ಬಿಡಿಎಯಿಂದ ನೂತನ ನಾಗರಿಕ ಸ್ನೇಹಿ ಕ್ರಮಗಳು: ಮನೆಗಳ ಸಕ್ರಮ, ಮಾರ್ಜಿನಲ್ ಲ್ಯಾಂಡ್ ಹಂಚಿಕೆ ಮತ್ತು ಸೇಲ್ ಡಿಡ್ ಮೇಳ ಘೋಷಣೆ

ಬೆಂಗಳೂರು: ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರವು ನಾಗರಿಕರ ಹಿತದೃಷ್ಟಿಯಿಂದ ಹಲವು ಪ್ರಮುಖ ನಿರ್ಧಾರಗಳನ್ನು ತೆಗೆದುಕೊಂಡಿದ್ದು, 9 ನವೆಂಬರ್ 2026 ರಂದು ನಡೆದ ಮುಖ್ಯಮಂತ್ರಿಗಳ ಪರಿಶೀಲನಾ ಸಭೆಯಲ್ಲಿ ಪ್ರಮುಖ ಯೋಜನೆ ಹಾಗೂ ನಾಗರಿಕ ಸ್ನೇಹಿ ಇನಿಶಿಯೇಟಿವ್‌ಗಳ ವಿವರಗಳನ್ನು ಬಿಡುಗಡೆ ಮಾಡಿದೆ.

ಈ ಯೋಜನೆಯಡಿ ಅನಧಿಕೃತ ಮನೆಗಳ ಸಕ್ರಮ (Section 38D), ಮಾರ್ಜಿನಲ್ ಲ್ಯಾಂಡ್ ಹಂಚಿಕೆ, ಕ್ರಯಪತ್ರಗಳ ನೋಂದಣಿಗೆ ವಿಶೇಷ ಮೇಳ ಹಾಗೂ ಕೆಂಪೇಗೌಡ ಲೇಔಟ್ ಜಮೀನು ನೀಡಿದ ರೈತರಿಗೆ ಪ್ರೋತ್ಸಾಹಕ ನಿವೇಶನ ಹಂಚಿಕೆ ಸೇರಿದಂತೆ ಹಲವು ಪ್ರಮುಖ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದೆ.

ಸೆಕ್ಷನ್ 38(D) ಅಡಿಯಲ್ಲಿ ಅರ್ಹ ವಸತಿ ಸ್ವತ್ತುಗಳ ಸಕ್ರಮ

ಬಿಡಿಎ ಸ್ವಾಧೀನಪಡಿಸಿಕೊಂಡ ಭೂಮಿಯಲ್ಲಿ ಜುಲೈ 10, 2008 ಕ್ಕಿಂತ ಮೊದಲು ನಿರ್ಮಿಸಲಾದ ಅರ್ಹ ಅನಧಿಕೃತ ವಾಸದ ಮನೆಗಳನ್ನು ‘ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ ಕಾಯ್ದೆ 1976’ರ ಸೆಕ್ಷನ್ 38(D) ಅಡಿಯಲ್ಲಿ ಸಕ್ರಮಗೊಳಿಸಲು ಅವಕಾಶ ನೀಡಲಾಗಿದೆ. ಅರ್ಹ ಅರ್ಜಿದಾರರು ಡಿಸೆಂಬರ್ 15, 2026 ರೊಳಗೆ ಕಡ್ಡಾಯವಾಗಿ ಆನ್‌ಲೈನ್ ಮೂಲಕ ಅರ್ಜಿ ಸಲ್ಲಿಸಬೇಕಾಗಿದೆ.

ಮಾರ್ಪಡಿಸಿದ ಶುಲ್ಕಗಳ ವಿವರ (ಕಂದಾಯ ಇಲಾಖೆಯ ಚಾಲ್ತಿ ಮಾರ್ಗದರ್ಶಿ ದರದ ಆಧಾರದ ಮೇಲೆ):

