ಸಚಿವ ಮಲ್ಲಿಕಾರ್ಜುನ್ ಬಳಿ ಇದೆ ಅಪಾರ “ಲಕ್ಷ್ಮೀ”: ಸ್ಥಳೀಯ ಬಿಜೆಪಿಗರ ‘ಹೊಂದಾಣಿಕೆ ರಾಜಕಾರಣ’ ಬಿಚ್ಚಿಟ್ಟು ಬಸನಗೌಡ ಪಾಟೀಲ್ ಯತ್ನಾಳ್ ಸ್ಫೋಟಕ ಹೇಳಿಕೆ!

ದಾವಣಗೆರೆ: ರಾಜ್ಯದ ಗಣಿ ಮತ್ತು ಭೂವಿಜ್ಞಾನ ಹಾಗೂ ತೋಟಗಾರಿಕೆ ಸಚಿವ ಎಸ್. ಎಸ್. ಮಲ್ಲಿಕಾರ್ಜುನ್ ಮತ್ತು ಅವರ ಕುಟುಂಬದ ವಿರುದ್ಧ ದಾವಣಗೆರೆಯಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಪ್ರಖರ ರಾಜಕಾರಣಿ ಹಾಗೂ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್  ತೀವ್ರ ವಾಗ್ದಾಳಿ ನಡೆಸಿದ್ದಾರೆ.

ದಾವಣಗೆರೆಯ ರಾಜಕೀಯ ಚಿತ್ರಣ, ಹೊಂದಾಣಿಕೆ ರಾಜಕಾರಣ ಹಾಗೂ ಕಾಂಗ್ರೆಸ್‌ನ ಆಡಳಿತ ವೈಖರಿಯನ್ನು ಕಟುವಾಗಿ ವಿಮರ್ಶಿಸಿದ ಅವರು, ಹಲವು ವಿವಾದಾತ್ಮಕ ಹೇಳಿಕೆಗಳನ್ನು ನೀಡಿದ್ದಾರೆ.

ಸಂಪನ್ಮೂಲ ಮತ್ತು ರಾಜಕೀಯ ಪ್ರಭಾವದ ಆರೋಪ:

ಸಚಿವ ಎಸ್. ಎಸ್. ಮಲ್ಲಿಕಾರ್ಜುನ್ ಅಪಾರ ಆರ್ಥಿಕ ಸಂಪನ್ಮೂಲ ಹೊಂದಿದ್ದು, ರಾಜಕೀಯವಾಗಿ ಅತ್ಯಂತ ಶಕ್ತಿಶಾಲಿಯಾಗಿದ್ದಾರೆ. ತಮ್ಮ ಪತ್ನಿಯನ್ನು ಲೋಕಸಭಾ ಚುನಾವಣೆಗೆ ನಿಲ್ಲಿಸಿ, ಪುತ್ರನನ್ನು ಉಪಚುನಾವಣೆಯಲ್ಲಿ ಸ್ಪರ್ಧಿಸಿ ಗೆಲ್ಲಿಸಿಕೊಂಡಿದ್ದಾರೆ. ಹಣದ ಬಲದಿಂದ ಯಾರ ಬಾಯಿಯನ್ನಾದರೂ ಮುಚ್ಚಿಸುವ ಸಾಮರ್ಥ್ಯ ಅವರಲ್ಲಿದೆ ಎಂದು ಯತ್ನಾಳ್ ಪ್ರತಿಪಾದಿಸಿದರು.

ಸ್ಥಳೀಯ ಬಿಜೆಪಿಗರ ಹೊಂದಾಣಿಕೆ ರಾಜಕಾರಣ:

ದಾವಣಗೆರೆಯಲ್ಲಿ ‘ನಾವು ಬಿಜೆಪಿಗರು’ ಎಂದು ಹೇಳಿಕೊಳ್ಳುವ ಕೆಲ ಸ್ಥಳೀಯ ನಾಯಕರು ಶಾಮನೂರು ಶಿವಶಂಕರಪ್ಪ ಅವರ ಕುಟುಂಬಕ್ಕೆ ಪರೋಕ್ಷವಾಗಿ ಬೆಂಬಲ ನೀಡಿ, ಸಂಪೂರ್ಣ ಹೊಂದಾಣಿಕೆ ರಾಜಕಾರಣ (ಧಾರೆ ಎರೆದಿದ್ದಾರೆ) ಮಾಡುತ್ತಿದ್ದಾರೆ ಎಂದು ಯತ್ನಾಳ್ ಬಹಿರಂಗವಾಗಿ ಕಿಡಿಕಾರಿದರು.

