ಪತ್ನಿಗೆ ‘ಬಂಜೆ ಎಂದ ಗಂಡ’, ಪತಿಗೆ ‘ನಪುಂಸಕ’ ಎಂದ ಹೆಂಡತಿ: ಕೋರ್ಟ್ ಕೊಟ್ಟ ತೀರ್ಪೇ ಇಂಟ್ರೆಸ್ಟಿಂಗ್!

ನವದೆಹಲಿ/ಅಲಹಾಬಾದ್: ದಂಪತಿಗಳ ನಡುವಿನ ಜಗಳದ ವೇಳೆ ಹೆಂಡತಿಯನ್ನು “ಬಂಜೆ” ಎಂದು ಕರೆಯುವುದು ಭಾರತೀಯ ದಂಡ ಸಂಹಿತೆಯ (IPC) ಸೆಕ್ಷನ್ 498-ಎ ಅಡಿಯಲ್ಲಿ ಗೃಹಹಿಂಸೆ ಅಥವಾ ಕ್ರೌರ್ಯದ ಅಪರಾಧವಾಗುವುದಿಲ್ಲ ಎಂದು ಅಲಹಾಬಾದ್ ಹೈಕೋರ್ಟ್ ತೀರ್ಪು ನೀಡಿದೆ. ಈ ಮೂಲಕ ಪತಿಯ ವಿರುದ್ಧ ದಾಖಲಾಗಿದ್ದ ಕ್ರಿಮಿನಲ್ ಪ್ರಕರಣವನ್ನು ಕೋರ್ಟ್ ರದ್ದುಗೊಳಿಸಿದೆ.

ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಇಂದ್ರಜಿತ್ ಶುಕ್ಲಾ ಅವರಿದ್ದ ಪೀಠ, ಸಂಸಾರದಲ್ಲಿ ದಂಪತಿಗಳಿಬ್ಬರೂ ಪರಸ್ಪರ ನಿಂದನೀಯ ಪದಗಳನ್ನು ಬಳಸಿದ್ದಾರೆ. ಪತಿ ಪತ್ನಿಯನ್ನು ‘ಬಂಜೆ’ ಎಂದರೆ, ಪತ್ನಿಯು ಪತಿಯನ್ನು ‘ನಪುಂಸಕ’ ಎಂದು ಕರೆದಿದ್ದಾಳೆ. ಇಬ್ಬರ ನಡುವೆ ಮಕ್ಕಳಾಗದ ವಿಚಾರಕ್ಕೆ ನಿರಂತರ ಕಲಹ ನಡೆಯುತ್ತಿತ್ತು ಎಂಬುದನ್ನು ಕೋರ್ಟ್ ಗಮನಿಸಿದೆ.

ಹೈಕೋರ್ಟ್ ಮುಖ್ಯ ವೀಕ್ಷಣೆಗಳು:

ಹೆಂಡತಿಯನ್ನು ‘ಬಂಜೆ’ ಎಂದು ಕರೆಯುವುದು ಅಸಂವೇದನಾಶೀಲ ಮತ್ತು ಖಂಡನೀಯವಾಗಿದ್ದರೂ, ಪ್ರಸ್ತುತ ಪ್ರಕರಣದ ಸನ್ನಿವೇಶದಲ್ಲಿ ಅದು 498-ಎ ಅಡಿಯಲ್ಲಿ ಅಪರಾಧವಾಗುವುದಿಲ್ಲ.

ಗಂಡ-ಹೆಂಡತಿಯ ನಡುವಿನ ಪ್ರತಿಯೊಂದು ಜಗಳ ಅಥವಾ ಮನಸ್ತಾಪವನ್ನು ಕ್ರಿಮಿನಲ್ ಅಪರಾಧ ಎಂದು ಪರಿಗಣಿಸಲು ಸಾಧ್ಯವಿಲ್ಲ.

ಪ್ರಕರಣದಲ್ಲಿ ವರದಕ್ಷಿಣೆ ಕಿರುಕುಳ ಅಥವಾ ದೈಹಿಕ ದೌರ್ಜನ್ಯಕ್ಕೆ ಸಂಬಂಧಿಸಿದ ಯಾವುದೇ ಸೂಕ್ತ ವೈದ್ಯಕೀಯ ಸಾಕ್ಷ್ಯಾಧಾರಗಳು ಲಭ್ಯವಿಲ್ಲ.

ದಂಪತಿಗಳ ನಡುವಿನ ವೈಯಕ್ತಿಕ ವೈಫಲ್ಯ ಹಾಗೂ ಕೋಪದ ತಾಪತ್ರಯದಿಂದ ಈ ಮಾತುಗಳು ಹೊರಬಂದಿವೆಯೇ ಹೊರತು, ಪತ್ನಿಯನ್ನು ಆತ್ಮಹತ್ಯೆಗೆ ಪ್ರಚೋದಿಸುವ ಅಥವಾ ಆಕೆಗೆ ತೀವ್ರ ಗಾಯಗೊಳಿಸುವ ಉದ್ದೇಶ ಕಂಡುಬಂದಿಲ್ಲ ಎಂದು ತಿಳಿಸಿದ ಹೈಕೋರ್ಟ್, ವಿಚಾರಣಾ ನ್ಯಾಯಾಲಯ ನೀಡಿದ್ದ ಸಮನ್ಸ್ ಹಾಗೂ ಪ್ರಕರಣವನ್ನು ರದ್ದುಪಡಿಸಿದೆ.