ವಿನಿವೇಶನ, ಆಸ್ತಿ ನಗದೀಕರಣದಿಂದ ಕೇಂದ್ರ ಸರ್ಕಾರಕ್ಕೆ ₹45,306 ಕೋಟಿ ಆದಾಯ: ಪರಿಷ್ಕೃತ ಗುರಿ ಮೀರಿಸಿದ ಒಕ್ಕೂಟ ಸರ್ಕಾರ!

ನವದೆಹಲಿ: 2025-26ನೇ ಹಣಕಾಸು ವರ್ಷದಲ್ಲಿ (FY26) ಕೇಂದ್ರ ಸರ್ಕಾರವು ವಿನಿವೇಶನ (Disinvestment) ಹಾಗೂ ಸಾರ್ವಜನಿಕ ಆಸ್ತಿಗಳ ನಗದೀಕರಣ (Asset Monetisation) ಮೂಲಕ ಒಟ್ಟು 45,306.05 ಕೋಟಿ ರೂಪಾಯಿ ಸಂಗ್ರಹಿಸಿದೆ. ಈ ಮೂಲಕ ಸರ್ಕಾರವು ತಾನು ಹೊಂದಿದ್ದ ಪರಿಷ್ಕೃತ ಅಂದಾಜು (Revised Estimates) ಗುರಿಯನ್ನು ಯಶಸ್ವಿಯಾಗಿ ಮೀರಿಸಿದೆ.

ಲೋಕಸಭೆಯಲ್ಲಿ ಈ ಕುರಿತು ಲಿಖಿತ ಉತ್ತರ ನೀಡಿರುವ ಹಣಕಾಸು ರಾಜ್ಯ ಸಚಿವ ಪಂಕಜ್ ಚೌಧರಿ, “ಸರ್ಕಾರವು ವಿವಿಧ ಯೋಜನೆಗಳ ಮೂಲಕ ಒಟ್ಟು 45,306.05 ಕೋಟಿ ರೂ. ಗಳಿಸಿದೆ. ಇದರಲ್ಲಿ ವಿನಿವೇಶನದಿಂದ 16,885.56 ಕೋಟಿ ರೂ. ಹಾಗೂ ಆಸ್ತಿ ನಗದೀಕರಣದಿಂದ 28,420.49 ಕೋಟಿ ರೂ. ಸೇರಿದೆ” ಎಂದು ಮಾಹಿತಿ ನೀಡಿದ್ದಾರೆ.

ಗುರಿ ಮೀರಿದ ಆದಾಯ ಸಂಗ್ರಹ:

2025-26ರ ಪರಿಷ್ಕೃತ ಅಂದಾಜಿನಲ್ಲಿ (RE) ಸರ್ಕಾರವು ವಿವಿಧ ಬಂಡವಾಳ ರಸೀದಿಗಳ (Miscellaneous Capital Receipts) ಅಡಿಯಲ್ಲಿ 33,837 ಕೋಟಿ ರೂಪಾಯಿ ಸಂಗ್ರಹಿಸುವ ಗುರಿ ಹೊಂದಿತ್ತು. ಆದರೆ, ವಾಸ್ತವ ಸಂಗ್ರಹಣೆ ಈ ಅಂದಾಜಿಗಿಂತ ಗಣನೀಯವಾಗಿ ಹೆಚ್ಚಾಗಿದೆ.

ಯಾವೆಲ್ಲಾ ಸಂಸ್ಥೆಗಳ ಷೇರು ಮಾರಾಟ?

ಕೋಲ್ ಇಂಡಿಯಾ, ಲೈಫ್ ಇನ್ಶೂರೆನ್ಸ್ ಕಾರ್ಪೊರೇಷನ್ (LIC), ಸೆಂಟ್ರಲ್ ಬ್ಯಾಂಕ್ ಆಫ್ ಇಂಡಿಯಾ, ಎನ್‌ಎಚ್‌ಪಿಸಿ (NHPC), ಎನ್‌ಎಲ್‌ಸಿ ಇಂಡಿಯಾ, ಜಿಐಸಿ (GIC), ಐಆರ್‌ಎಫ್‌ಸಿ (IRFC) ಮತ್ತು ಕೊಚಿನ್ ಶಿಪ್‌ಯಾರ್ಡ್ ಸೇರಿದಂತೆ ಪ್ರಮುಖ ಸಾರ್ವಜನಿಕ ವಲಯದ ಉದ್ಯಮಗಳ ಷೇರುಗಳನ್ನು ‘ಆಫರ್ ಫಾರ್ ಸೇಲ್’ (OFS) ಮೂಲಕ ಮಾರಾಟ ಮಾಡಲಾಗಿದೆ.

ಐಡಿಬಿಐ ಬ್ಯಾಂಕ್ ಖಾಸಗೀಕರಣ ವೇಗ:

ಸದ್ಯ ಪ್ರಮುಖ ಖಾಸಗೀಕರಣ ಪ್ರಕ್ರಿಯೆಯಲ್ಲಿರುವ ಐಡಿಬಿಐ ಬ್ಯಾಂಕ್ (IDBI Bank) ತಾಂತ್ರಿಕ ಪ್ರಕ್ರಿಯೆಗಳು ಮುಂದುವರಿದಿದ್ದು, ಪ್ರೇಮ್ ವಾಟ್ಸಾ ಒಡೆತನದ ಫೇರ್‌ಫ್ಯಾಕ್ಸ್ (Fairfax) ಹಾಗೂ ಎಮಿರೇಟ್ಸ್ ಎನ್‌ಬಿಡಿ (Emirates NBD) ರೇಸ್‌ನಲ್ಲಿ ಮುಂಚೂಣಿಯಲ್ಲಿವೆ.

ಮುಂದಿನ ಅಂದರೆ 2026-27ರ ಹಣಕಾಸು ವರ್ಷಕ್ಕೆ ಕೇಂದ್ರ ಸರ್ಕಾರವು ವಿವಿಧ ಬಂಡವಾಳ ರಸೀದಿಗಳ ಅಡಿಯಲ್ಲಿ 80,000 ಕೋಟಿ ರೂಪಾಯಿ ಸಂಗ್ರಹಿಸುವ ಬೃಹತ್ ಗುರಿಯನ್ನು ಹೊಂದಿದೆ.