ಶಿವಗಂಗಾ ಬಸವರಾಜ್ ವಿಚಾರ ಹಾಗೂ ಹಿಂದುತ್ವದ ಹೋರಾಟ:

ಶಾಸಕ ಶಿವಗಂಗಾ ಬಸವರಾಜ್ ಅವರು ಶಾಮನೂರು ಮನೆತನದವರಿಂದ ಹಣ ಪಡೆದಿದ್ದಾರೆ ಎಂಬ ಆರೋಪಗಳ ಕುರಿತು ಪ್ರಸ್ತಾಪಿಸಿದ ಯತ್ನಾಳ್, “ನಾವು ಯಾರ ಮುಲಾಜಿನಲ್ಲೂ ಇಲ್ಲ. ದಾವಣಗೆರೆಯಲ್ಲಿ ಹಿಂದುತ್ವದ ಪರವಾಗಿ ಹೋರಾಟ ಮಾಡುವ ಶಕ್ತಿ ಇದೆ. ಧರ್ಮಕ್ಕಾಗಿ ಹೋರಾಟ ಮಾಡುವವರು ಶಾಮನೂರು ಅವರ ಮನೆಗೆ ಹೋಗುವುದಿಲ್ಲ” ಎಂದರು.

ಧಾರ್ಮಿಕ ಮೆರವಣಿಗೆಯ ವಿವಾದ:

ಗಣೇಶ ವಿಸರ್ಜನೆ ಮೆರವಣಿಗೆಗಳು ಮಸೀದಿಗಳ ಮುಂಭಾಗ ಹೋಗಬಾರದು ಎಂಬ ನಿರ್ಬಂಧಗಳಿಗೆ ಆಕ್ರೋಶ ವ್ಯಕ್ತಪಡಿಸಿದ ಅವರು, “ಅಹಿಂದ ನಾಯಕರ ಆಡಳಿತದಲ್ಲೂ ಹಿಂದುತ್ವದ ಮೇಲಿನ ತಾರತಮ್ಯ ಮುಂದುವರಿದಿದೆ. ಮುಸ್ಲಿಂ ಸಮುದಾಯದವರೂ ದೇವಸ್ಥಾನಗಳ ಮುಂಭಾಗ ಬರಬಾರದು ಅಲ್ಲವೇ?” ಎಂದು ಸವಾಲೆಸೆದರು.

ಕಾಂಗ್ರೆಸ್ ಹೈಕಮಾಂಡ್ ಹಾಗೂ 150 ಕೋಟಿ ರೂ. ಆರೋಪ:

ಕಾಂಗ್ರೆಸ್ ಶಾಸಕರೇ ನೀಡಿರುವ ಹೇಳಿಕೆಗಳನ್ನು ಉಲ್ಲೇಖಿಸಿದ ಯತ್ನಾಳ್, “ಕಾಂಗ್ರೆಸ್‌ನಲ್ಲಿ 150 ಕೋಟಿ ರೂಪಾಯಿ ಕೊಟ್ಟು ಸಚಿವರಾಗುವ ಪರಿಸ್ಥಿತಿ ಬಂದಿದೆ. ಕಾಂಗ್ರೆಸ್ ಹೈಕಮಾಂಡ್ ಸಂಪೂರ್ಣವಾಗಿ ಶಾಮನೂರು ಅವರ ಮನೆಯಲ್ಲೇ ಮಲಗಿದೆ” ಎಂದು ಆರೋಪಿಸಿದರು.