ಬೆಂಗಳೂರು, ಹೈದರಾಬಾದ್, ತೆಲಂಗಾಣ, ಮುಂಬೈನಲ್ಲಿ ಯಶ್ ಅಭಿನಯದ “ಟಾಕ್ಸಿಕ್” ಉನ್ಮಾದ: ಮುಂಬೈನಲ್ಲಿ ಬೆಳಗಿನ ಜಾವ 6 ಗಂಟೆಗೆ ಶೋ, ₹2,250ಗೇರಿದ ಟಿಕೆಟ್ ದರ!

ಮುಂಬೈ/ಬೆಂಗಳೂರು: ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹುನಿರೀಕ್ಷಿತ ‘ಟಾಕ್ಸಿಕ್: ಎ ಫೇರಿಟೇಲ್ ಫಾರ್ ಗ್ರೋನ್-ಅಪ್ಸ್’ ಸಿನಿಮಾ ಬಿಡುಗಡೆಗೆ ಇನ್ನು ಕೇವಲ ಎರಡು ದಿನಗಳು ಬಾಕಿ ಇದ್ದು, ದೇಶಾದ್ಯಂತ ಈಗಲೇ ‘ಟಾಕ್ಸಿಕ್’ ಕ್ರೇಜ್ ಮುಗಿಲು ಮುಟ್ಟಿದೆ.

ಆಗಸ್ಟ್ 26ರಂದು ಜಾಗತಿಕವಾಗಿ ಸಿನಿಮಾ ತೆರೆಗೆ ಬರಲಿದ್ದು, ಮುಂಬೈ ಮತ್ತು ಬೆಂಗಳೂರಿನಂತಹ ಪ್ರಮುಖ ನಗರಗಳ ಚಿತ್ರಮಂದಿರಗಳಲ್ಲಿ ಪ್ರೇಕ್ಷಕರ ಒತ್ತಾಯದ ಮೇರೆಗೆ ವಿಶೇಷ ಪ್ರದರ್ಶನಗಳನ್ನು ಆಯೋಜಿಸಲಾಗಿದೆ.

ಮುಂಬೈನ ಪ್ರಮುಖ ಮಲ್ಟಿಪ್ಲೆಕ್ಸ್‌ಗಳಲ್ಲಿ ಬೆಳಗಿನ ಜಾವ 6 ಗಂಟೆ ಹಾಗೂ 7 ಗಂಟೆಗೆ ಮೊದಲ ಶೋಗಳನ್ನು ಕಾಯ್ದಿರಿಸಲಾಗಿದೆ. ಅಷ್ಟೇ ಅಲ್ಲದೆ, ರಾತ್ರಿ 11:45ರ ಕೊನೆಯ ಶೋಗಳು ಮುಂಜಾನೆ 3 ಗಂಟೆಯವರೆಗೆ ನಡೆಯಲಿವೆ.

ಇನ್ನು ಟಿಕೆಟ್ ದರದಲ್ಲೂ ಸಿನಿಮಾ ಹೊಸ ದಾಖಲೆ ಬರೆದಿದೆ. ಮುಂಬೈನ ಜಿಯೋ ವರ್ಲ್ಡ್ ಡ್ರೈವ್‌ನಲ್ಲಿ ಟಾಕ್ಸಿಕ್ ಸಿನಿಮಾದ ಗರಿಷ್ಠ ಟಿಕೆಟ್ ಬೆಲೆ ಭಾರಿ ತೆರಿಗೆಯನ್ನೂ ಸೇರಿ ಭರ್ಜರಿ ₹2,250 ತಲುಪಿದೆ. ಇತ್ತ ಬೆಂಗಳೂರಿನ ಫೋರಂ ರೆಕ್ಸ್ ವಾಕ್‌ನಲ್ಲಿ ₹2,181 ವರೆಗೆ ಟಿಕೆಟ್ ದರ ನಿಗದಿಯಾಗಿದೆ. ‘ಕೆಜಿಎಫ್ 2’ ಬಳಿಕ ಯಶ್ ನಟಿಸಿರುವ ಈ ಬಿಗ್ ಬಜೆಟ್ ಚಿತ್ರವನ್ನು ಗೀತು ಮೋಹನ್‌ದಾಸ್ ನಿರ್ದೇಶಿಸಿದ್ದು, ನಯನತಾರಾ, ಕಿಯಾರಾ ಅಡ್ವಾಣಿ, ಹುಮಾ ಖುರೇಷಿ ಸೇರಿದಂತೆ ದೊಡ್ಡ ತಾರಾಗಣವೇ ಸಿನಿಮಾದಲ್ಲಿದೆ.