ಭಾರತದ ಉದಾರತೆ ದೌರ್ಬಲ್ಯವೆಂದು ಭಾವಿಸಬೇಡಿ: ಆಪರೇಷನ್ ಸಿಂಧೂರ್‌ ರಹಸ್ಯ ಬಿಚ್ಚಿಟ್ಟ ಅಜಿತ್ ದೋವಲ್, 88 ಗಂಟೆಗಳ ಮಿಲಿಟರಿ ಕಾರ್ಯಾಚರಣೆಯ ಅಸಲಿ ಕಥೆ ಇಲ್ಲಿದೆ!

ನವದೆಹಲಿ: ಭಾರತದ ಉದಾರತೆ ಹಾಗೂ ಸಹನಶೀಲತೆಯನ್ನು ಯಾರೂ ದೌರ್ಬಲ್ಯವೆಂದು ತಪ್ಪಾಗಿ ಗ್ರಹಿಸಬಾರದು. ಎಂಥದ್ದೇ ಪರಿಣಾಮಗಳನ್ನು ಎದುರಿಸಿಯಾದರೂ ರಿಸ್ಕ್ ತೆಗೆದುಕೊಂಡು ಶತ್ರುಗಳ ಮೇಲೆ ಕಠಿಣ ಪ್ರಹಾರ ಮಾಡುವ ಸಾಮರ್ಥ್ಯ ಭಾರತಕ್ಕಿದೆ ಎಂದು ರಾಷ್ಟ್ರೀಯ ಭದ್ರತಾ ಸಲಹೆಗಾರ (ಎನ್‌ಎಸ್‌ಎ) ಅಜಿತ್ ದೋವಲ್ ಪ್ರತ್ಯುತ್ತರ ನೀಡಿದ್ದಾರೆ.

ಡಿಸ್ಕವರಿ ವಾಹಿನಿಯ ಮುಂಬರುವ “ಡಿಕ್ಲಾಸಿಫೈಡ್: ಆಪರೇಷನ್ ಸಿಂಧೂರ್”  ಡಾಕ್ಯುಸೀರೀಸ್‌ನಲ್ಲಿ ನೀಡಿದ ವಿಶೇಷ ಸಂದರ್ಶನದಲ್ಲಿ ಮಾತನಾಡಿದ ಅಜಿತ್ ದೋವಲ್, 88 ಗಂಟೆಗಳ ಕಾಲ ನಡೆದ ಈ ಐತಿಹಾಸಿಕ ಮಿಲಿಟರಿ ಕಾರ್ಯಾಚರಣೆಯ ಪ್ರಮುಖ ಉದ್ದೇಶವೇ ಪಹಲ್ಗಾಮ್ ದಾಳಿಗೆ ಕಾರಣರಾದ ಉಗ್ರರ ಮೂಲಸೌಕರ್ಯಗಳನ್ನು ನಾಶಪಡಿಸುವುದಾಗಿತ್ತು ಎಂದು ಸ್ಪಷ್ಟಪಡಿಸಿದ್ದಾರೆ.

“ಜಗತ್ತಿಗೆ ನಮ್ಮ ಸಂದೇಶ ಅತ್ಯಂತ ಸ್ಪಷ್ಟವಾಗಿದೆ — ಭಾರತದ ಸಹನೆ ಅಥವಾ ಉದಾರತೆಯನ್ನು ನಮ್ಮ ದೌರ್ಬಲ್ಯವೆಂದು ಭಾವಿಸಬೇಡಿ. ದೇಶದ ಸುರಕ್ಷತೆಗಾಗಿ ಅಪಾಯಗಳನ್ನು ಎದುರಿಸಲು ಮತ್ತು ಪ್ರತ್ಯುತ್ತರ ನೀಡಲು ಭಾರತ ಹಿಂಜರಿಯುವುದಿಲ್ಲ,” ಎಂದು ‘ಆಪರೇಷನ್ ಸಿಂಧೂರ್’ ನಂತರ ನೀಡಿದ ತಮ್ಮ ಮೊದಲ ಸಂದರ್ಶನದಲ್ಲಿ ದೋವಲ್ ಹೇಳಿದ್ದಾರೆ.

ಪಹಲ್ಗಾಮ್ ದಾಳಿಗೆ ತಕ್ಕ ಶಾಸ್ತಿ:

ಕಳೆದ ವರ್ಷ ಏಪ್ರಿಲ್ 22 ರಂದು ನಡೆದ ಭೀಕರ ಪಹಲ್ಗಾಮ್ ಭಯೋತ್ಪಾದಕ ದಾಳಿಗೆ ಪ್ರತೀಕಾರವಾಗಿ ಮೇ 7 ರಂದು ಭಾರತೀಯ ಪಡೆಗಳು ‘ಆಪರೇಷನ್ ಸಿಂಧೂರ್’ ಕಾರ್ಯಾಚರಣೆ ಪ್ರಾರಂಭಿಸಿದ್ದವು. ಪಾಕಿಸ್ತಾನ ಮತ್ತು ಪಾಕ್ ಆಕ್ರಮಿತ ಕಾಶ್ಮೀರದಲ್ಲಿ (PoK) ಕಾರ್ಯಾಚರಿಸುತ್ತಿದ್ದ ಉಗ್ರರ ತರಬೇತಿ ಶಿಬಿರಗಳ ಮೇಲೆ ಭಾರತೀಯ ಪಡೆಗಳು ನಿಖರ ದಾಳಿ (Precision Strikes) ನಡೆಸಿದ್ದವು. ಮೇ 10 ರ ಸಂಜೆ ಎರಡೂ ದೇಶಗಳ ನಡುವೆ ಸಮನ್ವಯ ಏರ್ಪಟ್ಟ ನಂತರ ಈ 88 ಗಂಟೆಗಳ ಸೇನಾ ಸಂಘರ್ಷ ಮುಕ್ತಾಯಗೊಂಡಿತ್ತು.

ಈ ಎರಡು ಭಾಗಗಳ ಡಾಕ್ಯುಸೀರೀಸ್ ಆಗಸ್ಟ್ 15 ರಂದು ರಾತ್ರಿ 9 ಗಂಟೆಗೆ ಡಿಸ್ಕವರಿ ಚಾನೆಲ್ ಹಾಗೂ ಡಿಸ್ಕವರಿ+ ಓಟಿಟಿ ಪ್ಲಾಟ್‌ಫಾರ್ಮ್‌ನಲ್ಲಿ ಪ್ರಸಾರವಾಗಲಿದೆ.