4 ಸೆಕೆಂಡುಗಳಲ್ಲಿ ರಸ್ತೆ ಗುಂಡಿ ಪತ್ತೆ, ಬಿಬಿಎಂಪಿ ಗುತ್ತಿಗೆದಾರರ ಮಾಹಿತಿ ಲಭ್ಯ: ಬೆಂಗಳೂರಿನ ಸಾಫ್ಟ್‌ವೇರ್ ಎಂಜಿನಿಯರ್ ಹೊಸ AI ಕಮಾಲ್!

ಬೆಂಗಳೂರು: ನಗರದ ರಸ್ತೆಗಳಲ್ಲಿ ಬಿದ್ದಿರುವ ಗುಂಡಿಗಳು ವಾಹನ ಸವಾರರಿಗೆ ನಿರಂತರ ಕಿರಿಕಿರಿಯನ್ನು ಉಂಟುಮಾಡುತ್ತವೆ. ಆದರೆ, ಈ ನಾಗರಿಕ ಸಮಸ್ಯೆಗೆ ಬೆಂಗಳೂರಿನ ಸಾಫ್ಟ್‌ವೇರ್ ಎಂಜಿನಿಯರ್ ಗೌರವ್ ಸೇನ್ (Gaurav Sen) ಎಂಬುವರು ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ಮೂಲಕ ಹೊಸ ಪರಿಹಾರ ಕಂಡುಕೊಂಡಿದ್ದಾರೆ.

ಗೌರವ್ ಸೇನ್ ಅವರು ನಿರ್ಮಿಸಿರುವ ಈ AI ಸಿಸ್ಟಮ್, ಕಾರಿನಲ್ಲಿ ಅಳವಡಿಸಲಾದ ಡ್ಯಾಶ್‌ಕ್ಯಾಮ್ (Dashcam), GPS ಮತ್ತು ಆಕ್ಸಿಲರೋಮೀಟರ್ (Accelerometer) ಸಾಧನಗಳನ್ನು ಬಳಸಿಕೊಂಡು ಪ್ರಯಾಣದ ಸಮಯದಲ್ಲಿ ರಸ್ತೆಯ ಗುಂಡಿಗಳನ್ನು ಸ್ವಯಂಚಾಲಿತವಾಗಿ ಗುರುತಿಸುತ್ತದೆ. OpenAI ನ ವಿಷನ್ ಮಾಡೆಲ್ ಆಧಾರಿತ ಈ ಆ್ಯಪ್, ವೇಗ ನಿಯಂತ್ರಕ (Speed Breaker) ಮತ್ತು ರಸ್ತೆ ಗುಂಡಿಗಳ ನಡುವಿನ ವ್ಯತ್ಯಾಸವನ್ನು ನಿಖರವಾಗಿ ಪತ್ತೆ ಮಾಡುತ್ತದೆ.

4 ಸೆಕೆಂಡುಗಳಲ್ಲಿ ಗುತ್ತಿಗೆದಾರನ ಜಾತಕ ಲಭ್ಯ!

ಈ ತಂತ್ರಜ್ಞಾನದ ಅತಿ ದೊಡ್ಡ ವಿಶೇಷತೆಯೆಂದರೆ, ಇದು ಕೇವಲ ಗುಂಡಿಯನ್ನು ಪತ್ತೆ ಹಚ್ಚುವುದಕ್ಕೆ ಸೀಮಿತವಾಗಿಲ್ಲ. ಸುಮಾರು 2,900 ಸರ್ಕಾರಿ ಟೆಂಡರ್ ಒಪ್ಪಂದಗಳ ಡೇಟಾಬೇಸ್ ಅನ್ನು ಈ ಆ್ಯಪ್‌ಗೆ ಸಂಯೋಜಿಸಲಾಗಿದೆ. ಇದರಿಂದಾಗಿ, ರಸ್ತೆ ಗುಂಡಿಯ ಫೋಟೋ, ನಿಖರ ಸ್ಥಳ (GPS ಲೊಕೇಶನ್), ಟೆಂಡರ್ ಸಂಖ್ಯೆ, ರಸ್ತೆಯ ಜವಾಬ್ದಾರಿ ಹೊತ್ತಿರುವ ಸರ್ಕಾರಿ ಅಧಿಕಾರಿ ಮತ್ತು ಗುತ್ತಿಗೆದಾರರ (Contractor) ವಿವರಗಳನ್ನು ಕೇವಲ ೪ ಸೆಕೆಂಡುಗಳಲ್ಲಿ ಈ ಆ್ಯಪ್ ವರದಿ ರೂಪದಲ್ಲಿ ನೀಡುತ್ತದೆ. ರಸ್ತೆಯು ವಾರಂಟಿ ಅವಧಿಯಲ್ಲಿದ್ದರೆ, ಸಾರ್ವಜನಿಕರ ಹಣ ವೆಚ್ಚ ಮಾಡದೆ ಗುತ್ತಿಗೆದಾರನೇ ಅದನ್ನು ಉಚಿತವಾಗಿ ದುರಸ್ತಿ ಮಾಡಬೇಕಾಗುತ್ತದೆ.

ಗೌರವ್ ಸೇನ್ ಅವರು ತಮ್ಮ ಕಚೇರಿಗೆ ತೆರಳುವಾಗ ನಡೆಸಿದ ಪ್ರಾಯೋಗಿಕ ಪರೀಕ್ಷೆಯಲ್ಲಿ ಈ ಆ್ಯಪ್ 12 ರಸ್ತೆ ಗುಂಡಿಗಳನ್ನು ಹಾಗೂ ಅವುಗಳಿಗೆ ಸಂಬಂಧಿಸಿದ ಗುತ್ತಿಗೆದಾರರ ಸಂಪೂರ್ಣ ದಾಖಲೆಗಳನ್ನು ಪತ್ತೆ ಮಾಡಿದೆ. ಸೋಶಿಯಲ್ ಮೀಡಿಯಾದಲ್ಲಿ (X ಮತ್ತು Instagram) ಈ ವೀಡಿಯೊ ವ್ಯಾಪಕವಾಗಿ ವೈರಲ್ ಆಗಿದ್ದು, ನಾಗರಿಕ ಸಂಸ್ಥೆಗಳು ಈ ತಂತ್ರಜ್ಞಾನವನ್ನು ಅಳವಡಿಸಿಕೊಂಡು ರಸ್ತೆ ದುರಸ್ತಿಯಲ್ಲಿ ಜವಾಬ್ದಾರಿ ಹೆಚ್ಚಿಸಬೇಕು ಎಂದು ಸಾರ್ವಜನಿಕರು ಆಶಿಸಿದ್ದಾರೆ.