ಲಿಂಕ್ಡ್‌ಇನ್‌ನಿಂದ ಬದಲಾಯ್ತು ಲೈಫ್‌: ಲಕ್ಷಗಳ ಸಂಬಳ ಬಿಟ್ಟು ತಿಂಗಳಿಗೆ 5-6 ಪಟ್ಟು ಹೆಚ್ಚು ಆದಾಯ ಗಳಿಸುತ್ತಿರುವ ಯುವತಿ!

ಗುರುಗ್ರಾಂ: ಕಾರ್ಪೊರೇಟ್ ಪ್ರಪಂಚದ ಪ್ರತಿಷ್ಠಿತ ‘ಬಿಗ್ ಫೋರ್’ ಕಂಪನಿಯ ತಿಂಗಳಿಗೆ 1.5 ಲಕ್ಷ ರೂಪಾಯಿ ಸಂಬಳದ ಐಷಾರಾಮಿ ಉದ್ಯೋಗವನ್ನು ತೊರೆದು, ಲಿಂಕ್ಡ್‌ಇನ್  ಮೂಲಕವೇ ಸ್ವಂತ ಉದ್ಯಮ ಕಟ್ಟಿ ಇಂದು ತಿಂಗಳಿಗೆ 5 ರಿಂದ 6 ಪಟ್ಟು ಹೆಚ್ಚು ಆದಾಯ ಗಳಿಸುತ್ತಿರುವ ಗುರುಗ್ರಾಂ ಮೂಲದ ಶಿವಾಂಗಿ ಎಂಬ ಯುವತಿ ಯಶಸ್ಸಿನ ಕಥೆ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಸದ್ದು ಮಾಡುತ್ತಿದೆ.

ಆರಂಭದಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯರಾಗಲು ಹಾಗೂ ಪೋಸ್ಟ್‌ಗಳನ್ನು ಹಾಕಲು ಹಿಂಜರಿಯುತ್ತಿದ್ದ ಶಿವಾಂಗಿ, ನಂತರ ತಮ್ಮ ವೃತ್ತಿಪರ ಅನುಭವಗಳನ್ನು ಲಿಂಕ್ಡ್‌ಇನ್‌ನಲ್ಲಿ ಸಣ್ಣ ಪ್ರಮಾಣದಲ್ಲಿ ಹಂಚಿಕೊಳ್ಳಲು ಪ್ರಾರಂಭಿಸಿದರು.

ದಿನಕಳೆದಂತೆ ಇವರ ಪೋಸ್ಟ್‌ಗಳು ಹಾಗೂ ಕಂಟೆಂಟ್ ಗಮನಿಸಿದ ಹಲವರು, ತಮ್ಮ ವೈಯಕ್ತಿಕ ಬ್ರ್ಯಾಂಡಿಂಗ್ ಹಾಗೂ ಲಿಂಕ್ಡ್‌ಇನ್ ಪ್ರೊಫೈಲ್ ನಿರ್ವಹಣೆಗೆ ಶಿವಾಂಗಿ ಅವರ ಸಹಾಯ ಕೋರಿದರು.

ಪ್ರಸ್ತುತ ಶಿವಾಂಗಿ ಭಾರತ ಮಾತ್ರವಲ್ಲದೆ ವಿದೇಶಗಳ 8 ರಿಂದ 9 ಪ್ರಮುಖ ಕ್ಲೈಂಟ್‌ಗಳಿಗೆ ಸೇವೆ ಒದಗಿಸುತ್ತಿದ್ದಾರೆ. ಈ ಮೂಲಕ ಈ ಹಿಂದೆ ‘ಬಿಗ್ ಫೋರ್’ ಕಂಪನಿಯಲ್ಲಿ ಗಳಿಸುತ್ತಿದ್ದ 1.5 ಲಕ್ಷ ರೂ. ಸಂಬಳಕ್ಕಿಂತ 5 ರಿಂದ 6 ಪಟ್ಟು ಹೆಚ್ಚು, ಅಂದರೆ ತಿಂಗಳಿಗೆ ಸುಮಾರು 7.5 ಲಕ್ಷದಿಂದ 9 ಲಕ್ಷ ರೂಪಾಯಿವರೆಗೆ ಗಳಿಸುತ್ತಿದ್ದಾರೆ.

ಕಾರ್ಪೊರೇಟ್ ಕೆಲಸದ ಮಿತಿಗಳಿಂದ ಹೊರಬಂದು ತಮ್ಮದೇ ಆದ ಸ್ವತಂತ್ರ ಉದ್ಯಮವನ್ನು ಯಶಸ್ವಿಯಾಗಿ ಮುನ್ನಡೆಸುತ್ತಿರುವ ಶಿವಾಂಗಿ ಅವರ ಹಾದಿ, ಡಿಜಿಟಲ್ ವೇದಿಕೆಗಳ ಮೂಲಕ ಹೊಸ ವೃತ್ತಿಜೀವನ ರೂಪಿಸಿಕೊಳ್ಳಲು ಬಯಸುವ ಲಕ್ಷಾಂತರ ಯುವಜನತೆಗೆ ಪ್ರೇರಣೆಯಾಗಿದೆ.