‘ಕಾಲುವೆಯಲ್ಲಿ ಪತ್ತೆಯಾದ ದೇಹದ 7 ತುಂಡುಗಳು, ತಲೆ ಮತ್ತು ಕೈ: ನಾಪತ್ತೆಯಾಗಿದ್ದ 16 ವರ್ಷದ ಬಾಲಕಿಯ ತಾಯಿ ಬಂಧನ, ತಂದೆ ಪರಾರಿ!

ಬಾಂಕಾ (ಬಿಹಾರ): ಬಿಹಾರದ ಬಾಂಕಾ ಜಿಲ್ಲೆಯ ಕಾಲುವೆಯೊಂದರಲ್ಲಿ ಸತತ ಐದು ದಿನಗಳ ಕಾಲ ನಡೆಸಿದ ಶೋಧನೆಯಲ್ಲಿ ಒಟ್ಟು ದೇಹದ ಏಳು ತುಂಡುಗಳು, ಒಂದು ಮಾನವನ ಕೈ ಹಾಗೂ ಕೊಳೆತ ಸ್ಥಿತಿಯಲ್ಲಿದ್ದ ತಲೆ ಪತ್ತೆಯಾಗಿರುವುದು ಭಾರೀ ಆತಂಕ ಮೂಡಿಸಿದೆ.

ಈ ಮೃತದೇಹವು ನಾಪತ್ತೆಯಾಗಿರುವ 16 ವರ್ಷದ ಬಾಲಕಿಯದ್ದಾಗಿರಬಹುದು ಎಂದು ಪೊಲೀಸರು ಶಂಕಿಸಿದ್ದು, ಈ ಸಂಬಂಧ ಬಾಲಕಿಯ ತಾಯಿಯನ್ನು ಬಂಧಿಸಿದ್ದಾರೆ. ಬದುವಾ ಜಲಾಶಯದ ಪಶ್ಚಿಮ ಮುಖ್ಯ ಕಾಲುವೆಯ ಬಳಿ ಬೀದಿ ನಾಯಿಗಳು ಪ್ಲಾಸ್ಟಿಕ್‌ನಲ್ಲಿ ಸುತ್ತಿದ ವಸ್ತುವೊಂದನ್ನು ಕಚ್ಚುತ್ತಿರುವುದನ್ನು ಗಮನಿಸಿದ ಸ್ಥಳೀಯರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.

ಈ ಭೀಕರ ಪ್ರಕರಣದ ಹಿಂದೆ ಕುಟುಂಬದ ಕಲಹ ಮತ್ತು ಹನನಶಂಕೆ ಇರುವುದಾಗಿ ಪೊಲೀಸರು ಗುಮಾನಿ ವ್ಯಕ್ತಪಡಿಸಿದ್ದಾರೆ. ಅಕ್ಟೋಬರ್ 28ರಂದು ಮೀನುಗಾರರು ಕಾಲುವೆಯಲ್ಲಿ ದೇಹದ ಭಾಗಗಳನ್ನು ಮೊದಲು ಪತ್ತೆ ಮಾಡಿದ್ದರು. ಈ ಪೈಕಿ ಒಂದು ದೇಹದ ಭಾಗಕ್ಕೆ ಐವಿ ಕ್ಯಾನುಲಾ  ಅಂಟಿಕೊಂಡಿರುವುದು ಕಂಡುಬಂದಿದ್ದು, ಬಾಲಕಿಗೆ ಮರಣದ ಮೊದಲು ವೈದ್ಯಕೀಯ ಚಿಕಿತ್ಸೆ ನೀಡಲಾಗಿತ್ತೇ ಎಂಬ ಶಂಕೆಯನ್ನು ಹುಟ್ಟುಹಾಕಿದೆ. ಮೃತ ಬಾಲಕಿ ಅಪರಿಚಿತ ಯುವಕನೊಂದಿಗೆ ಫೋನ್‌ನಲ್ಲಿ ಮಾತನಾಡುತ್ತಿದ್ದಳೆಂದೂ, ಕುಟುಂಬದವರು ಇದಕ್ಕೆ ವಿರೋಧ ವ್ಯಕ್ತಪಡಿಸಿದ್ದರು ಎಂದೂ ಸ್ಥಳೀಯರು ತಿಳಿಸಿದ್ದಾರೆ.

ತಾಯಿ ಬಂಧನ ಹಾಗೂ ತಂದೆ ತಲೆಮರೆಸಿಕೊಳ್ಳುವಿಕೆ: ಗ್ರಾಮದ ಕಾವಲುಗಾರನ ಸುಳಿವಿನ ಮೇರೆಗೆ ಬಾಲಕಿಯ ತಾಯಿ ಸುನಿತಾ ದೇವಿ ಅವರನ್ನು ಪೊಲೀಸರು ಬಂಧಿಸಿ ಜೈಲಿಗೆ ಕಳುಹಿಸಿದ್ದು, ತಂದೆ ಸಂತೋಷ್ ಸಿಂಗ್ ಹಾಗೂ ಇತರ ಆರೋಪಿಗಳಿಗಾಗಿ ಶೋಧ ಮುಂದುವರಿದಿದೆ.

ಡಿಎನ್ಎ ಪರೀಕ್ಷೆ ಮತ್ತು ಮರಣೋತ್ತರ ಪರೀಕ್ಷೆ: ಪತ್ತೆಯಾಗಿರುವ ದೇಹದ ಭಾಗಗಳು ಮತ್ತು ತಲೆಯನ್ನು ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ (FSL) ಕಳುಹಿಸಲಾಗಿದ್ದು, ಡಿಎನ್ಎ ಪರೀಕ್ಷೆಯ ವರದಿ ಬಂದ ಬಳಿಕವಷ್ಟೇ ಮೃತ ಬಾಲಕಿಯ ನಿಖರ ಗುರುತು ಪತ್ತೆಯಾಗಲಿದೆ.

ತನಿಖೆ ತೀವ್ರಗೊಳಿಸಿದ ಪೊಲೀಸ್ ಪಡೆ: ಶ್ವಾನದಳ, ಎಫ್‌ಎಸ್‌ಎಲ್ ತಜ್ಞರು ಹಾಗೂ ತಾಂತ್ರಿಕ ಸೆಲ್ ನೆರವಿನಿಂದ ಪೊಲೀಸರು ಕಾಲುವೆ ಹಾಗೂ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ತೀವ್ರ ಶೋಧ ಕಾರ್ಯ ನಡೆಸುತ್ತಿದ್ದಾರೆ.