ಪತಿಯನ್ನು ಉಸಿರುಗಟ್ಟಿಸಿ ಕೊಂದು ಹಾವಿನ ಕಡಿತವೆಂದು ಬಿಂಬಿಸಲು ಯತ್ನಿಸಿದ್ದ ಪತ್ನಿ ಹಾಗೂ ಪ್ರಿಯಕರ ದೋಷಿ: ಅಕ್ಟೋಬರ್ 16ಕ್ಕೆ ಶಿಕ್ಷೆ ಪ್ರಕಟ

ಮೀರತ್: ಪತಿಯನ್ನು ಅತ್ಯಂತ ಭೀಕರವಾಗಿ ಉಸಿರುಗಟ್ಟಿಸಿ ಕೊಲೆ ಮಾಡಿ, ಬಳಿಕ ಅದನ್ನು ಹಾವಿನ ಕಡಿತದಿಂದ ಸಂಭವಿಸಿದ ಸಾವು ಎಂದು ಬಿಂಬಿಸಲು ಯತ್ನಿಸಿದ್ದ ಪತ್ನಿ ಹಾಗೂ ಆಕೆಯ ಪ್ರಿಯಕರನನ್ನು ಮೀರತ್ ಜಿಲ್ಲಾ ನ್ಯಾಯಾಲಯವು ಅಪರಾಧಿಗಳೆಂದು ಘೋಷಿಸಿದೆ. ತನಿಖಾಧಿಕಾರಿಗಳು ಸಲ್ಲಿಸಿದ ವಿಧಿವಿಜ್ಞಾನ (ಫೋರೆನ್ಸಿಕ್) ವರದಿಗಳು, ಪೋಸ್ಟ್‌ಮಾರ್ಟಮ್ ವರದಿ ಹಾಗೂ ಮೊಬೈಲ್ ಕಾಲ್ ರೆಕಾರ್ಡ್‌ಗಳ ಆಧಾರದ ಮೇಲೆ ನ್ಯಾಯಾಲಯವು ಈ ತೀರ್ಪು ನೀಡಿದೆ.

ಉತ್ತರ ಪ್ರದೇಶದ ಮೀರತ್‌ನ ಅಕ್ಬರ್‌ಪುರ್ ಸಾದತ್ ಗ್ರಾಮದಲ್ಲಿ 2025 ರ ಏಪ್ರಿಲ್ 12 ರಂದು ಅಮಿತ್ ಕಶ್ಯಪ್ (ಮಿಕ್ಕಿ) ಎಂಬ ವ್ಯಕ್ತಿ ತಮ್ಮ ಮನೆಯಲ್ಲಿ ಶವವಾಗಿ ಪತ್ತೆಯಾಗಿದ್ದರು. ಘಟನಾ ಸ್ಥಳಕ್ಕೆ ಬಂದ ಕುಟುಂಬಸ್ಥರು ಹಾಗೂ ಸಂಬಂಧಿಕರು, ಅಮಿತ್ ಅವರ ಮೃತದೇಹದ ಬಳಿ ಜೀವಂತ ಹಾವೊಂದನ್ನು ಕಂಡು, ಇದು ಹಾವಿನ ಕಡಿತದಿಂದ ಸಂಭವಿಸಿದ ಸಾವು ಎಂದು ಭಾವಿಸಿದ್ದರು. ಹಾವನ್ನು ತಕ್ಷಣವೇ ಹಿಡಿದು ಡಬ್ಬಿಯಲ್ಲಿ ಬಂಧಿಸಿಡಲಾಗಿತ್ತು.

ಕೊಲೆ ರಹಸ್ಯ ಬಯಲಾಗಿದ್ದು ಹೇಗೆ?

