8ನೇ ವೇತನ ಆಯೋಗ: ಸರ್ಕಾರಿ ನೌಕರರಿಗೆ 400% ವರೆಗೆ ಸಂಬಳ ಹೆಚ್ಚಳ?

ನವದೆಹಲಿ: ಕೇಂದ್ರ ಸರ್ಕಾರಿ ನೌಕರರು ಮತ್ತು ನಿವೃತ್ತ ವೇತನದಾರರು ಅತ್ಯಂತ ಕುತೂಹಲದಿಂದ ಕಾಯುತ್ತಿರುವ 8ನೇ ವೇತನ ಆಯೋಗದ (8th Pay Commission) ಪ್ರಕ್ರಿಯೆಗಳು ಈಗ ಕೇವಲ ವಾಡಿಕೆಯ ಸಂಬಳ ಹೆಚ್ಚಳದ ಚರ್ಚೆಯಾಗಿ ಉಳಿದಿಲ್ಲ. ದೇಶದ ಆರ್ಥಿಕ ಸಾಮರ್ಥ್ಯ ಮತ್ತು ನೌಕರರ ಬೇಡಿಕೆಗಳ ನಡುವಿನ ದೊಡ್ಡ ಸಂಘರ್ಷವಾಗಿ ಮಾರ್ಪಟ್ಟಿದೆ. ಇದರ ನಡುವೆಯೇ, ಇಂಡಿಯನ್ ರೈಲ್ವೇ ಟೆಕ್ನಿಕಲ್ ಸೂಪರ್‌ವೈಸರ್ಸ್ ಅಸೋಸಿಯೇಷನ್ (IRTSA) ಆಯೋಗದ ಮುಂದೆ ಮಂಡಿಸಿರುವ ಹೊಸ ಪ್ರಸ್ತಾವನೆಯೊಂದು ಭಾರಿ ಸಂಚಲನ ಮೂಡಿಸಿದೆ.

ಹಿಂದಿನ ವೇತನ ಆಯೋಗಗಳಂತೆ ಎಲ್ಲರಿಗೂ ಒಂದೇ ರೀತಿಯ ಫಿಟ್‌ಮೆಂಟ್ ಫ್ಯಾಕ್ಟರ್ (Fitment Factor) ನೀಡುವ ಬದಲು, ಜವಾಬ್ದಾರಿ ಮತ್ತು ಹುದ್ದೆಯ ಆಧಾರದ ಮೇಲೆ 5 ವಿಭಿನ್ನ ಹಂತದ ಫಿಟ್‌ಮೆಂಟ್ ಫಾರ್ಮುಲಾವನ್ನು ಅಸೋಸಿಯೇಷನ್ ಪ್ರಸ್ತಾಪಿಸಿದೆ. ಈ ಸೂತ್ರ ಅನ್ವಯವಾದರೆ ಹಿರಿಯ ಅಧಿಕಾರಿಗಳ ವೇತನದಲ್ಲಿ ಶೇಕಡಾ 400 ಕ್ಕಿಂತಲೂ ಅಧಿಕ ಹೆಚ್ಚಳವಾಗುವ ಸಾಧ್ಯತೆಯಿದೆ.

ಏನಿದು 5 ಹಂತದ ಫಿಟ್‌ಮೆಂಟ್ ಫಾರ್ಮುಲಾ?

ವೇತನ ಆಯೋಗದಲ್ಲಿ ಹೊಸ ಮೂಲ ವೇತನವನ್ನು (Basic Pay) ಲೆಕ್ಕ ಹಾಕಲು ಪ್ರಸ್ತುತ ಇರುವ ಮೂಲ ವೇತನಕ್ಕೆ ‘ಫಿಟ್‌ಮೆಂಟ್ ಫ್ಯಾಕ್ಟರ್’ ಅನ್ನು ಗುಣಿಸಲಾಗುತ್ತದೆ. 7ನೇ ವೇತನ ಆಯೋಗದಲ್ಲಿ ಇದನ್ನು 2.57 ರಷ್ಟಕ್ಕೆ ನಿಗದಿಪಡಿಸಲಾಗಿತ್ತು. ಆದರೆ ಈಗ ಜೂನಿಯರ್ ಮತ್ತು ಸೀನಿಯರ್ ನೌಕರರ ನಡುವಿನ ವೇತನದ ಅಂತರವನ್ನು ಸರಿಪಡಿಸಲು IRTSA ಈ ಕೆಳಗಿನಂತೆ ಹಂತ ಹಂತದ ಮಲ್ಟಿಪ್ಲೈಯರ್ ಪ್ರಸ್ತಾಪಿಸಿದೆ:

