ಜರ್ಮನಿಯಲ್ಲಿ ಬಸವತತ್ವದ ಮಹಾಸಂಗಮ: ಮನೆಯನ್ನೇ ಗುರುಮಠವಾಗಿಸಿ ಮಾದರಿಯಾದ ಮಧು–ಅಶ್ವಿನಿ ದಂಪತಿ

ಲೆವರ್ಕುಸೆನ್ (ಜರ್ಮನಿ): ವಿದೇಶದಲ್ಲಿ ನೆಲೆಸಿದ್ದರೂ ಭಾರತೀಯ ಸಂಸ್ಕೃತಿ, ಬಸವತತ್ವ ಮತ್ತು ಗುರುಪರಂಪರೆಯ ಬಗ್ಗೆ ಅಚಲ ಭಕ್ತಿ ಹೊಂದಿರುವ ಶ್ರೀ ಮಧು ಹಾಗೂ ಶ್ರೀಮತಿ ಅಶ್ವಿನಿ ದಂಪತಿಗಳು ತಮ್ಮ ನಿವಾಸವನ್ನೇ ಆಧ್ಯಾತ್ಮಿಕ ಕೇಂದ್ರವನ್ನಾಗಿ ರೂಪಿಸಿ, ಯುರೋಪಿನ ಕನ್ನಡಿಗರಿಗೆ ಮರೆಯಲಾಗದ ಬಸವತತ್ವದ ಮಹಾಸಂಗಮವನ್ನು ಆಯೋಜಿಸಿದರು.

ಪೂಜ್ಯ ಶ್ರೀ ತರಳಬಾಳು ಜಗದ್ಗುರು ಶ್ರೀ ೧೧೦೮ ಡಾ. ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳವರ ದಿವ್ಯ ಸಾನ್ನಿಧ್ಯದಲ್ಲಿ ನಡೆದ ಈ ಕಾರ್ಯಕ್ರಮದಲ್ಲಿ ಜರ್ಮನಿಯ ವಿವಿಧ ನಗರಗಳಿಂದ ಹ ಆಗಮಿಸಿದ್ದ ನೂರಾರು ಭಕ್ತರು, ಕನ್ನಡಿಗರು, ಬಸವಾಭಿಮಾನಿಗಳು ಮತ್ತು ಮಕ್ಕಳಿಂದ ಹಿಡಿದು ಹಿರಿಯರವರೆಗೆ ಉತ್ಸಾಹದಿಂದ ಭಾಗವಹಿಸಿದರು. ದಂಪತಿಗಳ ಮನೆಯ ಅಂಗಳವು ಆ ದಿನ ಭಕ್ತಿ, ಸೇವೆ ಮತ್ತು ಬಸವತತ್ವದ ಜ್ಞಾನಪ್ರಭೆಯಿಂದ ತುಂಬಿ ತುಳುಕಿತು.

ಗುರುಗಳ ಆಗಮನವನ್ನು ಪುಷ್ಪವೃಷ್ಠಿಯೊಂದಿಗೆ ಸ್ವಾಗತಿಸಿದ ಮಧು–ಅಶ್ವಿನಿ ದಂಪತಿಗಳು, ತಮ್ಮ ಕುಟುಂಬದ ಪ್ರತಿಯೊಬ್ಬ ಸದಸ್ಯರನ್ನೂ ಗುರುಸೇವೆಯಲ್ಲಿ ತೊಡಗಿಸಿಕೊಂಡಿದ್ದರು. ಭಕ್ತರಿಗೆ ಆತ್ಮೀಯ ಸ್ವಾಗತ, ಸುಸಜ್ಜಿತ ವ್ಯವಸ್ಥೆ, ಪ್ರಸಾದ ವಿನಿಯೋಗ, ಮಕ್ಕಳಿಂದ ಹಿರಿಯರವರೆಗೆ ಎಲ್ಲರಿಗೂ ಸಮಾನ ಗೌರವ ಮತ್ತು ಸೌಹಾರ್ದಯುತ ಆತಿಥ್ಯ…ಇವೆಲ್ಲವೂ ಅವರ ಸೇವಾ ಮನೋಭಾವಕ್ಕೆ ಜೀವಂತ ಸಾಕ್ಷಿಯಾದವು.