ಯಾವ ಸ್ವತ್ತುಗಳಿಗೆ ಸಕ್ರಮ ಅನ್ವಯಿಸುವುದಿಲ್ಲ? ಉದ್ಯಾನವನ, ಆಟದ ಮೈದಾನ, ನಾಗರಿಕ ಸೌಲಭ್ಯ (CA) ನಿವೇಶನಗಳು, ಪ್ರಸ್ತಾವಿತ ವರ್ತುಲ ರಸ್ತೆ/ರಾಷ್ಟ್ರೀಯ ಹೆದ್ದಾರಿ ಜಾಗ, ರಾಜಕಾಲುವೆ/ಕೆರೆ ಅಂಗಳ, ಹೈ-ಟೆನ್ಷನ್ ವಿದ್ಯುತ್ ಲೈನ್ ಕೆಳಗಿನ ಜಾಗ ಹಾಗೂ ನ್ಯಾಯಾಲಯದ ತಡೆಯಾಜ್ಞೆ ಇರುವ ವಿವಾದಿತ ಜಾಗಗಳಿಗೆ ಈ ಸಕ್ರಮ ಯೋಜನೆ ಅನ್ವಯಿಸುವುದಿಲ್ಲ. 2026 ರ ತಿದ್ದುಪಡಿ ಕಾಯ್ದೆ ಜಾರಿಯಾದ 2 ವರ್ಷಗಳೊಳಗೆ ಈ ಯೋಜನೆಯ ಸೌಲಭ್ಯ ಪಡೆಯದಿದ್ದರೆ, ಅಂತಹ ಅಕ್ರಮ ಒತ್ತುವರಿಗಳನ್ನು ಕಾನೂನುಬದ್ಧವಾಗಿ ತೆರವುಗೊಳಿಸಲಾಗುವುದು ಎಂದು ತಿಳಿಸಲಾಗಿದೆ.

ಅಗತ್ಯ ದಾಖಲೆಗಳು: ಮಾರಾಟ ಪತ್ರಗಳ ಪ್ರಮಾಣೀಕೃತ ಪ್ರತಿ, ಫಾರ್ಮ್ 15 ರ ಋಣಭಾರ ಪ್ರಮಾಣ ಪತ್ರ (Encumbrance Certificate), ಇತ್ತೀಚಿನ ಆಸ್ತಿ ತೆರಿಗೆ ರಶೀದಿ, ನೋಟರಿ ದೃಢೀಕೃತ ಸ್ವಯಂ ಘೋಷಣಾಪತ್ರ, ಖಾತಾ ಪ್ರಮಾಣಪತ್ರ ಮತ್ತು ಖಾತಾ ಉದ್ಧಾರ, ಅನುಮೋದಿತ ಕಟ್ಟಡ ನಕ್ಷೆ, ನೀರು ಮತ್ತು ವಿದ್ಯುತ್ ಸಂಪರ್ಕ ಕಾರ್ಯಾದೇಶ ಹಾಗೂ ನಿವಾಸಿ ವಿಳಾಸ ಪುರಾವೆ (ಆಧಾರ್ ಕಾರ್ಡ್/ಪ್ಯಾನ್/ರೇಷನ್ ಕಾರ್ಡ್).

ಅರ್ಹ ನಿವೇಶನದಾರರಿಗೆ ಮಾರ್ಜಿನಲ್ ಲ್ಯಾಂಡ್ ಹಂಚಿಕೆ

ಬಿಡಿಎ ಈಗಾಗಲೇ ಹಂಚಿಕೆ ಮಾಡಿರುವ ನಿವೇಶನಗಳ ಹಿಂಭಾಗದಲ್ಲಿ ಅಥವಾ ಪಕ್ಕದಲ್ಲಿ ಲಭ್ಯವಿರುವ ಸಣ್ಣ ಪ್ರಮಾಣದ ಹೆಚ್ಚುವರಿ (ಮಾರ್ಜಿನಲ್) ಭೂಮಿಯನ್ನು ಪಡೆಯಲು ಡಿಸೆಂಬರ್ 17, 2026 ರೊಳಗೆ ಅರ್ಜಿ ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ.

ಹಳೆಯ ಲೇಔಟ್‌ಗಳು: ನಾಡಪ್ರಭು ಕೆಂಪೇಗೌಡ ಲೇಔಟ್ ಹೊರತುಪಡಿಸಿ, ಹಳೆಯ ಲೇಔಟ್‌ಗಳಲ್ಲಿನ ನಿವೇಶನ ಪಕ್ಕದ ಮಾರ್ಜಿನಲ್ ಜಾಗಕ್ಕೆ ಸಕ್ಷಮ ಪ್ರಾಧಿಕಾರ ಅನುಮೋದಿಸಿದ ದಿನಾಂಕದ ಚಾಲ್ತಿ ಮಾರ್ಗದರ್ಶಿ ಮೌಲ್ಯ ಅನ್ವಯಿಸುತ್ತದೆ.

60:40 ಪರಿಹಾರ ಯೋಜನೆ ಭೂಮಾಲೀಕರು: 60:40 ಆಧಾರದಲ್ಲಿ ಭೂಮಿ ನೀಡಿದ ಭೂಮಾಲೀಕರಿಗೆ 600 ಚದರ ಅಡಿವರೆಗಿನ ಮಾರ್ಜಿನಲ್ ಭೂಮಿಯನ್ನು ಅನುಮೋದಿತ ದಿನಾಂಕದ ಮಾರ್ಗದರ್ಶಿ ದರದಲ್ಲೇ ನೀಡಲಾಗುವುದು.

