ಹಾಲಿವುಡ್ ಕ್ರೈಂ ಸರಣಿ ‘ದಿ ಸ್ಟೇರ್‌ಕೇಸ್’ ಕಥೆ ನೋಡಿ ಪತ್ನಿ ಕೊಂದ: 12.75 ಲಕ್ಷ ರೂ. ಇಟ್ಕೊಂಡು ನೇಪಾಳಕ್ಕೆ ಎಸ್ಕೇಪ್ ಆಗುವಾಗ ಪತಿ ಸಿಕ್ಕಿಬಿದ್ದಿದ್ದೇ ರೋಚಕ!

ನವದೆಹಲಿ: ಹಾಲಿವುಡ್ ಹಾಗೂ ನೆಟ್‌ಫ್ಲಿಕ್ಸ್‌ನ ಪ್ರಸಿದ್ಧ ಕ್ರೈಮ್ ಸರಣಿ ‘ದಿ ಸ್ಟೇರ್‌ಕೇಸ್’ (The Staircase) ನೋಡಿ ಪ್ರೇರಿತನಾಗಿ, ತನ್ನ ಪತ್ನಿಯನ್ನೇ ಕೊಲೆ ಮಾಡಿ ತನಿಖಾಧಿಕಾರಿಗಳನ್ನು ದಾರಿ ತಪ್ಪಿಸಲು ಯತ್ನಿಸಿದ 53 ವರ್ಷದ ವ್ಯಕ್ತಿಯೊಬ್ಬ ಕೊನೆಗೂ ದೆಹಲಿ ಪೊಲೀಸರ ಬಲೆಗೆ ಬಿದ್ದಿದ್ದಾನೆ.

ಆರೋಪಿಯನ್ನು ಕಮಲ್ ಸಿಂಗ್ (53) ಎಂದು ಗುರುತಿಸಲಾಗಿದ್ದು, ಆತ ಜುಲೈ 30ರ ರಾತ್ರಿ ದೆಹಲಿಯ ಶಹದರಾದ ಗಗನ್ ವಿಹಾರ್‌ನಲ್ಲಿರುವ ತನ್ನ ನಿವಾಸದಲ್ಲಿ ಪತ್ನಿ ಕೋಮಲ್ ಸಿಂಗ್ (50) ಅವರನ್ನು ಆಸ್ತಿ ವಿವಾದದ ಹಿನ್ನೆಲೆಯಲ್ಲಿ ಹತ್ಯೆ ಮಾಡಿದ್ದನೆಂದು ಆರೋಪಿಸಲಾಗಿದೆ.

ಸಿನಿಮಾ ಶೈಲಿಯ ಕೊಲೆ ಮತ್ತು ಹಾದಿ ತಪ್ಪಿಸುವ ಯತ್ನ:

ಪ್ರಕರಣದ ತನಿಖೆ ವೇಳೆ ಆರೋಪಿ ಕಮಲ್ ಸಿಂಗ್, ನೆಟ್‌ಫ್ಲಿಕ್ಸ್‌ನ ‘ದಿ ಸ್ಟೇರ್‌ಕೇಸ್’ ವೆಬ್ ಸರಣಿಯಿಂದ ಪ್ರೇರಿತನಾಗಿದ್ದಾಗಿ ಒಪ್ಪಿಕೊಂಡಿದ್ದಾನೆ. ಹತ್ಯೆಗೆ ಬಳಸಿದ ನೈಜ ಅಸ್ತ್ರವನ್ನು ಅಡಗಿಸಿ, ಬೇರೊಂದು ಅಸ್ತ್ರವನ್ನು ಘಟನಾ ಸ್ಥಳದಲ್ಲಿಟ್ಟು ಆತ್ಮಹತ್ಯೆಯಂತೆ ಬಿಂಬಿಸಿದರೆ ಪೊಲೀಸರು ಗೊಂದಲಕ್ಕೊಳಗಾಗುತ್ತಾರೆ ಎಂದು ಆತ ಭಾವಿಸಿದ್ದ.