ಕಾರ್ಯಕ್ರಮದಲ್ಲಿ ಶ್ರೀ ಜಗದ್ಗುರುಗಳು ಬಸವಣ್ಣನವರ ಕಾಯಕ, ದಾಸೋಹ, ಸಮಾನತೆ ಮತ್ತು ವಿಶ್ವಮಾನವೀಯತೆ ಕುರಿತಾಗಿ ಅಮೂಲ್ಯ ಸಂದೇಶ ನೀಡಿದರು. ವಚನಗಳ ಮೌಲ್ಯಗಳು ಇಂದಿನ ಜಾಗತಿಕ ಸಮಾಜಕ್ಕೂ ದಾರಿದೀಪವಾಗಿವೆ ಎಂಬ ಸಂದೇಶವನ್ನು ಅವರು ಹೃದಯಸ್ಪರ್ಶಿಯಾಗಿ ಬೋಧಿಸಿದರು. ನೆರೆದಿದ್ದ ಭಕ್ತರು ಅಪಾರ ಭಕ್ತಿಭಾವದಿಂದ ಆಶೀರ್ವಾದ ಪಡೆದು, ಗುರುಗಳೊಂದಿಗೆ ಆತ್ಮೀಯ ಸಂವಾದ ನಡೆಸಿದರು.

ಸೇವೆ ಎಂದರೆ ಕೇವಲ ದಾನವಲ್ಲ; ತನ್ನ ಮನೆ, ಸಮಯ, ಶ್ರಮ ಮತ್ತು ಹೃದಯವನ್ನು ಸಮಾಜಕ್ಕೆ ಅರ್ಪಿಸುವುದು ಎಂಬುದನ್ನು ಮಧು–ಅಶ್ವಿನಿ ದಂಪತಿಗಳು ತಮ್ಮ ನಡೆ-ನುಡಿಗಳ ಮೂಲಕ ಸಾಬೀತುಪಡಿಸಿದರು. ತಮ್ಮ ನಿವಾಸವನ್ನು ಒಂದು ದಿನದ ಮಟ್ಟಿಗೆ ಗುರುಮಠದ ವಾತಾವರಣವಾಗಿ ಪರಿವರ್ತಿಸಿ, ನೂರಾರು ಜನರಿಗೆ ಯಾವುದೇ ಅಹಂಕಾರವಿಲ್ಲದೆ ಸೇವೆ ಸಲ್ಲಿಸಿದ ಅವರ ಸಮರ್ಪಣೆಯು ಯುರೋಪಿನ ಕನ್ನಡಿಗರಿಗೆ ಮಾದರಿಯಾಯಿತು.

ಗುರುಭಕ್ತಿ, ಬಸವತತ್ವದ ಮೇಲಿನ ನಿಷ್ಠೆ ಮತ್ತು ಸಮಾಜಸೇವೆಯ ಮೇಲಿನ ಬದ್ಧತೆ ಒಂದಾದಾಗ ಸಾಮಾನ್ಯ ಮನೆಯೂ ಧರ್ಮಪೀಠವಾಗಿ ರೂಪಾಂತರಗೊಳ್ಳುತ್ತದೆ ಎಂಬುದಕ್ಕೆ ಲೆವರ್ಕುಸೆನ್‌ನ ಈ ಕಾರ್ಯಕ್ರಮವು ಸಜೀವ ಸಾಕ್ಷಿಯಾಯಿತು. ಮಧು–ಅಶ್ವಿನಿ ದಂಪತಿಗಳ ಈ ಸೇವಾನಿಷ್ಠೆ ಕೇವಲ ಒಂದು ಕಾರ್ಯಕ್ರಮದ ಯಶಸ್ಸಲ್ಲ; ವಿದೇಶಿ ನೆಲದಲ್ಲಿಯೂ ಭಾರತೀಯ ಸಂಸ್ಕೃತಿ ಮತ್ತು ಬಸವತತ್ವವನ್ನು ಮುಂದಿನ ಪೀಳಿಗೆಗೆ ತಲುಪಿಸುವ ಮಹತ್ತರ ಸಾಂಸ್ಕೃತಿಕ ಯಜ್ಞವಾಗಿ ಗುರುತಿಸಲ್ಪಟ್ಟಿದೆ.

“ಗುರುವಿಗೆ ಸಮರ್ಪಿತವಾದ ಮನೆ ದೇವಾಲಯವಾಗುತ್ತದೆ; ಸೇವೆಗೆ ಸಮರ್ಪಿತವಾದ ಕುಟುಂಬ ಸಮಾಜಕ್ಕೆ ಆದರ್ಶವಾಗುತ್ತದೆ” ಎಂಬ ಮಾತಿಗೆ ಮಧು–ಅಶ್ವಿನಿ ದಂಪತಿಗಳ ಈ ಸೇವಾ ಸಂಕಲ್ಪವು ಅತ್ಯುತ್ತಮ ಉದಾಹರಣೆಯಾಗಿದೆ.