ಕೆಂಪಾಯಿತೋ… ಕೆಂಪಾಯಿತೋ… ಕೆಂಪಾದ ಆಕಾಶ: ‘ಅರ್ನಬ್’ ಚಂಡಮಾರುತದ ಪ್ರಭಾವದ ಎಫೆಕ್ಟ್ ಇದು!

ರಾಯ್‌ಪುರ: ಛತ್ತೀಸ್‌ಗಢದ ವಿವಿಧ ಭಾಗಗಳಲ್ಲಿ ಆಕಾಶವು ಸಂಪೂರ್ಣವಾಗಿ ರಕ್ತದ ಕೆಂಪು ಬಣ್ಣಕ್ಕೆ ತಿರುಗಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದ್ದು, ನೆಟಿಗರ ಗಮನ ಸೆಳೆದಿದೆ. ದಂತೇವಾಡ ಮತ್ತು ಕಿರಾಂಡುಲ್ ಪ್ರದೇಶಗಳಲ್ಲಿ ಸೆರೆಹಿಡಿಯಲಾಗಿರುವ ಈ ದೃಶ್ಯಗಳು ‘ಅರ್ನಬ್’ ಚಂಡಮಾರುತದ ತೀವ್ರ ಹವಾಮಾನ ಎಚ್ಚರಿಕೆಯ ಮಧ್ಯೆ ಕಂಡುಬಂದಿವೆ ಎಂದು ವರದಿಯಾಗಿದೆ.

ಚಂಡಮಾರುತದ ಗಾಳಿಯು ವಾತಾವರಣದಲ್ಲಿ ಕಬ್ಬಿಣಾಂಶವಿರುವ ಕೆಂಪು ಮಣ್ಣು ಅಥವಾ ಧೂಳನ್ನು ಮೇಲಕ್ಕೆ ಕೊಂಡೊಯ್ಯುವುದರಿಂದ ಆಕಾಶವು ಮಂಗಳ ಗ್ರಹದಂತೆ ಕೆಂಪಾಗಿ ಕಾಣಿಸುತ್ತದೆ ಎಂದು ತಜ್ಞರು ವಿವರಿಸಿದ್ದಾರೆ. ಆಂಧ್ರಪ್ರದೇಶದ ಕರಾವಳಿಯನ್ನು ಅಪ್ಪಳಿಸಿರುವ ಅತಿ ತೀವ್ರ ಸ್ವರೂಪದ ‘ಅರ್ನಬ್’ ಚಂಡಮಾರುತದ ಪರಿಣಾಮದಿಂದಾಗಿ ಛತ್ತೀಸ್‌ಗಢದ ಆಕಾಶ ಈ ರೀತಿ ವಿಭಿನ್ನ ಬಣ್ಣ ಪಡೆದುಕೊಂಡಿದೆ ಎಂದು ಶಂಕಿಸಲಾಗಿದೆ.

ವೈರಲ್ ವೀಡಿಯೊಗಳ ಹವಾ: ದಂತೇವಾಡ ಮತ್ತು ಕಿರಾಂಡುಲ್‌ನಲ್ಲಿ ಸೆರೆಹಿಡಿಯಲಾದ ಈ ಕೆಂಪು ಆಕಾಶದ ದೃಶ್ಯಗಳನ್ನು ನೆಟಿಗರು ನೆಟ್‌ಫ್ಲಿಕ್ಸ್‌ನ ‘ಸ್ಟ್ರೇಂಜರ್ ಥಿಂಗ್ಸ್’ ಸರಣಿಗೆ ಹೋಲಿಸಿ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಿದ್ದಾರೆ.

ಚಂಡಮಾರುತದ ಅಪ್ಪಳಿಕೆ: ಅಕ್ಟೋಬರ್ 28 ರಂದು ಆಂಧ್ರಪ್ರದೇಶ ಕರಾವಳಿಯನ್ನು ತಲುಪಿದ ‘ಅರ್ನಬ್’ ಚಂಡಮಾರುತವು ಗಂಟೆಗೆ 130 ಕಿ.ಮೀ ವೇಗದಲ್ಲಿ ಗಾಳಿ ಬೀಸಿ ವ್ಯಾಪಕ ಹಾನಿ ಉಂಟುಮಾಡಿದೆ.

ಮುನ್ನೆಚ್ಚರಿಕೆ ಕ್ರಮಗಳು: ಚಂಡಮಾರುತದ ಪ್ರಭಾವದಿಂದ ಆಂಧ್ರಪ್ರದೇಶದಿಂದ ಬಿಹಾರದವರೆಗೆ ರಾಜ್ಯ ಸರ್ಕಾರಗಳು ತುರ್ತು ರಕ್ಷಣೆ ಮತ್ತು ಪರಿಹಾರ ಕಾರ್ಯಗಳಿಗೆ ವ್ಯಾಪಕ ಸಿದ್ಧತೆಗಳನ್ನು ಕೈಗೊಂಡಿವೆ.

ಆಸ್ಟ್ರೇಲಿಯಾದಲ್ಲಿ ಇತ್ತೀಚೆಗೆ ‘ನರೆಲ್ಲೆ’ ಚಂಡಮಾರುತ ಅಪ್ಪಳಿಸಿದಾಗಲೂ ಇದೇ ರೀತಿಯ ಕೆಂಪು ಬಣ್ಣದ ಆಕಾಶ ಗೋಚರಿಸಿತ್ತು ಎಂದು ಹವಾಮಾನ ತಜ್ಞರು ತಿಳಿಸಿದ್ದು, ಸಾರ್ವಜನಿಕರು ಹವಾಮಾನ ವೈಪರೀತ್ಯದ ಕುರಿತು ಎಚ್ಚರಿಕೆ ವಹಿಸುವಂತೆ ಸೂಚಿಸಲಾಗಿದೆ.