ಇದಕ್ಕಾಗಿ ಆತ ಮುಂಚಿತವಾಗಿಯೇ ಕತ್ತರಿಯೊಂದನ್ನು ಖರೀದಿಸಿಟ್ಟಿದ್ದ. ಕೃತ್ಯ ಎಸಗಿದ ಬಳಿಕ ರಕ್ತಸಿಕ್ತ ಕತ್ತರಿಯನ್ನು ಪತ್ನಿಯ ಕೈಯಲ್ಲಿಟ್ಟು ಆತ್ಮಹತ್ಯೆಯಂತೆ ಬಿಂಬಿಸಲು ಯತ್ನಿಸಿದ್ದ. ಆದರೆ, ಘಟನಾ ಸ್ಥಳಕ್ಕೆ ಬಂದ ಮಗ ತನ್ನ ತಂದೆಯ ಮೇಲೆಯೇ ಅನುಮಾನ ವ್ಯಕ್ತಪಡಿಸಿದ್ದು ತನಿಖೆಗೆ ಹೊಸ ತಿರುವು ನೀಡಿತು.

ಸಿಕ್ಕಿಬಿದ್ದದ್ದು ಹೇಗೆ?

ಪೋಲಿಸರ ತನಿಖೆಗೆ ಸಿಸಿಟಿವಿ ದೃಶ್ಯಾವಳಿಗಳು ಅತಿ ದೊಡ್ಡ ಸುಳಿವು ನೀಡಿದವು. ಮಕ್ಕಳೂ ಮನೆಯಿಂದ ಹೊರಹೋದ ಬಳಿಕ ದಂಪತಿ ಮಾತ್ರ ಮನೆಯಲ್ಲಿದ್ದದ್ದು ಮತ್ತು ಕೋಮಲ್ ಅವರ ಚೀರಾಟದ ಶಬ್ದದ ನಂತರ ಕಮಲ್ ಸಿಂಗ್ ಚೀಲವೊಂದನ್ನು ಹಿಡಿದು ಮನೆಯಿಂದ ಹೊರಹೋಗುವುದು ಸಿಸಿಟಿವಿಯಲ್ಲಿ ಸೆರೆಯಾಗಿತ್ತು. ನಂತರ ಪೊಲೀಸರು ಹತ್ಯೆಗೆ ಬಳಸಿದ್ದ ನೈಜ ಅಸ್ತ್ರವನ್ನು ವಶಪಡಿಸಿಕೊಂಡಿದ್ದಾರೆ.

ನೇಪಾಳಕ್ಕೆ ಓಡಿಹೋಗುವ ಪ್ಲಾನ್:

ಕೊಲೆಯ ನಂತರ ಕಮಲ್ ಸಿಂಗ್ ತಮ್ಮ ಬ್ಯಾಂಕ್ ಖಾತೆಯಿಂದ ಸುಮಾರು ₹7 ಲಕ್ಷ ಹಿಂಪಡೆದು ತಲೆಮರೆಸಿಕೊಂಡಿದ್ದ. ತಾಂತ್ರಿಕ ಕಣ್ಣಾವಲಿನ (Technical Surveillance) ಮೂಲಕ ಆತ ಗೋರಖ್‌ಪುರ ಮಾರ್ಗವಾಗಿ ನೇಪಾಳಕ್ಕೆ ಪರಾರಿಯಾಗಲು ಯತ್ನಿಸುತ್ತಿರುವುದು ತಿಳಿದುಬಂತು. ಪೊಲೀಸರನ್ನು ತಪ್ಪಿಸಲು ಆತ ಮಥುರಾದತ್ತ ಮಾರ್ಗ ಬದಲಾಯಿಸಿದರೂ, ಮಥುರಾ ರೈಲ್ವೇ ನಿಲ್ದಾಣದ ಬಳಿ ದೆಹಲಿ ಪೊಲೀಸರು ಆತನನ್ನು ಬಂಧಿಸುವಲ್ಲಿ ಯಶಸ್ವಿಯಾದರು. ಬಂಧನದ ವೇಳೆ ಆತನಿಂದ ₹12.75 ಲಕ್ಷ ನಗದು ಮತ್ತು ಸ್ಕೂಟರ್ ಜಪ್ತಿ ಮಾಡಲಾಗಿದೆ.