ಅಟಲ್ ಪೆನ್ಷನ್ ಯೋಜನೆ ನಿಯಮದಲ್ಲಿ ಬದಲಾವಣೆ? ₹5,000 ಮಾಸಿಕ ಪಿಂಚಣಿ ಮಿತಿ ಹೆಚ್ಚಳಕ್ಕೆ ಸರ್ಕಾರದ ಪರಿಶೀಲನೆ!

ನವದೆಹಲಿ: ಅಸಂಘಟಿತ ವಲಯದ ಕಾರ್ಮಿಕರಿಗಾಗಿ ಕೇಂದ್ರ ಸರ್ಕಾರ ಜಾರಿಗೆ ತಂದಿರುವ ಜನಪ್ರಿಯ ‘ಅಟಲ್ ಪೆನ್ಷನ್ ಯೋಜನೆ‘ಯ (Atal Pension Yojana – APY) ಮಾಸಿಕ ಪಿಂಚಣಿ ಮಿತಿಯನ್ನು ಹೆಚ್ಚಿಸುವ ಕುರಿತು ಸರ್ಕಾರ ಗಂಭೀರ ಪರಿಶೀಲನೆ ನಡೆಸುತ್ತಿದೆ. ಪ್ರಸ್ತುತ ಈ ಯೋಜನೆಯಡಿ ಸಿಗುತ್ತಿರುವ ಗರಿಷ್ಠ ₹5,000 ಮಾಸಿಕ ಪಿಂಚಣಿ ಮಿತಿಯನ್ನು ಹೆಚ್ಚಿಸಬೇಕು ಎಂಬ ಸಾರ್ವಜನಿಕ ಮತ್ತು ಚಂದಾದಾರರ ಬೇಡಿಕೆಯನ್ನು ಪಿಂಚಣಿ ನಿಧಿ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ (PFRDA) ಪರಿಶೀಲಿಸುತ್ತಿದೆ.

ನವದೆಹಲಿಯಲ್ಲಿ ಇತ್ತೀಚೆಗೆ ನಡೆದ ಯೋಜನೆಯ ವಾರ್ಷಿಕ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಪಿಎಫ್‌ಆರ್‌ಡಿಎ ಅಧ್ಯಕ್ಷ ಎಸ್. ರಾಮಣ್ಣ ಈ ವಿಷಯವನ್ನು ಖಚಿತಪಡಿಸಿದ್ದಾರೆ. ಆದರೆ, ಇದು ದೀರ್ಘಾವಧಿಯ ಯೋಜನೆಯಾಗಿದ್ದು, ಸರ್ಕಾರದ ಹಣಕಾಸು ಬದ್ಧತೆಗಳು ಇದರೊಂದಿಗೆ ಜೋಡಣೆಯಾಗಿರುವುದರಿಂದ ಅಂತಿಮ ನಿರ್ಧಾರಕ್ಕೆ ಬರಲು ಸ್ವಲ್ಪ ಸಮಯ ತೆಗೆದುಕೊಳ್ಳಬಹುದು ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಏನಿದು ಯೋಜನೆ? ಪ್ರಸ್ತುತ ನಿಯಮಗಳೇನು?

ಅರ್ಹತೆ: 18 ರಿಂದ 40 ವರ್ಷ ವಯಸ್ಸಿನ ಯಾವುದೇ ಭಾರತೀಯ ನಾಗರಿಕರು (ಆದಾಯ ತೆರಿಗೆ ಪಾವತಿದಾರರನ್ನು ಹೊರತುಪಡಿಸಿ) ಈ ಯೋಜನೆಗೆ ಸೇರಬಹುದು.

ಪಿಂಚಣಿ ಮಿತಿ: ಸದ್ಯಕ್ಕೆ ಚಂದಾದಾರರು ನೀಡುವ ವಂತಿಕೆಗೆ (Premium) ಅನುಗುಣವಾಗಿ 60 ವರ್ಷ ತುಂಬಿದ ನಂತರ ₹1,000, ₹2,000, ₹3,000, ₹4,000 ಅಥವಾ ಗರಿಷ್ಠ ₹5,000 ಮಾಸಿಕ ಪಿಂಚಣಿ ಸಿಗುತ್ತದೆ.

