಹನ ಕಾಯ್ದೆಯ (Motor Vehicles Act) ನಿಯಮ 177, 184 ಮತ್ತು 194(c) ರ ಅಡಿಯಲ್ಲಿ ದೂರು ದಾಖಲಿಸಿಕೊಂಡಿದ್ದಾರೆ. ಜೊತೆಗೆ ಸ್ಟಂಟ್‌ಗೆ ಬಳಸಲಾಗಿದ್ದ ಬೈಕ್ ಅನ್ನು ಸಹ ವಶಕ್ಕೆ ಪಡೆದುಕೊಳ್ಳಲಾಗಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಚಾರಕ್ಕಾಗಿ ಇಂತಹ ಜೀವ ಬೆದರಿಕೆಯೊಡ್ಡುವ ಸ್ಟಂಟ್‌ಗಳನ್ನು ಮಾಡದಂತೆ ಮತ್ತು ಸಂಚಾರ ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸುವಂತೆ ಸಾರ್ವಜನಿಕರು ಹಾಗೂ ಯುವಜನತೆಗೆ ಪೊಲೀಸರು ಎಚ್ಚರಿಕೆ ನೀಡಿದ್ದಾರೆ.