ಭಾರತ ಸೇರಿದಂತೆ 10 ದೇಶಗಳಲ್ಲಿ ಗುಟ್ಕಾ, ಖೈನಿ ಜಗಿಯುವವರ ಸಂಖ್ಯೆ ಗರಿಷ್ಠ: ವಾರ್ಷಿಕ 2.51 ಲಕ್ಷ ಸಾವು, ಜಾಗತಿಕ ವರದಿ ಬಹಿರಂಗ, ವೈದ್ಯರು ಹೇಳಿದ್ದೇನು?

ನವದೆಹಲಿ: ಜಗತ್ತಿನಲ್ಲಿ ಜಗಿಯುವ ತಂಬಾಕು ಬಳಕೆಯಿಂದ ಎದುರಾಗುತ್ತಿರುವ ಒಟ್ಟು ಆರೋಗ್ಯ ನಷ್ಟ ಹಾಗೂ ಸಾವು-ನೋವುಗಳ ಪೈಕಿ ಶೇಕಡಾ 90ರಷ್ಟು ಪ್ರಮಾಣ ಭಾರತ ಸೇರಿದಂತೆ ಕೇವಲ 10 ದೇಶಗಳಲ್ಲಿ ಕೇಂದ್ರೀಕೃತವಾಗಿದೆ ಎಂದು ಪ್ರತಿಷ್ಠಿತ ‘ಲ್ಯಾನ್ಸೆಟ್ ಗ್ಲೋಬಲ್ ಹೆಲ್ತ್’ ಪತ್ರಿಕೆಯಲ್ಲಿ ಪ್ರಕಟವಾದ ನೂತನ ಅಧ್ಯಯನ ವರದಿ ತಿಳಿಸಿದೆ. ಈ ಪೈಕಿ ದಕ್ಷಿಣ ಏಷ್ಯಾ ಪ್ರದೇಶವು ಜಗಿಯುವ ತಂಬಾಕು ಬಳಕೆಯ “ಪ್ರಮುಖ ಕೇಂದ್ರ ಬಿಂದು” (Epicentre) ಆಗಿದೆ ಎಂದು ವಿಜ್ಞಾನಿಗಳು ಕಳವಳ ವ್ಯಕ್ತಪಡಿಸಿದ್ದಾರೆ.

2023ರಲ್ಲಿ 2.51 ಲಕ್ಷ ಸಾವು:

‘ಗ್ಲೋಬಲ್ ಬರ್ಡನ್ ಆಫ್ ಡಿಸೀಸ್ ಸ್ಟಡಿ 2023’ (GBD 2023) ವಿಶ್ಲೇಷಣೆಯ ಭಾಗವಾಗಿ ವಿಶ್ವದ 204 ದೇಶಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ 1990 ರಿಂದ 2023 ರವರೆಗಿನ ದತ್ತಾಂಶಗಳನ್ನು ಅಧ್ಯಯನ ಮಾಡಲಾಗಿದೆ. ಈ ವರದಿಯ ಪ್ರಕಾರ, 2023ರಲ್ಲಿ ಜಗತ್ತಿನಾದ್ಯಂತ ಜಗಿಯುವ ತಂಬಾಕು ಬಳಕೆಯಿಂದಾಗಿ ಸುಮಾರು 2,51,000 ಜನರು ಮೃತಪಟ್ಟಿದ್ದಾರೆ. ಜಾಗತಿಕವಾಗಿ 24.1 ಕೋಟಿ ಜನರು ಜಗಿಯುವ ತಂಬಾಕು ಉತ್ಪನ್ನಗಳನ್ನು ಬಳಸುತ್ತಿದ್ದು, 60 ರಿಂದ 64 ವರ್ಷ ವಯಸ್ಸಿನವರಲ್ಲಿ ಈ ಪ್ರಮಾಣ ಹೆಚ್ಚಾಗಿದೆ.

ದಕ್ಷಿಣ ಏಷ್ಯಾದಲ್ಲೇ ಶೇ. 84ರಷ್ಟು ಸಾವು:

ದಕ್ಷಿಣ ಏಷ್ಯಾದಲ್ಲಿ 15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಶೇಕಡಾ 14.6 ರಷ್ಟು ಜನರು ಜಗಿಯುವ ತಂಬಾಕು ಬಳಸುತ್ತಿದ್ದಾರೆ. ಜಾಗತಿಕವಾಗಿ ಸಂಭವಿಸುವ ಒಟ್ಟು ತಂಬಾಕು ಸಂಬಂಧಿತ ಸಾವುಗಳಲ್ಲಿ ಶೇಕಡಾ 84 ರಷ್ಟು (ಸುಮಾರು 2,10,000 ಸಾವುಗಳು) ದಕ್ಷಿಣ ಏಷ್ಯಾದಲ್ಲೇ ದಾಖಲಾಗಿವೆ.

ಪುರುಷರಲ್ಲಿ ಜಗಿಯುವ ತಂಬಾಕಿನಿಂದ ಉಂಟಾಗುವ ಶೇ. 90ಕ್ಕಿಂತ ಹೆಚ್ಚಿನ ಅಡ್ಡಪರಿಣಾಮ ಹಾಗೂ ಸಾವುಗಳು ಭಾರತ, ಬಾಂಗ್ಲಾದೇಶ, ಚೀನಾ, ಪಾಕಿಸ್ತಾನ ಮತ್ತು ಅಮೆರಿಕ ಸೇರಿದಂತೆ 10 ದೇಶಗಳಲ್ಲಿ ಕಂಡುಬಂದಿವೆ. ಮಹಿಳೆಯರ ಪೈಕಿ ಭಾರತ, ಬಾಂಗ್ಲಾದೇಶ, ಪಾಕಿಸ್ತಾನ, ಇಂಡೋನೇಷ್ಯಾ, ಮ್ಯಾನ್ಮಾರ್ ಮತ್ತು ಚೀನಾದಲ್ಲಿ ಈ ಪ್ರಮಾಣ ಹೆಚ್ಚಾಗಿದೆ.

ಆರೋಗ್ಯದ ಮೇಲಾಗುವ ಪ್ರಮುಖ ಪರಿಣಾಮಗಳು:

ತಂಬಾಕು ಜಗಿಯುವುದರಿಂದ ಮುಖ್ಯವಾಗಿ ಪಾರ್ಶ್ವವಾಯು ಹಾಗೂ ತುಟಿ ಮತ್ತು ಬಾಯಿ ಕ್ಯಾನ್ಸರ್ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿವೆ ಎಂದು ವಾಷಿಂಗ್ಟನ್ ವಿಶ್ವವಿದ್ಯಾಲಯದ ಇನ್ಸ್ಟಿಟ್ಯೂಟ್ ಫಾರ್ ಹೆಲ್ತ್ ಮೆಟ್ರಿಕ್ಸ್ ಅಂಡ್ ಇವಾಲ್ಯುಯೇಷನ್ (IHME) ಸಂಶೋಧಕರು ಸ್ಪಷ್ಟಪಡಿಸಿದ್ದಾರೆ. ಹೆಚ್ಚು ಜನಸಂಖ್ಯೆ ಹೊಂದಿರುವ ದೇಶಗಳಲ್ಲಿ ಈ ಪದ್ಧತಿ ಹೆಚ್ಚಾಗಿರುವುದರಿಂದ ಸಾರ್ವಜನಿಕ ಆರೋಗ್ಯಕ್ಕೆ ಸವಾಲಾಗಿ ಪರಿಣಮಿಸಿದೆ.