ಅರವಿಂದ್ ಕೇಜ್ರಿವಾಲ್, ಪತ್ನಿ ಹಾಗೂ ಪೋಷಕರಿಗೆ ‘SIR’ ನೋಟಿಸ್ ಜಾರಿ: ದೆಹಲಿ ಮತದಾರರ ಪಟ್ಟಿಯಲ್ಲಿ ‘Unmapped’ ವರ್ಗಕ್ಕೆ ಸೇರ್ಪಡೆ!

ನವದೆಹಲಿ: ಆಮ್ ಆದ್ಮಿ ಪಾರ್ಟಿ (ಎಎಪಿ) ಮುಖ್ಯಸ್ಥ ಹಾಗೂ ದೆಹಲಿಯ ಮಾಜಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಮತ್ತು ಅವರ ಕುಟುಂಬದ ನಾಲ್ವರು ಸದಸ್ಯರಿಗೆ ದೆಹಲಿ ಚುನಾವಣಾ ಆಯೋಗವು ನೋಟಿಸ್ ಜಾರಿ ಮಾಡಿದೆ. ದೆಹಲಿಯಲ್ಲಿ ಪ್ರಸ್ತುತ ನಡೆಯುತ್ತಿರುವ ವಿಶೇಷ ತೀವ್ರ ಪರಿಷ್ಕರಣೆ (Special Intensive Revision – SIR) 2026 ಪ್ರಕ್ರಿಯೆಯಡಿ ಈ ಕ್ರಮ ಕೈಗೊಳ್ಳಲಾಗಿದೆ.

ಅರವಿಂದ್ ಕೇಜ್ರಿವಾಲ್, ಅವರ ಪತ್ನಿ ಸುನೀತಾ ಕೇಜ್ರಿವಾಲ್, ತಂದೆ ಗೋಬಿಂದ್ ರಾಮ್ ಕೇಜ್ರಿವಾಲ್, ತಾಯಿ ಗೀತಾ ದೇವಿ ಹಾಗೂ 25 ವರ್ಷದ ಮಗ ಪುಲ್ಕಿತ್ ಕೇಜ್ರಿವಾಲ್ ಅವರಿಗೆ ನೋಟಿಸ್ ನೀಡಲಾಗಿದೆ. ಇವರ ವಿವರಗಳು ಹಿಂದಿನ ಎಸ್‌ಐಆರ್ ದಾಖಲೆಗಳೊಂದಿಗೆ ಹೊಂದಾಣಿಕೆಯಾಗದ ಕಾರಣ, ಇವರನ್ನು “Unmapped with Last SIR” (ಹಿಂದಿನ ಎಸ್‌ಐಆರ್ ದಾಖಲೆಗೆ ಹೊಂದಾಣಿಕೆಯಾಗದ) ವಿಭಾಗದಲ್ಲಿ ವರ್ಗೀಕರಿಸಿ ಪರಿಶೀಲನೆಗೆ ಒಳಪಡಿಸಲಾಗಿದೆ.

ನವದೆಹಲಿ ವಿಧಾನಸಭಾ ಕ್ಷೇತ್ರಕ್ಕೆ (Constituency 40) ಸಂಬಂಧಿಸಿದ ನಿರ್ದಿಷ್ಟ ವಿಭಾಗ ಒಂದರಲ್ಲೇ ಕೇಜ್ರಿವಾಲ್ ಕುಟುಂಬದ 5 ಸದಸ್ಯರು ಸೇರಿದಂತೆ ಒಟ್ಟು 110 ಜನರಿಗೆ ಇಂತಹ ನೋಟಿಸ್‌ಗಳನ್ನು ಜಾರಿಗೊಳಿಸಲಾಗಿದೆ.

ಎಸ್‌ಐಆರ್ ಪ್ರಕ್ರಿಯೆ ವಿರುದ್ಧ ಕೇಜ್ರಿವಾಲ್ ವಾಗ್ದಾಳಿ:

ಚುನಾವಣಾ ಆಯೋಗದ ಈ ಪ್ರಕ್ರಿಯೆಯನ್ನು ಕೇಜ್ರಿವಾಲ್ ಕಠಿಣವಾಗಿ ಟೀಕಿಸಿದ್ದಾರೆ. ದೆಹಲಿಯ ಒಟ್ಟು 1.5 ಕೋಟಿ ಮತದಾರರ ಪೈಕಿ ಕರಡು ಮತದಾರರ ಪಟ್ಟಿಯಿಂದ ಸುಮಾರು 47 ಲಕ್ಷಕ್ಕೂ ಹೆಚ್ಚು ಹೆಸರುಗಳನ್ನು ಕೈಬಿಡಲಾಗಿದೆ ಎಂದು ಅವರು ಆರೋಪಿಸಿದ್ದಾರೆ. ಅಲ್ಲದೆ, “ಕೇಂದ್ರ ಸರ್ಕಾರವು ದೇಶದ ಜನಸಂಖ್ಯೆ ಹೆಚ್ಚಳದ ಬಗ್ಗೆ ಚಿಂತಿಸುವ ಅಗತ್ಯವಿಲ್ಲ, ಈ ಎಸ್‌ಐಆರ್ ಪ್ರಕ್ರಿಯೆಯ ಮೂಲಕ ದೇಶದ 140 ಕೋಟಿ ಜನಸಂಖ್ಯೆಯನ್ನು 50 ಕೋಟಿಗೆ ಇಳಿಸಬಹುದು” ಎಂದು ವ್ಯಂಗ್ಯವಾಡಿದ್ದಾರೆ.

ಸೆಪ್ಟೆಂಬರ್ 30ರವರೆಗೆ ಅವಕಾಶ:

ಜೂನ್ 30 ರಿಂದ ಆಗಸ್ಟ್ 17 ರವರೆಗೆ ನಡೆದ ಮನೆ-ಮನೆ ಪರಿಶೀಲನೆ ಕಾರ್ಯದಲ್ಲಿ ದೆಹಲಿಯ 67.18% ಮತದಾರರ ನಮೂನೆಗಳನ್ನು ಡಿಜಿಟಲೀಕರಣಗೊಳಿಸಲಾಗಿದೆ. ಒಂದು ವೇಳೆ ಮತದಾರರ ಪಟ್ಟಿಯಿಂದ ಹೆಸರು ಬಿಟ್ಟುಹೋಗಿದ್ದರೆ ಅಥವಾ ನೋಟಿಸ್ ಸ್ವೀಕರಿಸಿದ್ದರೆ, ಅಂತಹ ಮತದಾರರು ಅಗತ್ಯ ದಾಖಲೆಗಳೊಂದಿಗೆ ಫಾರ್ಮ್ 6 (Form 6) ಸಲ್ಲಿಸಿ ಸೆಪ್ಟೆಂಬರ್ 30 ರವರೆಗೆ ತಮ್ಮ ಹೆಸರು ಸೇರ್ಪಡೆಗೆ ಅರ್ಜಿ ಸಲ್ಲಿಸಬಹುದು.