ದೆಹಲಿಯಿಂದ ಕೇರಳಕ್ಕೆ MDMA ಡ್ರಗ್ಸ್ ಕಳ್ಳಸಾಗಣೆ ಜಾಲ ಭೇದಿಸಿದ ಅಬಕಾರಿ ಇಲಾಖೆ: ಮಹಿಳೆಯರನ್ನು ಕ್ಯಾರಿಯರ್‌ಗಳಾಗಿ ಬಳಸಿ ದಂಧೆ, ನಾಲ್ವರ ಬಂಧನ!

ಕೊಚ್ಚಿ: ದೆಹಲಿಯಿಂದ ಕೇರಳಕ್ಕೆ ಎಂಡಿಎಂಎ (MDMA) ಡ್ರಗ್ಸ್ ಅನ್ನು ಕಳ್ಳಸಾಗಣೆ ಮಾಡುತ್ತಿದ್ದ ದೊಡ್ಡ ಜಾಲವನ್ನು ಕೇರಳ ಅಬಕಾರಿ ಇಲಾಖೆ ಯಶಸ್ವಿಯಾಗಿ ಭೇದಿಸಿದೆ.

ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಬ್ಬರು ಮಹಿಳೆಯರು ಸೇರಿದಂತೆ ಒಟ್ಟು ನಾಲ್ವರನ್ನು ಬಂಧಿಸಲಾಗಿದೆ. ಆರೋಪಿಗಳಿಂದ ಒಟ್ಟು 279.3 ಗ್ರಾಂ ಎಂಡಿಎಂಎ, 3 ಗ್ರಾಂ ಹಶೀಶ್ ಆಯಿಲ್, 6 ಮೊಬೈಲ್ ಫೋನ್‌ಗಳು ಮತ್ತು 69,500 ರೂಪಾಯಿ ನಗದನ್ನು ವಶಪಡಿಸಿಕೊಳ್ಳಲಾಗಿದೆ.

ಮಹೀಂದ್ರಾ ಥಾರ್  ಎಸ್‌ಯುವಿ ವಾಹನದ ಸ್ಟೀರಿಂಗ್ ಕೆಳಗೆ ವಿಶೇಷ ರಹಸ್ಯ ಖಾನೆಗಳನ್ನು ನಿರ್ಮಿಸಿ ಈ ಡ್ರಗ್ಸ್ ಅನ್ನು ದೆಹಲಿಯಿಂದ ಕೇರಳಕ್ಕೆ ತರಲಾಗುತ್ತಿತ್ತು.

ಯುವತಿಯರನ್ನು ಕ್ಯಾರಿಯರ್‌ಗಳಾಗಿ ಬಳಸಿ ಯಾರಿಗೂ ಅನುಮಾನ ಬಾರದಂತೆ ಈ ಕೃತ್ಯ ಎಸಗಲಾಗುತ್ತಿತ್ತು ಎಂದು ಜಾಯಿಂಟ್ ಎಕ್ಸೈಜ್ ಕಮಿಷನರ್ ಎಸ್. ವಿನೋದ್ ಕುಮಾರ್ ತಿಳಿಸಿದ್ದಾರೆ.

ಎನ್‌.ಡಿ.ಪಿ.ಎಸ್ (NDPS) ಕಾಯ್ದೆಯಡಿ ಈ ರೀತಿಯ ವಾಣಿಜ್ಯ ಪ್ರಮಾಣದ ಅಪರಾಧಗಳಿಗೆ 10 ವರ್ಷಗಳಿಂದ ಕನಿಷ್ಠ ಶಿಕ್ಷೆ ಆರಂಭವಾಗಿ ಗರಿಷ್ಠ 20 ವರ್ಷಗಳವರೆಗೆ ಜೈಲು ಶಿಕ್ಷೆ ವಿಧಿಸಲು ಅವಕಾಶವಿದೆ.