ಮತಾಂತರಕ್ಕೆ ನಿರಾಕರಿಸಿದ 22 ವರ್ಷದ ಹಿಂದೂ ಯುವತಿಯ ಕಾರಿನಲ್ಲೇ ಕೊಂದು ಕಲ್ಲು ಕಟ್ಟಿ ಕಾಲುವೆಗೆ ಎಸೆದ ಕ್ಯಾಬ್ ಚಾಲಕ!

ನವದೆಹಲಿ: ಮತಾಂತರಗೊಳ್ಳಲು ನಿರಾಕರಿಸಿದ ಹಾಗೂ ಬೇರೊಬ್ಬರೊಂದಿಗೆ ಸ್ನೇಹ ಬೆಳೆಸಿದ ಅಸೂಯೆಯಿಂದ 22 ವರ್ಷದ ಹಿಂದೂ ಯುವತಿಯೊಬ್ಬಳನ್ನು ಚಲಿಸುತ್ತಿದ್ದ ಕಾರಿನಲ್ಲೇ ಕತ್ತು ಹಿಸುಕಿ ಕೊಲೆ ಮಾಡಿ, ಮೃತದೇಹ ನೀರಿನಲ್ಲಿ ತೇಲದಂತೆ ಭಾರವಾದ ಕಲ್ಲು ಕಟ್ಟಿ ಕಾಲುವೆಗೆ ಎಸೆದಿರುವ ಆಘಾತಕಾರಿ ಘಟನೆ ದೆಹಲಿಯಲ್ಲಿ ಬೆಳಕಿಗೆ ಬಂದಿದೆ.

ಮೃತ ಯುವತಿಯನ್ನು ಈಶಾನ್ಯ ದೆಹಲಿಯ ಸುಂದರ್ ನಗರಿಯ ನಿವಾಸಿ ಕೋಮಲ್ (22) ಎಂದು ಗುರುತಿಸಲಾಗಿದೆ. ಈಕೆ ತನ್ನ ಅಜ್ಜಿಯೊಂದಿಗೆ ಪಾಲಿಕೆ ಫ್ಲಾಟ್‌ನಲ್ಲಿ ವಾಸವಾಗಿದ್ದು, ಶಹದಾರಾ ಜಿಲ್ಲೆಯಲ್ಲಿ ಸಿವಿಲ್ ಡಿಫೆನ್ಸ್ ವಾಲಂಟಿಯರ್ ಆಗಿ ಸೇವೆ ಸಲ್ಲಿಸುತ್ತಿದ್ದಳು.

ಕ್ಯಾಬ್ ಚಾಲಕ ಮೊಹಮ್ಮದ್ ಆಸಿಫ್ (26) ಎಂಬಾತನೊಂದಿಗೆ ಈಕೆಗೆ ಪರಿಚಯವಾಗಿ, ಇಬ್ಬರೂ ಕೆಲಕಾಲ ಒಡನಾಟದಲ್ಲಿದ್ದರು. ಆರೋಪಿ ಆಸಿಫ್ ನಿರಂತರವಾಗಿ ಇಸ್ಲಾಂ ಧರ್ಮಕ್ಕೆ ಮತಾಂತರಗೊಳ್ಳುವಂತೆ ಬಲವಂತ ಮಾಡುತ್ತಿದ್ದ. ಆದರೆ ಕೋಮಲ್ ಇದಕ್ಕೆ ಕಟುವಾಗಿ ನಿರಾಕರಿಸಿದ್ದಳು. ಇದೇ ವೇಳೆ ಆಕೆ ಮತ್ತೊಬ್ಬ ವ್ಯಕ್ತಿಯೊಂದಿಗೆ ಸ್ನೇಹ ಬೆಳೆಸಿದ್ದನ್ನು ಕಂಡು ತೀವ್ರ ಅಸೂಯೆ ಹಾಗೂ ಆಕ್ರೋಶಗೊಂಡ ಆಸಿಫ್, ಆಕೆಯನ್ನು ಮುಗಿಸಲು ಸಂಚು ರೂಪಿಸಿದ್ದನು.

