ಮೆಟ್ರೋದಲ್ಲಿ ಯುವತಿಯರ ಸೀಕ್ರೆಟ್ ವಿಡಿಯೋ ಶೂಟ್: ಕಾಮುಕನ ರೆಡ್ ಹ್ಯಾಂಡ್ ಆಗಿ ಹಿಡಿದ ಬಳಿಕ ಆಗಿದ್ದೇನು?

ವದೆಹಲಿ: ದೆಹಲಿ ಮೆಟ್ರೋದಲ್ಲಿ ಮಹಿಳೆಯರ ಸುರಕ್ಷತೆ ಮತ್ತು ಗೌಪ್ಯತೆಗೆ ಧಕ್ಕೆ ತರುವಂತಹ ಮತ್ತೊಂದು ಆಘಾತಕಾರಿ ಘಟನೆ ಬೆಳಕಿಗೆ ಬಂದಿದೆ. ಪ್ರಯಾಣಿಸುತ್ತಿದ್ದ ಇಬ್ಬರು ಯುವತಿಯರ ವೀಡಿಯೋ ಹಾಗೂ ಫೋಟೋಗಳನ್ನು ಅವರ ಅನುಮತಿಯಿಲ್ಲದೆ ರಹಸ್ಯವಾಗಿ ಚಿತ್ರೀಕರಿಸುತ್ತಿದ್ದ ಮಧ್ಯವಯಸ್ಕ ವ್ಯಕ್ತಿಯೊಬ್ಬನನ್ನು ಯುವತಿಯರು ರೆಡ್ ಹ್ಯಾಂಡ್ ಆಗಿ ಹಿಡಿದು ತರಾಟೆಗೆ ತೆಗೆದುಕೊಂಡಿದ್ದಾರೆ.

ಘಟನೆಯ ವಿವರ:

ಲೋಕನಾಯಕ್ ಭವನ್ ಮೆಟ್ರೋ ನಿಲ್ದಾಣದಿಂದ ಗ್ರೀನ್ ಪಾರ್ಕ್ ಕಡೆಗೆ ಪ್ರಯಾಣಿಸುತ್ತಿದ್ದಾಗ ಈ ಘಟನೆ ನಡೆದಿದೆ. ವ್ಯಕ್ತಿಯೊಬ್ಬ ತಮ್ಮನ್ನೇ ನೋಡುತ್ತಾ ಫೋನ್‌ನಲ್ಲಿ ರಹಸ್ಯವಾಗಿ ಫೋಟೋ ಹಾಗೂ ವೀಡಿಯೋ ತೆಗೆಯುತ್ತಿರುವುದನ್ನು ಯುವತಿಯರು ಗಮನಿಸಿದ್ದಾರೆ. ಸಂಶಯಗೊಂಡು ಆತನನ್ನು ಪ್ರಶ್ನಿಸಿದಾಗ, ಆತ ತಾನೇನೂ ಮಾಡಿಲ್ಲವೆಂದು ನಿರಾಕರಿಸುತ್ತಲೇ ಯುವತಿಯರ ಎದುರೇ ಫೋನ್‌ನಲ್ಲಿದ್ದ ಫೋಟೋಗಳನ್ನು ಡಿಲೀಟ್ ಮಾಡಲು ಯತ್ನಿಸಿದ್ದಾನೆ.

ಬಳಿಕ ಫೋಟೋಗಳಿಲ್ಲ ಎಂದು ತೋರಿಸಲು ಫೋನ್ ನೀಡಿದಾಗ, ಜಾಣತನ ಪ್ರದರ್ಶಿಸಿದ ಯುವತಿಯರು ಗ್ಯಾಲರಿಯ ‘ರಿಸೈಕಲ್ ಬಿನ್’ (Recycle Bin) ಪರಿಶೀಲಿಸಿದ್ದಾರೆ. ಅಲ್ಲಿ ಡಿಲೀಟ್ ಮಾಡಲಾಗಿದ್ದ ವೀಡಿಯೋ ಪತ್ತೆಯಾಗಿದೆ.

ಮಹಿಳೆಯರ ಒಪ್ಪಿಗೆಯಿಲ್ಲದೆ ವೀಡಿಯೋ ಮಾಡುವುದು ಕಾನೂನುಬಾಹಿರ ಮತ್ತು ಅಸಭ್ಯ ವರ್ತನೆ ಎಂದು ಯುವತಿಯರು ಆತನಿಗೆ ಎಚ್ಚರಿಕೆ ನೀಡಿದ್ದು, ಈ ಇಡೀ ಘಟನೆಯ ವೀಡಿಯೋ ಇನ್‌ಸ್ಟಾಗ್ರಾಮ್‌ನಲ್ಲಿ ಶೇರ್ ಆಗಿದೆ. ಈ ವೀಡಿಯೋ ಜಾಲತಾಣಗಳಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದ್ದು, ಸಾರ್ವಜನಿಕ ಸ್ಥಳಗಳಲ್ಲಿ ಮಹಿಳೆಯರ ಸುರಕ್ಷತೆಯ ಬಗ್ಗೆ ಮತ್ತೆ ಪ್ರಶ್ನೆಗಳು ಏಳುವಂತೆ ಮಾಡಿದೆ.