ಧೂಮಪಾನ ಮುಕ್ತ ಉತ್ಪನ್ನಗಳತ್ತ ಬ್ರಿಟಿಷ್ ಅಮೆರಿಕನ್ ಟೊಬ್ಯಾಕೊ ಚಿತ್ತ: 9000 ಉದ್ಯೋಗ ಕಡಿತಕ್ಕೆ ಮುಹೂರ್ತ!

ನವದೆಹಲಿ: ಜಾಗತಿಕ ತಂಬಾಕು ಉದ್ಯಮದ ದೈತ್ಯ ಕಂಪನಿಯಾದ ಬ್ರಿಟಿಷ್ ಅಮೆರಿಕನ್ ಟೊಬ್ಯಾಕೊ (BAT), ಸಾಂಪ್ರದಾಯಿಕ ಸಿಗರೇಟ್‌ಗಳ ಮಾರುಕಟ್ಟೆ ಕುಸಿತದ ಹಿನ್ನೆಲೆಯಲ್ಲಿ ಬರೋಬ್ಬರಿ 9,000 ಉದ್ಯೋಗಿಗಳನ್ನು ಕೆಲಸದಿಂದ ವಜಾಗೊಳಿಸಲು ಸಿದ್ಧತೆ ನಡೆಸಿದೆ ಎಂದು ಬ್ಲೂಮ್‌ಬರ್ಗ್ ವರದಿ ಮಾಡಿದೆ.

ಕಂಪನಿಯು ಸಾಂಪ್ರದಾಯಿಕ ಧೂಮಪಾನ ವ್ಯವಹಾರದಿಂದ ಹೊರಬಂದು, ಇ-ಸಿಗರೇಟ್ (Vaping) ಮತ್ತು ನಿಕೋಟಿನ್ ಪೌಚ್‌ಗಳಂತಹ ಆಧುನಿಕ “ಧೂಮಪಾನ ಮುಕ್ತ” ಉತ್ಪನ್ನಗಳತ್ತ ಗಮನ ಹರಿಸುತ್ತಿರುವುದೇ ಈ ಭಾರಿ ಬದಲಾವಣೆಗೆ ಮುಖ್ಯ ಕಾರಣವಾಗಿದೆ. ಇದರಿಂದಾಗಿ ಉದ್ಯೋಗ ಕಳೆದುಕೊಳ್ಳುವ ಭೀತಿಯಲ್ಲಿ ನೌಕರರಿದ್ದಾರೆ.

9,000 ಉದ್ಯೋಗಿಗಳ ಭವಿಷ್ಯ ಸಂಕಷ್ಟದಲ್ಲಿ:

ಸದ್ಯ ಅಮೆರಿಕದ ಹೊರಗಿನ ಜಾಗತಿಕ ಮಾರುಕಟ್ಟೆಯಲ್ಲಿ BAT ಕಂಪನಿಯು ಸುಮಾರು 47,000 ಉದ್ಯೋಗಿಗಳನ್ನು ಹೊಂದಿದ್ದು, ಇದರಲ್ಲಿ ಶೇಕಡಾ 20 ರಷ್ಟು ನೌಕರರು ಈ ನಿರ್ಧಾರದಿಂದ ಸಂಕಷ್ಟಕ್ಕೆ ಸಿಲುಕಲಿದ್ದಾರೆ. ಈ ಪುನರ್ರಚನಾ ಯೋಜನೆಯಡಿ ಸುಮಾರು 5,500 ಹುದ್ದೆಗಳನ್ನು ಸಂಪೂರ್ಣವಾಗಿ ರದ್ದುಗೊಳಿಸಲಾಗುತ್ತಿದ್ದು, ಇನ್ನುಳಿದ 3,500 ಹುದ್ದೆಗಳನ್ನು ಈ ವರ್ಷದ ಅಂತ್ಯದೊಳಗೆ ಔಟ್‌ಸೋರ್ಸಿಂಗ್ (ಬಾಹ್ಯ ಕಂಪನಿಗಳಿಗೆ ವಹಿಸುವುದು) ಮಾಡಲು ನಿರ್ಧರಿಸಲಾಗಿದೆ. ಈಗಾಗಲೇ ಕಂಪನಿಯು ತನ್ನ ಪ್ರಮುಖ ಬ್ಯಾಕ್-ಆಫೀಸ್ ಕೆಲಸಗಳನ್ನು ಅಕ್ಸೆಂಚರ್ (Accenture) ಸಂಸ್ಥೆಗೆ ವಹಿಸಿಕೊಟ್ಟಿದೆ.

600 ಮಿಲಿಯನ್ ಪೌಂಡ್ ಉಳಿತಾಯದ ಗುರಿ:

ಈ ಕಠಿಣ ವೆಚ್ಚ ಕಡಿತ ಕ್ರಮಗಳ ಮೂಲಕ 2028ರ ವೇಳೆಗೆ ವಾರ್ಷಿಕವಾಗಿ 600 ಮಿಲಿಯನ್ ಪೌಂಡ್ ಹಣವನ್ನು ಉಳಿಸುವ ಗುರಿಯನ್ನು ಕಂಪನಿ ಹೊಂದಿದೆ. ಈ ಉಳಿತಾಯದ ಹಣವನ್ನು ಭವಿಷ್ಯದ ಹೊಸ ತಂತ್ರಜ್ಞಾನ ಹಾಗೂ ಧೂಮಪಾನ ಮುಕ್ತ ಉತ್ಪನ್ನಗಳ ಸಂಶೋಧನೆ ಮತ್ತು ಮಾರಾಟಕ್ಕೆ ಹೂಡಿಕೆ ಮಾಡಲಾಗುವುದು ಎಂದು ತಿಳಿದುಬಂದಿದೆ. 2026ರಲ್ಲಿ ಜಾಗತಿಕ ಸಿಗರೇಟ್ ಮಾರಾಟದ ಪ್ರಮಾಣವು ಶೇ. 2 ರಷ್ಟು ಕುಸಿಯಲಿದ್ದು, ಕಂಪನಿಯು ತನ್ನ ಭವಿಷ್ಯದ ಒಟ್ಟು ಆದಾಯದ ಅರ್ಧಕ್ಕಿಂತ ಹೆಚ್ಚಿನ ಭಾಗವನ್ನು ಇ-ಸಿಗರೇಟ್‌ಗಳಿಂದಲೇ ಗಳಿಸಲು ಯೋಜನೆ ರೂಪಿಸಿದೆ.

ಇದಲ್ಲದೆ, ಕೃತಕ ಬುದ್ಧಿಮತ್ತೆ (AI), ಆಟೊಮೇಷನ್ ಮತ್ತು ಡೇಟಾ ಅನಾಲಿಟಿಕ್ಸ್ ತಂತ್ರಜ್ಞಾನದ ಬಳಕೆಯನ್ನು ಹೆಚ್ಚಿಸುತ್ತಿರುವುದರಿಂದಲೂ ಹಲವು ಸಾಂಪ್ರದಾಯಿಕ ಉದ್ಯೋಗಗಳು ನಶಿಸುತ್ತಿವೆ ಎಂದು ವರದಿಯಾಗಿದೆ.