ಏಷ್ಯನ್‌ ಗೇಮ್ಸ್‌‌ 2026: ಗಾಲ್ಫ್‌ನಲ್ಲಿ ಕನ್ನಡತಿ ಪ್ರಣವಿ ಅರಸ್‌ಗೆ ಐತಿಹಾಸಿಕ ಬಂಗಾರ, ಬಿಲ್ಲುವಿದ್ಯೆಯಲ್ಲಿ ಕುಮ್ಕುಮ್‌ಗೆ ಸ್ವರ್ಣ ಪದಕ; ಕುಸ್ತಿಯಲ್ಲಿ ಇಬ್ಬರು ಫೈನಲ್‌ಗೆ!

ಐಚಿ-ನಗೋಯಾ (ಜಪಾನ್‌): ಜಪಾನ್‌ನಲ್ಲಿ ನಡೆಯುತ್ತಿರುವ 2026ರ ಏಷ್ಯನ್ ಗೇಮ್ಸ್‌ನ 14ನೇ ದಿನದಂದು ಭಾರತೀಯ ಕ್ರೀಡಾಪಟುಗಳು ಅದ್ಭುತ ಪ್ರದರ್ಶನ ನೀಡಿದ್ದು, ಗಾಲ್ಫ್ ಹಾಗೂ ಬಿಲ್ಲುವಿದ್ಯೆಯಲ್ಲಿ (ಆರ್ಚರಿ) ಐತಿಹಾಸಿಕ ಚಿನ್ನದ ಪದಕಗಳನ್ನು ಮುಡಿಗೇರಿಸಿಕೊಂಡಿದ್ದಾರೆ.

ಗಾಲ್ಫ್‌ನಲ್ಲಿ ಕನ್ನಡತಿ ಪ್ರಣವಿ ಅರಸ್‌ ಐತಿಹಾಸಿಕ ಸಾಧನೆ

ಮಹಿಳೆಯರ ವೈಯಕ್ತಿಕ ಸ್ಟ್ರೋಕ್ ಪ್ಲೇ ಗಾಲ್ಫ್ ಸ್ಪರ್ಧೆಯಲ್ಲಿ ಮೈಸೂರಿನ ಪ್ರಣವಿ ಅರಸ್ ಅದ್ಭುತ ಪ್ರದರ್ಶನ ನೀಡಿ ಭಾರತಕ್ಕೆ ಮೊದಲ ಐತಿಹಾಸಿಕ ಚಿನ್ನದ ಪದಕ ತಂದುಕೊಟ್ಟಿದ್ದಾರೆ. ಇದರೊಂದಿಗೆ, ಮಹಿಳೆಯರ ಗಾಲ್ಫ್ ತಂಡ ಸ್ಪರ್ಧೆಯಲ್ಲಿ ಅದಿತಿ ಅಶೋಕ್ ಮತ್ತು ದೀಕ್ಷಾ ದಾಗರ್ ಅವರೊಂದಿಗೆ ಸೇರಿ ಭಾರತಕ್ಕೆ ಬೆಳ್ಳಿ ಪದಕವನ್ನು ಗೆದ್ದುಕೊಡುವಲ್ಲಿ ಪ್ರಮುಖ ಪಾತ್ರ ವಹಿಸಿದರು.

ಆರ್ಚರಿಯಲ್ಲಿ ಕುಮ್ಕುಮ್‌ಗೆ ಐತಿಹಾಸಿಕ ಸ್ವರ್ಣ

ಮಹಿಳೆಯರ ರಿಕರ್ವ್ ವೈಯಕ್ತಿಕ ಆರ್ಚರಿ ವಿಭಾಗದಲ್ಲಿ 17 ವರ್ಷದ ಕುಮ್ಕುಮ್ ಮೊಹೋದ್ ದಕ್ಷಿಣ ಕೊರಿಯಾದ ಓ ಯೇಜಿನ್ ವಿರುದ್ಧ 6-5 ಅಂತರದ ರೋಚಕ ಜಯ ಸಾಧಿಸಿ ಚಿನ್ನದ ಪದಕಕ್ಕೆ ಮುತ್ತಿಟ್ಟಿದ್ದಾರೆ. ಈ ಮೂಲಕ ಈ ವಿಭಾಗದಲ್ಲಿ ಭಾರತಕ್ಕೆ ಮೊದಲ ಚಿನ್ನ ತಂದುಕೊಟ್ಟ ದಾಖಲೆ ಬರೆದಿದ್ದಲ್ಲದೆ, 2028ರ ಲಾಸ್ ಏಂಜಲೀಸ್ ಒಲಿಂಪಿಕ್ಸ್ ಅರ್ಹತೆಯನ್ನೂ ಗಿಟ್ಟಿಸಿಕೊಂಡಿದ್ದಾರೆ.

