ರಾಮನ ವನವಾಸವೂ 14 ವರ್ಷ, ನನ್ನ ಕಷ್ಟ ಎಂದಿಗೂ ಕೊನೆ? ಪವನ್ ಕಲ್ಯಾಣ್ ಜೊತೆಗಿನ ವಿಚ್ಛೇದನ ಬಳಿಕ ಟ್ರೋಲ್‌ಗಳ ವಿರುದ್ಧ ರೇಣು ದೇಸಾಯಿ ಆಕ್ರೋಶ!

ಹೈದರಾಬಾದ್: ಆಂಧ್ರಪ್ರದೇಶದ ಉಪಮುಖ್ಯಮಂತ್ರಿ ಪವನ್ ಕಲ್ಯಾಣ್ ಅವರ ಮಾಜಿ ಪತ್ನಿ, ನಟಿ ಹಾಗೂ ನಿರ್ದೇಶಕಿ ರೇಣು ದೇಸಾಯಿ ತಮ್ಮ ವೈಯಕ್ತಿಕ ಜೀವನದ ಬಗ್ಗೆ ನಡೆಯುತ್ತಿರುವ ಸಾರ್ವಜನಿಕ ಟ್ರೋಲ್ ಹಾಗೂ ನಿರಂತರ ಟೀಕೆಗಳ ವಿರುದ್ಧ ಬೇಸರ ವ್ಯಕ್ತಪಡಿಸಿದ್ದಾರೆ.

2012ರಲ್ಲಿ ಪವನ್ ಕಲ್ಯಾಣ್ ಅವರಿಂದ ವಿಚ್ಛೇದನ ಪಡೆದು 14 ವರ್ಷಗಳೇ ಕಳೆದಿದ್ದರೂ, ಇಂದಿಗೂ ಸಮಾಜದಲ್ಲಿ ತಮ್ಮ ಗುರುತು ಕೇವಲ ಪವನ್ ಕಲ್ಯಾಣ್ ಅವರ ಮಾಜಿ ಪತ್ನಿ ಎಂಬ ಹಣೆಪಟ್ಟಿಗಷ್ಟೇ ಸೀಮಿತವಾಗಿದೆ ಎಂದು ಅವರು ಅಳಲು ತೋಡಿಕೊಂಡಿದ್ದಾರೆ.

ಇತ್ತೀಚಿನ ಪಾಡ್‌ಕಾಸ್ಟ್ ಸಂದರ್ಶನದಲ್ಲಿ ಮಾತನಾಡಿದ ಅವರು, “ಶ್ರೀರಾಮಚಂದ್ರನ ವನವಾಸ ಕೂಡ 14 ವರ್ಷಗಳಷ್ಟೇ ಇತ್ತು. ಆದರೆ ನನ್ನ ಈ ವನವಾಸ ಯಾವಾಗ ಕೊನೆಗೊಳ್ಳುತ್ತದೆ?” ಎಂದು ಪ್ರಶ್ನಿಸಿದ್ದಾರೆ. ತೆಲುಗು ಪ್ರೇಕ್ಷಕರು 1999ರಲ್ಲಿ ‘ಬದ್ರಿ’ ಚಿತ್ರಕ್ಕಾಗಿ ಹೈದರಾಬಾದ್‌ಗೆ ಬರುವವರೆಗೂ ತನಗೆ ಯಾವುದೇ ಅಸ್ತಿತ್ವವಿರಲಿಲ್ಲ ಎಂಬಂತೆ ನೋಡುತ್ತಾರೆ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.

ವಿಚ್ಛೇದನದ ಬಳಿಕವೂ ತಾವು ಮರಾಠಿ ಚಿತ್ರ ನಿರ್ಮಾಣ, ನಿರ್ದೇಶನ, ನಟನೆ, ಕವನ ಸಂಕಲನ ರಚನೆ ಹಾಗೂ ಪ್ರಾಣಿ ಕಲ್ಯಾಣ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದ್ದರೂ ಸೋಷಿಯಲ್ ಮೀಡಿಯಾದಲ್ಲಿ ಅನಗತ್ಯವಾಗಿ ಟ್ರೋಲ್ ಮಾಡಲಾಗುತ್ತಿದೆ ಎಂದು ರೇಣು ದೇಸಾಯಿ ಅಳಲು ತೋಡಿಕೊಂಡಿದ್ದಾರೆ.

ವೈಯಕ್ತಿಕ ಗುರುತಿನ ಅಳಲು: ವಿಚ್ಛೇದನವಾಗಿ 14 ವರ್ಷ ಕಳೆದರೂ ಸಾರ್ವಜನಿಕ ವಲಯದಲ್ಲಿ ತನ್ನದೇ ಆದ ಸ್ವಂತ ಗುರುತು ಸಿಗದೆ, ನಿರಂತರವಾಗಿ ಮಾಜಿ ಪತಿಯ ಹೆಸರನ್ನೇ ತಳಕು ಹಾಕಿ ಟೀಕಿಸುತ್ತಿರುವುದಕ್ಕೆ ಬೇಸರ ವ್ಯಕ್ತಪಡಿಸಿದ್ದಾರೆ.

ಸ್ವಯಂ ಸಾಧನೆಗಳು: ಚಿತ್ರರಂಗದಲ್ಲಿ ನಿರ್ದೇಶಕಿ, ನಿರ್ಮಾಪಕಿಯಾಗಿ ಯಶಸ್ಸು ಸಾಧಿಸಿರುವುದಲ್ಲದೆ, ನಟಿ ಮತ್ತು ಬೀದಿ ನಾಯಿಗಳ ರಕ್ಷಣೆಯಂತಹ ಸಮಾಜಮುಖಿ ಕರ ಸೇವೆಗಳಲ್ಲಿ ನಿರತರಾಗಿರುವುದಾಗಿ ಅವರು ತಿಳಿಸಿದ್ದಾರೆ.

ಸಾಮಾಜಿಕ ಜಾಲತಾಣಗಳ ಟ್ರೋಲ್: ಯಾವುದೇ ವೈಯಕ್ತಿಕ ವಿಚಾರಗಳಿಲ್ಲದಿದ್ದರೂ ಅನಗತ್ಯವಾಗಿ ನಿಂದನೆಗೆ ಗುರಿಯಾಗುತ್ತಿದ್ದು, ರಾಮಯಣದ ವನವಾಸದೊಂದಿಗೆ ತಮ್ಮ ಪರಿಸ್ಥಿತಿಯನ್ನು ಹೋಲಿಸಿಕೊಂಡಿದ್ದಾರೆ.

ಪವನ್ ಕಲ್ಯಾಣ್ ಮತ್ತು ರೇಣು ದೇಸಾಯಿ ದಂಪತಿಗೆ ಅಕಿರಾ ನಂದನ್ ಹಾಗೂ ಆದ್ಯಾ ಎಂಬ ಇಬ್ಬರು ಮಕ್ಕಳಿದ್ದು, ವಿಚ್ಛೇದನದ ಬಳಿಕ ರೇಣು ದೇಸಾಯಿ ತಮ್ಮದೇ ಆದ ಸ್ವತಂತ್ರ ವೃತ್ತಿಜೀವನ ಹಾಗೂ ಸಮಾಜಸೇವೆಯಲ್ಲಿ ಮುಂದುವರಿದಿದ್ದಾರೆ.