ಕ್ರೇನ್ ಬಳಸಿ ಹೊಸ ಎಸ್‌ಯುವಿ ಕಾರು ಮನೆ ಮೇಲ್ಚಾವಣಿಗೆ ಏರಿಸಿದ ಮಾಲೀಕ! ಯಾಕೆ ಗೊತ್ತಾ ವೆರಿ ವೆರಿ ಇಂಟ್ರೆಸ್ಟಿಂಗ್!

ಗೋಪಾಲ್ ಗಂಜ್: ಬಿಹಾರದ ಗೋಪಾಲ್‌ಗಂಜ್ ಜಿಲ್ಲೆಯಲ್ಲಿ ವ್ಯಕ್ತಿಯೊಬ್ಬರು ತಮ್ಮ ಹೊಸ ಮಹೀಂದ್ರಾ ಸ್ಕಾರ್ಪಿಯೋ ಕ್ಲಾಸಿಕ್ ಕಾರನ್ನು ಕಳ್ಳತನದಿಂದ ರಕ್ಷಿಸಲು ವಿಚಿತ್ರ ಹಾಗೂ ಅಚ್ಚರಿಯ ಮಾರ್ಗವನ್ನು ಕಂಡುಕೊಂಡಿದ್ದಾರೆ. ಕಾರನ್ನು ಸುರಕ್ಷಿತವಾಗಿಡಲು ಅವರು ಕ್ರೇನ್ ಬಳಸಿ ಎರಡು ಮಹಡಿಯ ಮನೆಯ ಮೇಲ್ಚಾವಣಿಯ ಮೇಲೆ ನಿಲ್ಲಿಸಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ.

ಹಿನ್ನೆಲೆ ಏನು?

ಈ ಕಾರಿನ ಮಾಲೀಕ ಮನೋಜ್ ಯಾದವ್ ಇಸ್ರೇಲ್‌ನಲ್ಲಿ ಕೆಲಸ ಮಾಡುತ್ತಿದ್ದಾರೆ. ಅವರು ಹೊಸದಾಗಿ ಸ್ಕಾರ್ಪಿಯೋ ಕಾರನ್ನು ಖರೀದಿಸಿದ್ದರು. ವಿದೇಶಕ್ಕೆ ತೆರಳುವ ಮುನ್ನ ಅವರು ಕಾರಿನ ಆರೈಕೆಗಾಗಿ ಡ್ರೈವರ್ ಒಬ್ಬರನ್ನು ನೇಮಿಸಿದ್ದರು. ಆದರೆ ಕೆಲ ದಿನಗಳ ಬಳಿಕ ಆ ಡ್ರೈವರ್ ಕೂಡ ಕೆಲಸ ಬಿಟ್ಟು ಹೋದರು. ಇದರಿಂದಾಗಿ ಕಾರಿನ ಸುರಕ್ಷತೆ ಹಾಗೂ ಕಳ್ಳತನದ ಬಗ್ಗೆ ಕುಟುಂಬದವರಿಗೆ ತೀವ್ರ ಆತಂಕ ಉಂಟಾಗಿದೆ.

ಮೇಲ್ಚಾವಣಿಯ ಮೇಲೊಂದು ಪಾರ್ಕಿಂಗ್:

ಕಾರು ಕಳ್ಳರ ಪಾಳ್ಯಕ್ಕೆ ಸಿಲುಕಬಾರದು ಅಥವಾ ಸುರಕ್ಷಿತವಾಗಿರಬೇಕು ಎಂಬ ಕಾರಣಕ್ಕಾಗಿ ಕುಟುಂಬದವರು ಅದನ್ನು ಮನೆಯ ಮೇಲ್ಚಾವಣಿಯ ಮೇಲೆಯೇ ನಿಲ್ಲಿಸಲು ನಿರ್ಧರಿಸಿದರು. ಅದರಂತೆ ದೈತ್ಯ ಕ್ರೇನ್ ಒಂದನ್ನು ಕರೆಸಿ, ಭಾರವಾದ ಹೊಸ ಎಸ್‌ಯುವಿ ಕಾರನ್ನು ಗಾಳಿಯಲ್ಲಿ ಎತ್ತರಿಸಿ, ಎಚ್ಚರಿಕೆಯಿಂದ ಎರಡು ಅಂತಸ್ತಿನ ಮನೆಯ ಮೇಲ್ಚಾವಣಿಯ ಮೇಲೆ ಇಳಿಸಲಾಗಿದೆ. ಸದ್ಯ ಈ ವಿಡಿಯೋ ನೆಟ್ಟಿಗರ ಹುಬ್ಬೇರಿಸುವಂತೆ ಮಾಡಿದ್ದು, ಭಾರೀ ಚರ್ಚೆಗೆ ಗ್ರಾಸವಾಗಿದೆ. ಆದಾಗ್ಯೂ, ಮೇಲ್ಚಾವಣಿಯ ತೂಕ-ಹೊತ್ತುಕೊಳ್ಳುವ ಸಾಮರ್ಥ್ಯದ ಬಗ್ಗೆ ಯಾವುದೇ ಅಧಿಕೃತ ಮಾಹಿತಿಗಳು ಲಭ್ಯವಾಗಿಲ್ಲ.