ಕಾರಿನಲ್ಲೇ ಬರ್ಬರ ಹತ್ಯೆ: 2025ರ ಮಾರ್ಚ್ 12ರಂದು ಮೊಹಮ್ಮದ್ ಆಸಿಫ್ ಹಾಗೂ ಆತನ ಸಹಚರ ಮೊಹಮ್ಮದ್ ಜಾವೇದ್ ಇಬ್ಬರೂ ಸೇರಿ ಕೋಮಲ್ ಅವರನ್ನು ಕಾರಿಗೆ ಹತ್ತಿಸಿಕೊಂಡು, ಚಲಿಸುತ್ತಿದ್ದ ಕಾರಿನಲ್ಲೇ ಕತ್ತು ಹಿಸುಕಿ ಉಸಿರುಗಟ್ಟಿಸಿ ಕೊಲೆ ಮಾಡಿದ್ದಾರೆ.

ಸಾಕ್ಷ್ಯ ನಾಶಕ್ಕೆ ಯತ್ನ: ಕೃತ್ಯದ ಸಾಕ್ಷ್ಯ ನಾಶಪಡಿಸಲು ಮೃತದೇಹದ ಕೈ-ಕಾಲುಗಳನ್ನು ಹಗ್ಗದಿಂದ ಬಿಗಿದು, ನೀರಿನಲ್ಲಿ ಮೇಲಕ್ಕೆ ತೇಲಿ ಬಾರದಂತೆ ಸೊಂಟಕ್ಕೆ ಭಾರವಾದ ಕಲ್ಲೊಂದನ್ನು ಕಟ್ಟಿದ್ದಾರೆ. ನಂತರ ಘಟನಾ ಸ್ಥಳದಿಂದ ಸುಮಾರು 44 ಕಿಲೋಮೀಟರ್ ದೂರ ಸಾಗಿ, ಗುರುಗ್ರಾಮ್ ಗಡಿ ಸಮೀಪದ ನಜಾಫ್‌ಗಢ್ ಕಾಲುವೆಗೆ ಎಸೆದು ಪರಾರಿಯಾಗಿದ್ದರು.

ಶವ ಪತ್ತೆ ಹಾಗೂ ಆರೋಪಿಗಳ ಬಂಧನ: ಕಾಣೆಯಾಗಿದ್ದ ಕೋಮಲ್ ಹುಡುಕಾಟ ನಡೆಸುತ್ತಿದ್ದ ಪೊಲೀಸರಿಗೆ ಮಾರ್ಚ್ 17, 2025ರಂದು ನಜಾಫ್‌ಗಢ್ ಕಾಲುವೆಯಲ್ಲಿ ಆಕೆಯ ಮೃತದೇಹ ಕೊಳೆತ ಸ್ಥಿತಿಯಲ್ಲಿ ಪತ್ತೆಯಾಗಿದೆ.

ಪ್ರಕರಣ ದಾಖಲಿಸಿಕೊಂಡು ತನಿಖೆ ಚುರುಕುಗೊಳಿಸಿದ ದೆಹಲಿ ಪೊಲೀಸರು, ತಾಂತ್ರಿಕ ಸಾಕ್ಷ್ಯಾಧಾರಗಳ ಆಧಾರದ ಮೇಲೆ ಇಬ್ಬರೂ ಆರೋಪಿಗಳಾದ ಮೊಹಮ್ಮದ್ ಆಸಿಫ್ ಮತ್ತು ಮೊಹಮ್ಮದ್ ಜಾವೇದ್‌ನನ್ನು ಬಂಧಿಸಿ ಜೈಲಿಗಟ್ಟಿದ್ದಾರೆ ಎಂದು ‘ದೈನಿಕ್ ಜಾಗರಣ್’ ವರದಿ ಮಾಡಿದೆ.