ಸ್ಲಂ ಪ್ರದೇಶಗಳ ನಿವೇಶನಗಳು: ಬಿಡಿಎ ವ್ಯಾಪ್ತಿಯ ಸ್ಲಂ ಪ್ರದೇಶಗಳಲ್ಲಿ ಚದರ ಮೀಟರ್‌ಗೆ ನಿಗದಿಪಡಿಸಿದ್ದ ₹200 ಶುಲ್ಕದ ಬದಲಿಗೆ, ಚಾಲ್ತಿ ಮಾರ್ಗದರ್ಶಿ ಮೌಲ್ಯದ 20% ನಷ್ಟು ದರವನ್ನು ನಿಗದಿಪಡಿಸಲಾಗಿದೆ.

ಅಬ್ಸೊಲ್ಯೂಟ್ ಸೇಲ್ ಡಿಡ್ ಮೇಳ

ಬಿಡಿಎ ನಿವೇಶನ ಹಂಚಿಕೆಯಾಗಿ 10 ವರ್ಷಗಳ ಗುತ್ತಿಗೆ (Lease Period) ಅವಧಿ ಪೂರ್ಣಗೊಂಡಿದ್ದರೂ, ಇನ್ನೂ ಅಂತಿಮ ಕ್ರಯಪತ್ರ (Absolute Sale Deed) ನೋಂದಣಿ ಮಾಡಿಕೊಳ್ಳದ ಸುಮಾರು 20,000 ಹಂಚಿಕೆದಾರರಿಗಾಗಿ ಬಿಡಿಎ ‘ಅಬ್ಸೊಲ್ಯೂಟ್ ಸೇಲ್ ಡಿಡ್ ಮೇಳ’ವನ್ನು ಆಯೋಜಿಸುತ್ತಿದೆ.

ಅರ್ಹ ಹಂಚಿಕೆದಾರರು ಡಿಸೆಂಬರ್ 17, 2026 ರೊಳಗೆ ಅಗತ್ಯ ದಾಖಲೆಗಳೊಂದಿಗೆ ಅರ್ಜಿ ಸಲ್ಲಿಸಬೇಕು.

ಅರ್ಜಿ ಸ್ವೀಕರಿಸಿದ 60 ದಿನಗಳ ಒಳಗೆ ಪರಿಶೀಲನೆ ನಡೆಸಿ ಸೇಲ್ ಡಿಡ್ ನೋಂದಣಿ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲಾಗುತ್ತದೆ. ಮೇಳದ ನಿಖರ ದಿನಾಂಕ ಮತ್ತು ವಿವರಗಳನ್ನು ಶೀಘ್ರದಲ್ಲೇ ಪ್ರಕಟಿಸಲಾಗುವುದು.

ಪ್ರೋತ್ಸಾಹಕ ನಿವೇಶನಗಳ  ಹಂಚಿಕೆ

ನಾಡಪ್ರಭು ಕೆಂಪೇಗೌಡ ಲೇಔಟ್ ನಿರ್ಮಾಣಕ್ಕಾಗಿ ಸ್ವಯಂಪ್ರೇರಿತವಾಗಿ ಜಮೀನು ಬಿಟ್ಟುಕೊಟ್ಟು ನಗದು ಪರಿಹಾರ ಪಡೆದಿದ್ದ ಅರ್ಹ ಭೂಮಾಲೀಕರಿಗೆ, ಸರ್ಕಾರದ ಆದೇಶ ಸಂಖ್ಯೆ NAE 175 MNX 2020 (E) ದಿನಾಂಕ 24.08.2026 ರ ಪ್ರಕಾರ ವಿಶೇಷ ಪ್ರೋತ್ಸಾಹಕ ಯೋಜನೆಯಡಿ (Special Incentive Scheme) ವಸತಿ ನಿವೇಶನಗಳನ್ನು ಹಂಚಿಕೆ ಮಾಡಲು ನಿರ್ಧರಿಸಲಾಗಿದೆ. 2013 ರ ಭೂಸ್ವಾಧೀನ ಕಾಯ್ದೆಯಡಿ ಹೆಚ್ಚುವರಿ ಪರಿಹಾರ ಪಡೆಯದಿರುವುದನ್ನು ಖಚಿತಪಡಿಸಿಕೊಂಡು ಈ ಹಂಚಿಕೆ ಮಾಡಲಾಗುತ್ತದೆ.