ಕುಸ್ತಿಯಲ್ಲಿ ಇಬ್ಬರು ಫೈನಲ್‌‌ಗೆ

ಪುರುಷರ ಫ್ರೀಸ್ಟೈಲ್ 57 ಕೆಜಿ: ಅಮನ್ ಸೆಹ್ರಾವತ್ ಸೆಮಿಫೈನಲ್‌ನಲ್ಲಿ ತಜಿಕಿಸ್ತಾನದ ಐಯಾಲ್ ಬೆಲೋಲ್ಯುಬ್ಸ್ಕಿ ವಿರುದ್ಧ 14-8 ಅಂತರದ ರೋಚಕ ಗೆಲುವು ಸಾಧಿಸಿ ಫೈನಲ್ ಪ್ರವೇಶಿಸಿದ್ದಾರೆ.

ಮಹಿಳೆಯರ 53 ಕೆಜಿ: ಅಂತಿಮ್ ಪಂಘಾಲ್ ಚೀನಾದ ಜಿನ್ ಝಾಂಗ್ ವಿರುದ್ಧ 6-1 ಅಂತರದ ಭರ್ಜರಿ ಜಯ ಗಳಿಸಿ ಚಿನ್ನದ ಪದಕದ ಪಂದ್ಯಕ್ಕೆ ಅರ್ಹತೆ ಪಡೆದಿದ್ದಾರೆ.

ಪುರುಷರ 74 ಕೆಜಿ: ಸಾಗರ್ ಜಾಗ್ಲಾನ್ ರಿಪೆಚೇಜ್ ಮೂಲಕ ಕಂಚಿನ ಪದಕದ ಪಂದ್ಯಕ್ಕೆ ಅರ್ಹತೆ ಪಡೆದಿದ್ದಾರೆ.

🎯ಮುಖ್ಯಾಂಶಗಳು ಹಾಗೂ ಇತರೆ ಫಲಿತಾಂಶಗಳು:

ಆರ್ಚರಿ (ಪುರುಷರ ರಿಕರ್ವ್): ಧೀರಜ್ ಬೊಮ್ಮದೇವರ ಹಾಗೂ ನೀರಜ್ ಚೌಹಾಣ್ ಸೆಮಿಫೈನಲ್‌ನಲ್ಲಿ ಸೋತಿದ್ದು, ಕಂಚಿನ ಪದಕಕ್ಕಾಗಿ ಇಬ್ಬರೂ ಭಾರತೀಯರೇ ಮುಖಾಮುಖಿಯಾಗಲಿದ್ದಾರೆ.

ರಗ್ಬಿ ಸೆವೆನ್ಸ್: ಮಹಿಳೆಯರ 5 ರಿಂದ 8ನೇ ಸ್ಥಾನದ ಪಂದ್ಯದಲ್ಲಿ ಭಾರತ ತಂಡ ಸಿಂಗಾಪುರ ವಿರುದ್ಧ 22-5 ಅಂತರದ ಜಯ ಸಾಧಿಸಿದೆ.

ಪದಕಗಳ ಪಟ್ಟಿ: ಪ್ರಸ್ತುತ ಭಾರತ 17 ಚಿನ್ನ, 25 ಬೆಳ್ಳಿ ಹಾಗೂ 35 ಕಂಚು ಸೇರಿದಂತೆ ಒಟ್ಟು 77 ಪದಕಗಳೊಂದಿಗೆ ಪದಕಗಳ ಪಟ್ಟಿಯಲ್ಲಿ 5ನೇ ಸ್ಥಾನದಲ್ಲಿದೆ.