ತ್ರಿವಳಿ ಸುರಕ್ಷತೆ: ಚಂದಾದಾರರ ನಿಧನದ ನಂತರ ಅದೇ ಪಿಂಚಣಿ ಹಣ ಸಂಗಾತಿಗೆ ಸಿಗುತ್ತದೆ. ಇಬ್ಬರ ಮರಣದ ನಂತರ ಸಂಪೂರ್ಣ ಮೊತ್ತವನ್ನು ನಾಮಿನಿಗೆ ಹಿಂತಿರುಗಿಸಲಾಗುತ್ತದೆ.

₹1,000 ಸ್ಲ್ಯಾಬ್‌ನದ್ದೇ ದೊಡ್ಡ ಸವಾಲು!

ಪ್ರಸ್ತುತ ದೇಶಾದ್ಯಂತ 9.1 ಕೋಟಿಗೂ ಹೆಚ್ಚು ಜನ ಈ ಯೋಜನೆಯಲ್ಲಿದ್ದಾರೆ. ಆದರೆ, ಇದರಲ್ಲಿ ಶೇ. 80 ಕ್ಕಿಂತ ಹೆಚ್ಚು ಚಂದಾದಾರರು ಕನಿಷ್ಠ ₹1,000 ಪಿಂಚಣಿ ಬರುವ ಸ್ಲ್ಯಾಬ್‌ನಲ್ಲೇ ಇದ್ದಾರೆ ಎಂದು ಹಣಕಾಸು ಸೇವೆಗಳ ಕಾರ್ಯದರ್ಶಿ ಎಂ. ನಾಗರಾಜು ಕಳವಳ ವ್ಯಕ್ತಪಡಿಸಿದ್ದಾರೆ. ಭವಿಷ್ಯದ ಹಣದುಬ್ಬರವನ್ನು ಗಮನದಲ್ಲಿಟ್ಟುಕೊಂಡರೆ 20-30 ವರ್ಷಗಳ ನಂತರ ಬರುವ ₹1,000 ಪಿಂಚಣಿಯಿಂದ ಜೀವನ ನಡೆಸುವುದು ಕಷ್ಟ. ಆದ್ದರಿಂದ ಚಂದಾದಾರರು ತಮ್ಮ ಆದಾಯ ಹೆಚ್ಚಿದಂತೆ ಹೆಚ್ಚಿನ ಪಿಂಚಣಿ ಬರುವ ಸ್ಲ್ಯಾಬ್‌ಗಳಿಗೆ ಅಪ್‌ಗ್ರೇಡ್ ಮಾಡಿಕೊಳ್ಳುವಂತೆ ಬ್ಯಾಂಕ್‌ಗಳು ಜಾಗೃತಿ ಮೂಡಿಸಬೇಕಿದೆ ಎಂದು ಅವರು ಸಲಹೆ ನೀಡಿದ್ದಾರೆ.

ಸದ್ಯದಲ್ಲೇ ಪಿಎಫ್‌ಆರ್‌ಡಿಎ ಇಲಾಖೆಯು ಹಣಕಾಸು ಸೇವೆಗಳ ಇಲಾಖೆಯೊಂದಿಗೆ (DFS) ಚರ್ಚಿಸಿ, ಪಿಂಚಣಿ ಮಿತಿ ಹೆಚ್ಚಳದ ಸಾಧಕ-ಬಾಧಕಗಳ ವರದಿಯನ್ನು ಸಿದ್ಧಪಡಿಸಲಿದೆ. ಪ್ರಸ್ತುತ 18 ರಿಂದ 25 ವರ್ಷದ ಯುವಕರು ಈ ಯೋಜನೆಯತ್ತ ಹೆಚ್ಚಿನ ಆಸಕ್ತಿ ತೋರಿಸುತ್ತಿದ್ದು, ಈ ಹಣಕಾಸು ವರ್ಷದ ಅಂತ್ಯಕ್ಕೆ ಒಟ್ಟು ಚಂದಾದಾರರ ಸಂಖ್ಯೆ 10 ಕೋಟಿ ದಾಟುವ ನಿರೀಕ್ಷೆಯಿದೆ.