ಘಟನೆಯ ನಂತರ ಸಾವಿನ ಬಗ್ಗೆ ಅನುಮಾನ ವ್ಯಕ್ತವಾದ ಹಿನ್ನೆಲೆಯಲ್ಲಿ ಹಾವನ್ನು ಪರಿಶೀಲಿಸಲು ಹಾವಾಡಿಗರನ್ನು ಕರೆಸಲಾಗಿತ್ತು. ಪರಿಶೀಲನೆ ನಡೆಸಿದ ಹಾವಾಡಿಗರು, ಹಾವಿನ ವಿಷದ ಚೀಲವನ್ನು (Venom Sac) ಈಗಾಗಲೇ ತೆಗೆದುಹಾಕಲಾಗಿದೆ, ಹೀಗಾಗಿ ಈ ಹಾವು ಕಚ್ಚಿದರೆ ಮನುಷ್ಯ ಸಾಯಲು ಸಾಧ್ಯವೇ ಇಲ್ಲ ಎಂದು ಸ್ಪಷ್ಟಪಡಿಸಿದರು. ಇದೇ ವೇಳೆ, ಅಮಿತ್ ಅವರ ಕುತ್ತಿಗೆಯ ಮೇಲೆ ಗಾಯದ ಗುರುತುಗಳು ಹಾಗೂ ಉಗುರಿನ ಗೀಚಿದ ಗುರುತುಗಳು ಪತ್ತೆಯಾಗಿದ್ದವು.

ಪೋಲಿಸ್ ತನಿಖೆಯ ವೇಳೆ ಅಮಿತ್ ಅವರ ಪತ್ನಿ ರವಿತಾ ಹಾಗೂ ನೆರೆಮನೆಯ ಪ್ರಿಯಕರ ಅಮರ್‌ದೀಪ್ ಸೇರಿ ಈ ಕೃತ್ಯ ಎಸಗಿರುವುದು ಕಂಡುಬಂತು. ಅಮರ್‌ದೀಪ್ ಪೂಜಾ ಕಾರ್ಯಕ್ರಮದ ನೆಪವೊಡ್ಡಿ ಹಾವಾಡಿಗನೊಬ್ಬನಿಂದ 1,000 ರೂಪಾಯಿಗೆ ಈ ಹಾವನ್ನು ಖರೀದಿಸಿ ತಂದಿದ್ದನು.

ಪೊಲೀಸರು ನ್ಯಾಯಾಲಯಕ್ಕೆ 500ಕ್ಕೂ ಹೆಚ್ಚು ಪುಟಗಳ ದೋಷಾರೋಪಣೆ ಪಟ್ಟಿಯನ್ನು ಸಲ್ಲಿಸಿದ್ದು, 12ಕ್ಕೂ ಹೆಚ್ಚು ಸಾಕ್ಷಿಗಳನ್ನು ವಿಚಾರಣೆಗೆ ಒಳಪಡಿಸಲಾಯಿತು. ಕೊಲೆಯಾದ ಬಳಿಕವೂ ರವಿತಾ ಮತ್ತು ಅಮರ್‌ದೀಪ್ ಕೇವಲ ನಾಲ್ಕು ದಿನಗಳಲ್ಲಿ 70ಕ್ಕೂ ಹೆಚ್ಚು ಬಾರಿ ಫೋನ್‌ನಲ್ಲಿ ಮಾತನಾಡಿದ್ದರು. ಅಮರ್‌ದೀಪ್ ಬೇರೊಬ್ಬರ ಹೆಸರಿನಲ್ಲಿದ್ದ (ಸೋನು ಎಂಬ ವ್ಯಕ್ತಿಯ) ಸಿಮ್ ಕಾರ್ಡ್ ಬಳಸಿ ರವಿತಾ ಜೊತೆ 500ಕ್ಕೂ ಹೆಚ್ಚು ಬಾರಿ ಸಂಪರ್ಕದಲ್ಲಿದ್ದುದು ತನಿಖೆಯಲ್ಲಿ ಸಾಬೀತಾಯಿತು.

ವಿಚಾರಣೆ ನಡೆಸಿದ ಮೀರತ್‌ನ ಹೆಚ್ಚುವರಿ ಜಿಲ್ಲಾ ನ್ಯಾಯಾಧೀಶ ಜೈವೀರ್ ಸಿಂಗ್ ನಾಗರ್ ಅವರ ಪೀಠವು ರವಿತಾ ಹಾಗೂ ಅಮರ್‌ದೀಪ್ ಇಬ್ಬರನ್ನೂ ಕೊಲೆಗಾರರು ಎಂದು ತೀರ್ಪು ನೀಡಿದೆ. ಅಪರಾಧಿಗಳಿಗೆ ನೀಡಲಾಗುವ ಶಿಕ್ಷೆಯ ಪ್ರಮಾಣವನ್ನು ನ್ಯಾಯಾಲಯವು ಅಕ್ಟೋಬರ್ 16, 2026 ರಂದು ಪ್ರಕಟಿಸಲಿದೆ.