3 ಕೋಟಿ ರೂ. ಡಿಜಿಟಲ್ ಅರೆಸ್ಟ್ ಹಗರಣ: ಸೈಬರ್ ವಂಚಕರಿಂದ ವೃದ್ದೆ ರಕ್ಷಿಸಿದ್ದೇಗೆ ಸೈಬರ್ ಪೊಲೀಸ್?

ಮುಂಬೈ / ನವದೆಹಲಿ: ಮಹಾರಾಷ್ಟ್ರದಲ್ಲಿ ನಡೆದ 3 ಕೋಟಿ ರೂಪಾಯಿ ಮೌಲ್ಯದ ‘ಡಿಜಿಟಲ್ ಅರೆಸ್ಟ್’  ಸೈಬರ್ ವಂಚನೆ ಪ್ರಕರಣದ ತನಿಖೆ ನಡೆಸುತ್ತಿದ್ದ ಮಹಾರಾಷ್ಟ್ರ ಸೈಬರ್ ಕ್ರೈಮ್ ತಂಡವು, ದೆಹಲಿಯ ವೃದ್ಧೆಯೊಬ್ಬರನ್ನು ಮತ್ತೊಂದು ಭಾರಿ ಹಣಕಾಸು ವಂಚನೆಯಿಂದ ಸಮಯೋಚಿತವಾಗಿ ರಕ್ಷಿಸಿದೆ.

ಛತ್ರಪತಿ ಸಂಭಾಜಿನಗರದ (ಔರಂಗಾಬಾದ್) 74 ವರ್ಷದ ವೃದ್ಧೆಯೊಬ್ಬರಿಗೆ ಸೈಬರ್ ವಂಚಕರು ಡಿಜಿಟಲ್ ಅರೆಸ್ಟ್ ಬೆದರಿಕೆ ಹಾಕಿ ಸುಮಾರು 3 ಕೋಟಿ ರೂಪಾಯಿ ದೋಚಿದ್ದರು. ಈ ಕುರಿತು ತನಿಖೆ ನಡೆಸುತ್ತಿದ್ದ ಮಹಾರಾಷ್ಟ್ರ ಸೈಬರ್ ತಾಂತ್ರಿಕ ತಂಡವು ಹಣದ ವಹಿವಾಟಿನ ಹಾದಿಯನ್ನು ಪರಿಶೀಲಿಸುತ್ತಿದ್ದಾಗ, ಶಂಕಿತ ‘ಮ್ಯೂಲ್’ (Mule) ಬ್ಯಾಂಕ್ ಖಾತೆಯೊಂದಕ್ಕೆ ಯುಸಿಒ (UCO) ಬ್ಯಾಂಕ್ ಮೂಲಕ 14 ಲಕ್ಷ ರೂಪಾಯಿ ಆರ್‌ಟಿಜಿಎಸ್ (RTGS) ವರ್ಗಾವಣೆಯಾಗಿರುವುದು ಕಂಡುಬಂದಿದೆ.

ಉಪಾಧಿಯಿಲ್ಲದೆ ತಕ್ಷಣ ಕಾರ್ಯಪ್ರವೃತ್ತರಾದ ಅಧಿಕಾರಿಗಳು, ಬ್ಯಾಂಕ್ ಮೂಲಕ ಕೆವೈಸಿ (KYC) ವಿವರಗಳನ್ನು ಪಡೆದುಕೊಂಡು ಪರಿಶೀಲಿಸಿದಾಗ, ಹಣ ಕಳುಹಿಸಿದವರು ನವದೆಹಲಿಯ ನಿವಾಸಿ ವೃದ್ಧೆ ಎಂಬುದು ತಿಳಿದುಬಂದಿದೆ. ಅವರು ಈಗಾಗಲೇ ವಂಚಕರ ಜಾಲಕ್ಕೆ ಸಿಲುಕಿ 27 ಲಕ್ಷ ರೂಪಾಯಿ ವರ್ಗಾಯಿಸಿದ್ದು, ಇನ್ನು ಹೆಚ್ಚಿನ ಹಣ ರವಾನಿಸುವ ಅಪಾಯದಲ್ಲಿದ್ದರು.

ಮಹಾರಾಷ್ಟ್ರ ಸೈಬರ್ ತಂಡವು ಅಕ್ಟೋಬರ್ 13 ರಂದು ದೆಹಲಿ ಪೊಲೀಸರಿಗೆ ತಾಂತ್ರಿಕ ಮಾಹಿತಿ ಹಾಗೂ ವಹಿವಾಟಿನ ವಿವರಗಳನ್ನು ನೀಡಿ ತಕ್ಷಣದ ಕಾರ್ಯಾಚರಣೆಗೆ ಮನವಿ ಮಾಡಿತು. ದೆಹಲಿ ಪೊಲೀಸರು ತಕ್ಷಣವೇ ವೃದ್ಧೆಯ ಮನೆಗೆ ತೆರಳಿ ಅವರನ್ನು ವಂಚಕರಿಂದ ರಕ್ಷಿಸಿ, ಅವರ ಉಳಿದ ಹಣ ಕೈತಪ್ಪಿ ಹೋಗದಂತೆ ತಡೆದಿದ್ದಾರೆ. ಈ ಸಂಬಂಧ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ.

ಡಿಜಿಟಲ್ ಅರೆಸ್ಟ್ ಜಾಗೃತಿ:

ಭಾರತದಲ್ಲಿ ‘ಡಿಜಿಟಲ್ ಅರೆಸ್ಟ್’ ಎಂಬ ಯಾವುದೇ ಕಾನೂನುಬದ್ಧ ಪ್ರಕ್ರಿಯೆಯಿಲ್ಲ. ಪೊಲೀಸ್ ಅಥವಾ ಯಾವುದೇ ಸರ್ಕಾರಿ ತನಿಖಾ ಸಂಸ್ಥೆಗಳು ವಿಡಿಯೋ ಕಾಲ್ ಮೂಲಕ ಬಂಧಿಸುವುದಿಲ್ಲ ಅಥವಾ ಹಣಕ್ಕೆ ಬೇಡಿಕೆ ಇಡುವುದಿಲ್ಲ ಎಂದು ಮಹಾರಾಷ್ಟ್ರ ಸೈಬರ್ ಪೊಲೀಸರು ಎಚ್ಚರಿಸಿದ್ದಾರೆ. ಇಂತಹ ಬೆದರಿಕೆ ಕರೆಗಳು ಬಂದಲ್ಲಿ ಸಾರ್ವಜನಿಕರು ಭಯಪಡದೆ, ತಕ್ಷಣವೇ ರಾಷ್ಟ್ರೀಯ ಸೈಬರ್ ಕ್ರೈಮ್ ಹೆಲ್ಪ್‌ಲೈನ್ 1930 ಗೆ ಕರೆ ಮಾಡಲು ಕೋರಲಾಗಿದೆ.