ಶ್ರೀಮಂತರ ಮನೆಗಳೇ ಟಾರ್ಗೆಟ್! ಗೃಹಪರಿಚಾರಿಕೆಯರ ವೇಷದಲ್ಲಿದ್ದ ಅಂತಾರಾಜ್ಯ ಕಳ್ಳಿಯರು ಕದ್ದದ್ದು ಎಷ್ಟು ಕೋಟಿ?

ಅಹಮದಾಬಾದ್/ಆದಿಪುರ್: ಶ್ರೀಮಂತರ ಮನೆಗಳಲ್ಲಿ ಕೆಲಸದಾಳಾಗಿ ಸೇರಿಕೊಂಡು, ಮಾಲೀಕರ ನಂಬಿಕೆ ಗಿಟ್ಟಿಸಿಕೊಂಡು ಕೋಟ್ಯಂತರ ರೂಪಾಯಿ ಮೌಲ್ಯದ ಚಿನ್ನಾಭರಣ ಮತ್ತು ಹಣ ದೋಚುತ್ತಿದ್ದ ಅಂತಾರಾಜ್ಯ ಕಳ್ಳರ ಗ್ಯಾಂಗ್ ಒಂದನ್ನು ಗುಜರಾತ್‌ನ ಆದಿಪುರ ಪೊಲೀಸರು ಮಟ್ಟಹಾಕಿದ್ದಾರೆ

 ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಲೀನಾ ಶಾಹಿ (26) ಮತ್ತು ರವೀನಾ ವೀರೇಂದ್ರ (28) ಎಂಬ ಇಬ್ಬರು ನೇಪಾಳಿ ಮೂಲದ ಮಹಿಳೆಯರನ್ನು ಬಂಧಿಸಲಾಗಿದೆ.

ಸಂಚು ನಡೆಸಿದ್ದು ಹೇಗೆ?

ಈ ಗ್ಯಾಂಗ್ ಮುಖ್ಯವಾಗಿ ಶ್ರೀಮಂತ ವಸತಿ ಪ್ರದೇಶಗಳಲ್ಲಿ ಕೆಲಸದಾಳಾಗಿ (ಮೇಡ್) ಕೆಲಸಕ್ಕೆ ಸೇರುತ್ತಿದ್ದರು. ಕುಟುಂಬದ ದೈನಂದಿನ ಚಟುವಟಿಕೆಗಳು ಹಾಗೂ ಮನೆಯವರ ದಿನಚರಿಯ ಸಂಪೂರ್ಣ ಮಾಹಿತಿ ಕಲೆಹಾಕಿದ ನಂತರ, ಮಾಲೀಕರು ಮನೆಯಲ್ಲಿ ಇಲ್ಲದ ಸಮಯ ನೋಡಿ ತಮ್ಮ ಸಹಚರರಿಗೆ ಮಾಹಿತಿ ನೀಡುತ್ತಿದ್ದರು. ನಂತರ ನಗದು, ಚಿನ್ನಾಭರಣ ಹಾಗೂ ಇತರ ಬೆಲೆಬಾಳುವ ವಸ್ತುಗಳನ್ನು ದೋಚಿ ಪರಾರಿಯಾಗುತ್ತಿದ್ದರು.

₹1 ಕೋಟಿಗೂ ಅಧಿಕ ಮೌಲ್ಯದ ಕಳವು:

ಆರೋಪಿಗಳು ಗುಜರಾತ್, ಮಹಾರಾಷ್ಟ್ರ (ಪುಣೆ, ಠಾಣೆ) ಮತ್ತು ಕರ್ನಾಟಕದ ಬೆಂಗಳೂರಿನಲ್ಲೂ ಕಳವು ಮಾಡಿರುವುದಾಗಿ ಒಪ್ಪಿಕೊಂಡಿದ್ದಾರೆ. ಒಟ್ಟಾರೆ 6 ಕಡೆಗಳಲ್ಲಿ ನಡೆಸಿದ ದರೋಡೆಯ ಒಟ್ಟು ಮೌಲ್ಯ ₹1 ಕೋಟಿಗೂ ಅಧಿಕ ಎಂದು ಅಂದಾಜಿಸಲಾಗಿದೆ. ಕದ್ದ ಹಣ ಮತ್ತು ಒಡವೆಗಳನ್ನು ನೇಪಾಳಕ್ಕೆ ಕೊಂಡೊಯ್ದು ಮಾರಿ, ಆ ಹಣದಲ್ಲಿ ವಿಮಾನ ಪ್ರಯಾಣ ಹಾಗೂ ಐಷಾರಾಮಿ ಜೀವನ ನಡೆಸುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಪ್ರಸ್ತುತ ಆರೋಪಿಗಳಿಂದ ನಗದು ಹಣ, ಚಿನ್ನದ ಉಂಗುರ ಹಾಗೂ ಮೊಬೈಲ್ ಫೋನ್‌ಗಳನ್ನು ವಶಪಡಿಸಿಕೊಳ್ಳಲಾಗಿದ್ದು, ತಲೆಮರೆಸಿಕೊಂಡಿರುವ ಭೀಮ್ ಬಹದ್ದೂರ್ ಶಾಹಿ ಸೇರಿದಂತೆ ಉಳಿದ ಮೂವರು ಪುರುಷ ಸಹಚರರಿಗಾಗಿ ಶೋಧ ಕಾರ್ಯ ಮುಂದುವರಿದಿದೆ.