ಲಂಡನ್: ಯುಕೆಯ ಪಶ್ಚಿಮ ಲಂಡನ್ನಲ್ಲಿ ‘ನಾವು ಹೆಮ್ಮೆಯಿಂದ ಹಲಾಲ್ ಅಲ್ಲದ ಮಾಂಸವನ್ನು ಮಾತ್ರ ನೀಡುತ್ತೇವೆ’ ಎಂಬ ನೀತಿಯನ್ನು ಘೋಷಿಸಿರುವ ಸಿಖ್ ವ್ಯಕ್ತಿಗೆ ಸೇರಿದ ಭಾರತೀಯ ರೆಸ್ಟೋರೆಂಟ್ ಒಂದರ ಎದುರು ನೂರಾರು ಪ್ರತಿಭಟನಾಕಾರರು ಜಮಾಯಿಸಿ ರೆಸ್ಟೋರೆಂಟ್ ಬಂದ್ ಮಾಡುವಂತೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಹ್ಯಾಮರ್ಸ್ಮಿತ್ ಪ್ರದೇಶದಲ್ಲಿರುವ ‘ಸಿಂಗ್ಸ್ ಡೈನಿಂಗ್’ ರೆಸ್ಟೋರೆಂಟ್ನ ಮಾಲೀಕ ಹರ್ಮನ್ ಸಿಂಗ್ ಕಪೂರ್ ವಿರುದ್ಧ ಈ ಪ್ರತಿಭಟನೆ ನಡೆದಿದೆ.
ರೆಸ್ಟೋರೆಂಟ್ನ ಮಾಲೀಕ ಹರ್ಮನ್ ಸಿಂಗ್ ಕಪೂರ್ ಅವರು ಹಲಾಲ್ ಮಾಂಸವನ್ನು ನೀಡಲು ನಿರಾಕರಿಸಿರುವುದಲ್ಲದೆ, ಮುಸ್ಲಿಮರು ಮತ್ತು ಗಾಜಾ ಸಂಘರ್ಷದ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ವಿವಾದಾತ್ಮಕ ಪೋಸ್ಟ್ಗಳನ್ನು ಹಂಚಿಕೊಂಡಿದ್ದರು. ಇದರಿಂದ ಆಕ್ರೋಶಗೊಂಡ ಪ್ರತಿಭಟನಾಕಾರರು ಪ್ಯಾಲೆಸ್ಟೈನ್ ಧ್ವಜಗಳನ್ನು ಹಿಡಿದು ಘೋಷಣೆಗಳನ್ನು ಕೂಗಿದ್ದಾರೆ.
ಮತ್ತೊಂದೆಡೆ, ತಮಗೆ ಹಾಗೂ ತಮ್ಮ ಕುಟುಂಬಕ್ಕೆ ನೂರಾರು ಜೀವ ಬೆದರಿಕೆಗಳು ಬಂದಿವೆ ಎಂದು ಮಾಲೀಕ ಕಪೂರ್ ಆರೋಪಿಸಿದ್ದಾರೆ. ಹಿರಿಯ ನಟ ಜಾನ್ ಕ್ಲೀಸ್ (John Cleese) ಈ ರೆಸ್ಟೋರೆಂಟ್ ಪರವಾಗಿ ನಿಂತು ಖಾಸಗಿ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಿದ್ದಾರೆ. ಆದರೆ, ಪ್ರತಿಭಟನೆಗೆ ಕೆಲವೇ ಗಂಟೆಗಳ ಮುಂಚೆ ಮೆಟ್ರೋಪಾಲಿಟನ್ ಪೊಲೀಸರು ಹರ್ಮನ್ ಸಿಂಗ್ ಕಪೂರ್ ಅವರನ್ನು ಅತಿರೇಕದ ಚಿತ್ರಗಳನ್ನು ವಿತರಿಸಿದ ಆರೋಪದ ಮೇಲೆ ಬಂಧಿಸಿರುವುದು ಪರಿಸ್ಥಿತಿಯನ್ನು ಮತ್ತಷ್ಟು ಉಲ್ಬಣಗೊಳಿಸಿದೆ.
‘ನಾವು ಹಲಾಲ್ ನೀಡುವುದಿಲ್ಲ’ ಫಲಕ ವಿವಾದ: ರೆಸ್ಟೋರೆಂಟ್ ಮುಂಭಾಗದಲ್ಲಿ ‘Proudly non-halal’ ಎಂದು ಬರೆದು ಹಲಾಲ್ ಮಾಂಸ ಮಾರಾಟಕ್ಕೆ ಸ್ಪಷ್ಟವಾಗಿ ನಿರಾಕರಿಸಿರುವುದು ಈ ವಿವಾದಕ್ಕೆ ಮುಖ್ಯ ಕಾರಣವಾಗಿದೆ.
ಸಾಮಾಜಿಕ ಜಾಲತಾಣ ಪೋಸ್ಟ್ ಹಾಗೂ ಬೆದರಿಕೆ: ಹಂದಿಮಾಂಸ ಹಾಗೂ ಬೇಕಾನ್ ಕುರಿತು ಕಪೂರ್ ಮಾಡಿದ್ದ ಪ್ರಚೋದನಕಾರಿ ಪೋಸ್ಟ್ಗಳು ಭಾರೀ ವಿವಾದಕ್ಕೆ ಕಾರಣವಾಗಿದ್ದು, ತಮಗೆ ಪ್ರಾಣಭಯವಿದೆ ಎಂದು ಮಾಲೀಕ ಆತಂಕ ವ್ಯಕ್ತಪಡಿಸಿದ್ದರು.
ಮಾಲೀಕರ ಬಂಧನ: ಪ್ರತಿಭಟನೆ ನಡೆಯುವ ಕೆಲವೇ ಗಂಟೆಗಳ ಮೊದಲು ಪಶ್ಚಿಮ ಲಂಡನ್ನಲ್ಲಿರುವ ತಮ್ಮ ನಿವಾಸದಲ್ಲಿ ಹರ್ಮನ್ ಸಿಂಗ್ ಕಪೂರ್ ಅವರನ್ನು ಪೊಲೀಸರು ಬಂಧಿಸಿದ್ದು, ಅವರ ಪತ್ನಿ ಖುಷಿ ಒಂಟಿಯಾಗಿ ಪ್ರತಿಭಟನೆಯನ್ನು ಎದುರಿಸಬೇಕಾಗಿ ಬಂದಿದೆ.





Leave a comment