ಇತ್ತ ಪತಿಯೂ ಇಲ್ಲ, ಅತ್ತ ಲವ್ವರ್ ಇಲ್ಲ: ಪ್ರಿಯಕರನಿಗಾಗಿ ಗಂಡನಿಗೆ ಡಿವೋರ್ಸ್ ಕೊಟ್ಟ ಬಂದ ಮಹಿಳೆ, ಮನೆಗೆ ಬೀಗ ಹಾಕಿ ಕುಟುಂಬಸಮೇತ ಪರಾರಿಯಾದ ಪ್ರೇಮಿ!

ಬೀದರ್: ಪ್ರೀತಿಸಿದವನ ಮಾತನ್ನು ಕುರುಡಾಗಿ ನಂಬಿ, ಜೊತೆಯಾಗಿ ಬಾಳುತ್ತಿದ್ದ ಗಂಡನಿಗೆ ವಿಚ್ಛೇದನ ನೀಡಿ ಬಂದ ಮಹಿಳೆಯೊಬ್ಬರಿಗೆ ಪ್ರಿಯಕರನೇ ಕೈಕೊಟ್ಟು ಪರಾರಿಯಾಗಿರುವ ಮನಕಲಕುವ ಘಟನೆ ಬೀದರ್ ಜಿಲ್ಲೆಯ ಭಾಲ್ಕಿ ತಾಲೂಕಿನ ನೆಲವಾಡ ಗ್ರಾಮದಲ್ಲಿ ಬೆಳಕಿಗೆ ಬಂದಿದೆ. ಅತ್ತ ಕಟ್ಟಿಕೊಂಡ ಗಂಡನೂ ಇಲ್ಲದೆ, ಇತ್ತ ಪ್ರೀತಿಸಿದವನೂ ಕೈಬಿಟ್ಟ ಪರಿಣಾಮ ಸಂತ್ರಸ್ತೆಯ ಬದುಕು ಅಕ್ಷರಶಃ ಬೀದಿಪಾಲಾಗಿದೆ.

ಸಂಗೀತಾ ಎಂದು ಗುರುتಿಸಲಾದ ಈ ಮಹಿಳೆಗೆ ಈ ಹಿಂದೆಯೇ ವಿವಾಹವಾಗಿದ್ದು, ಕಳೆದ ನಾಲ್ಕು ವರ್ಷಗಳಿಂದ ದತ್ತು ಎಂಬ ಯುವಕನೊಂದಿಗೆ ಪ್ರೇಮ ಸಂಬಂಧದಲ್ಲಿದ್ದರು. ಗಂಡನಿಗೆ ಡಿವೋರ್ಸ್ ನೀಡಿದರೆ ತಾನು ಮದುವೆಯಾಗುವುದಾಗಿ ದತ್ತು ನಂಬಿಸಿದ್ದನು. ಆತನ ಮಾತನ್ನು ನಂಬಿ ಸಂಗೀತಾ ಪತಿಗೆ ವಿಚ್ಛೇದನ ನೀಡಿದ್ದಾರೆ. ಆದರೆ ವಿಚ್ಛೇದನ ಪಡೆದು ಬಂದ ಬಳಿಕ ದತ್ತು ಮದುವೆಯಾಗಲು ನಿರಾಕರಿಸಿ ಪರಾರಿಯಾಗಿದ್ದಾನೆ. ಅಷ್ಟೇ ಅಲ್ಲದೆ, ಯುವಕನ ಕುಟುಂಬಸ್ಥರು ಸಹ ಮನೆಗೆ ಬೀಗ ಜಡಿದು ತಲೆಮರೆಸಿಕೊಂಡಿದ್ದಾರೆ. ಇದರಿಂದ ಕಂಗಾಲಾದ ಸಂಗೀತಾ, ಕಳೆದ ಹತ್ತು ದಿನಗಳಿಂದ ಪ್ರಿಯಕರನ ಮನೆ ಮುಂದೆ ಬ್ಯಾಗ್ ಸಮೇತ ಕುಳಿತು ನ್ಯಾಯಕ್ಕಾಗಿ ಅಹೋರಾತ್ರಿ ಧರಣಿ ನಡೆಸುತ್ತಿದ್ದಾರೆ.

ಪ್ರೇಮದ ಹೆಸರಿನಲ್ಲಿ ವಂಚನೆ: ಮದುವೆಯಾಗುವ ಆಸೆ ತೋರಿಸಿ ಪತಿಗೆ ವಿಚ್ಛೇದನ ಕೊಡಿಸಿ, ಕೊನೆಗೆ ನಡುನೀರಿನಲ್ಲಿ ಕೈಬಿಟ್ಟು ಪ್ರಿಯಕರ ದತ್ತು ಹಾಗೂ ಆತನ ಕುಟುಂಬಸ್ಥರು ಪರಾರಿಯಾಗಿದ್ದಾರೆ.

10 ದಿನಗಳಿಂದ ಧರಣಿ: ಬಿಸಿಲು, ಮಳೆ ಎನ್ನದೆ ಕಳೆದ ಹತ್ತು ದಿನಗಳಿಂದ ಪ್ರಿಯಕರನ ಮನೆ ಎದುರು ನ್ಯಾಯಕ್ಕಾಗಿ ಕುಳಿತು ಮಹಿಳೆ ಕಣ್ಣೀರಿಡುತ್ತಿದ್ದಾರೆ.

ಪ್ರಾಣಹಾನಿ ಎಚ್ಚರಿಕೆ: ತನಗೆ ನ್ಯಾಯ ಸಿಗದಿದ್ದರೆ ತನ್ನ ಜೀವಕ್ಕೆ ಏನಾದರೂ ಹೆಚ್ಚುಕಮ್ಮಿಯಾದರೆ ಅದಕ್ಕೆ ಪ್ರಿಯಕರ ಮತ್ತು ಆತನ ಕುಟುಂಬಸ್ಥರೇ ನೇರ ಹೊಣೆ ಎಂದು ಸಂತ್ರಸ್ತೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಗ್ರಾಮದಲ್ಲಿ ನಡೆದ ಈ ದಾರುಣ ಘಟನೆಯು ಸ್ಥಳೀಯರಲ್ಲಿ ತೀವ್ರ ಮರುಕ ಹುಟ್ಟಿಸಿದ್ದು, ಮೋಸ ಮಾಡಿದ ಯುವಕನ ವಿರುದ್ಧ ಕಠಿಣ ಕ್ರಮ ಕೈಗೊಂಡು ಸಂತ್ರಸ್ತೆಗೆ ನ್ಯಾಯ ಕಲ್ಪಿಸಿಕೊಡುವಂತೆ ಸಾರ್ವಜನಿಕರು ಒತ್ತಾಯಿಸಿದ್ದಾರೆ.