ಭ್ರಷ್ಟ ಅಧಿಕಾರಿ ದಂಪತಿಗೆ ವಿಜಿಲೆನ್ಸ್ ಶಾಕ್: ₹1 ಕೋಟಿ ನಗದು, 48 ಲಕ್ಸುರಿ ವಾಚ್, ಸಿಕ್ಕಿತು ‘ನೋಟಿನ ಕಂತೆ’: ಹಣ ಎಣಿಸಲು ತಂದ ಯಂತ್ರಗಳು!

ಪಾಟ್ನಾ / ಬೇಗುಸರಾಯ್: ಅಕ್ರಮ ಆಸ್ತಿ ಗಳಿಕೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬಿಹಾರದ ಉನ್ನತ ಅಧಿಕಾರಿ ದಂಪತಿಯ ನಿವಾಸಗಳ ಮೇಲೆ ವಿಜಿಲೆನ್ಸ್ ತನಿಖಾ ಬ್ಯೂರೋ ಅಧಿಕಾರಿಗಳು ಸೋಮವಾರ ಬೃಹತ್ ಪ್ರಮಾಣದ ದಾಳಿ ನಡೆಸಿದ್ದಾರೆ. ಪಾಟ್ನಾದ ಎಡಿಎಮ್ (ಪೂರೈಕೆ) ರವೀಂದ್ರ ಕುಮಾರ್ ದಿವಾಕರ್ ಮತ್ತು ಅವರ ಪತ್ನಿ, ದಾನಾಪುರದ ಜಿಲ್ಲಾ ಸಬ್‌-ರಿಜಿಸ್ಟ್ರಾರ್ ಕುಮಾರಿ ಸ್ವೀಟಿ ಅವರ ನಿವಾಸಗಳ ಮೇಲೆ ಈ ದಾಳಿ ನಡೆದಿದೆ.

ಪಾಟ್ನಾ ಮತ್ತು ಬೇಗುಸರಾಯ್‌ನ ಒಟ್ಟು ನಾಲ್ಕು ಪ್ರಮುಖ ಸ್ಥಳಗಳಲ್ಲಿ ಏಕಕಾಲಕ್ಕೆ ದಾಳಿ ನಡೆಸಿದ ಅಧಿಕಾರಿಗಳಿಗೆ ನಗದು, ಚಿನ್ನಾಭರಣ ಹಾಗೂ ಬಿಲಿಯನ್‌ಗಟ್ಟಲೆ ಮೌಲ್ಯದ ಆಸ್ತಿ ಪತ್ರಗಳು ಪತ್ತೆಯಾಗಿವೆ.

ವಶಪಡಿಸಿಕೊಂಡ ಪ್ರಮುಖ ಆಸ್ತಿಗಳ ವಿವರ:

ಪಾಟ್ನಾ ನಿವಾಸ: ₹70 ಲಕ್ಷಕ್ಕೂ ಹೆಚ್ಚು ನಗದು (ಹಣ ಎಣಿಸಲು ಯಂತ್ರಗಳನ್ನು ಬಳಸಲಾಯಿತು) ಹಾಗೂ ₹6 ಲಕ್ಷ ಮೌಲ್ಯದ 48 ವಿದೇಶಿ ಐಷಾರಾಮಿ ಕೈಗಡಿಯಾರಗಳು.

ಬೇಗುಸರಾಯ್ ಪೇತೃಕ ಮನೆ: ₹9 ಲಕ್ಷಕ್ಕೂ ಹೆಚ್ಚು ನಗದು, ಭಾರಿ ಪ್ರಮಾಣದ ಚಿನ್ನ ಮತ್ತು ಬೆಳ್ಳಿಯ ಆಭರಣಗಳು.

ಸ್ಥಿರಾಸ್ತಿ ದಾಖಲೆಗಳು: ಪಾಟ್ನಾದ ಕಶ್ಯಪ್ ಗ್ರೀನ್ ಸಿಟಿಯಲ್ಲಿ ₹1.07 ಕೋಟಿ ಮೌಲ್ಯದ 2 ಫ್ಲ್ಯಾಟ್‌ಗಳು/ಪೆಂಟಾಹೌಸ್ ಹಾಗೂ ಕುಟುಂಬದವರ ಹೆಸರಿನಲ್ಲಿದ್ದ ₹1.28 ಕೋಟಿ ಮೌಲ್ಯದ 3 ನಿವೇಶನಗಳ ಪತ್ರಗಳು ಪತ್ತೆಯಾಗಿವೆ.

ಅಧಿಕಾರಿಗಳ ಅಧಿಕೃತ ಆದಾಯಕ್ಕಿಂತ ಸುಮಾರು ₹1.06 ಕೋಟಿಗೂ ಹೆಚ್ಚು ಅಕ್ರಮ ಆಸ್ತಿ ಸಂಪಾದಿಸಿರುವ ಆರೋಪದ ಮೇಲೆ ವಿಜಿಲೆನ್ಸ್ ಪಿಎಸ್ ಕೇಸ್ ನಂ. 113/26 ಅಡಿಯಲ್ಲಿ ನ್ಯಾಯಾಲಯದ ವಾರಂಟ್ ಪಡೆದು ಈ ಕಾರ್ಯಾಚರಣೆ ನಡೆಸಲಾಗಿದೆ. ತನಿಖೆ ಪೂರ್ಣಗೊಂಡ ನಂತರ ಅಂತಿಮ ಎಫ್‌ಐಆರ್ ದಾಖಲಾಗಲಿದೆ.