ಲೆವೆಲ್ 1 ರಿಂದ 5 (ಕಿರಿಯ ಸಿಬ್ಬಂದಿ): 2.92 ಫಿಟ್‌ಮೆಂಟ್ ಫ್ಯಾಕ್ಟರ್

ಲೆವೆಲ್ 6 ರಿಂದ 8 (ಮಧ್ಯಮ ತಾಂತ್ರಿಕ ಸಿಬ್ಬಂದಿ): 3.50 ಫಿಟ್‌ಮೆಂಟ್ ಫ್ಯಾಕ್ಟರ್

ಲೆವೆಲ್ 9 ರಿಂದ 12 (ಹಿರಿಯ ಇಂಜಿನಿಯರ್‌ಗಳು/ಮ್ಯಾನೇಜರ್‌ಗಳು): 3.80 ಫಿಟ್‌ಮೆಂಟ್ ಫ್ಯಾಕ್ಟರ್

ಲೆವೆಲ್ 13 ರಿಂದ 16 (ಉನ್ನತ ನಿರ್ವಹಣೆ): 4.09 ಫಿಟ್‌ಮೆಂಟ್ ಫ್ಯಾಕ್ಟರ್

ಲೆವೆಲ್ 17 ರಿಂದ 18 (ಉನ್ನತ ಕಾರ್ಯನಿರ್ವಾಹಕರು/ಕಾರ್ಯದರ್ಶಿಗಳು): 4.38 ಫಿಟ್‌ಮೆಂಟ್ ಫ್ಯಾಕ್ಟರ್

ಸಂಬಳದ ಮೇಲಾಗುವ ಪರಿಣಾಮ:

ಈ ಹೊಸ ಸೂತ್ರವನ್ನು ಆಯೋಗ ಒಪ್ಪಿಕೊಂಡರೆ, ಲೆವೆಲ್ 17-18 ರ ಅಡಿಯಲ್ಲಿ 2.5 ಲಕ್ಷ ರೂ. ಮೂಲ ವೇತನ ಹೊಂದಿರುವ ಹಿರಿಯ ಅಧಿಕಾರಿಯ ಹೊಸ ಮೂಲ ವೇತನ ಬರೋಬ್ಬರಿ 10.95 ಲಕ್ಷ ರೂ.ಗೆ ಏರಲಿದೆ. ಹಾಗೆಯೇ ಲೆವೆಲ್ 6-8 ರ ಸಿಬ್ಬಂದಿಯ 45,000 ರೂ. ಮೂಲ ವೇತನವು 1.57 ಲಕ್ಷ ರೂ.ಗೆ ಜಿಗಿಯಲಿದೆ.

ನೌಕರರ ಇತರ ಪ್ರಮುಖ ಬೇಡಿಕೆಗಳೇನು?

ವೇತನ ಹೆಚ್ಚಳದ ಜೊತೆಗೆ ನೌಕರರ ಸಂಘಟನೆಗಳು ಪ್ರಮುಖ ಮೂರು ಬೇಡಿಕೆಗಳನ್ನು ಆಯೋಗದ ಮುಂದಿಟ್ಟಿವೆ:

ವಾರ್ಷಿಕ ವೇತನ ಬಡ್ತಿ ಹೆಚ್ಚಳ: ಸದ್ಯ ಇರುವ ಶೇ. 3 ರ ವಾರ್ಷಿಕ ಇನ್ಕ್ರಿಮೆಂಟ್ ಅನ್ನು ಶೇ. 5 ಕ್ಕೆ ಏರಿಸಬೇಕು.

ಡಿಎ ವಿಲೀನ: ಹೊಸ ವೇತನ ಲೆಕ್ಕಾಚಾರಕ್ಕೂ ಮುನ್ನ ಶೇ. 50 ರಷ್ಟು ತುಟ್ಟಿಭತ್ಯೆಯನ್ನು (Dearness Allowance) ಮೂಲ ವೇತನಕ್ಕೆ ಸೇರಿಸಬೇಕು.

ಫ್ಯಾಮಿಲಿ ಯೂನಿಟ್’ ಬದಲಾವಣೆ: ಕನಿಷ್ಠ ವೇತನ ನಿರ್ಧಾರಕ್ಕೆ ಬಳಸುವ ಕುಟುಂಬದ ಸದಸ್ಯರ ಮಾನದಂಡವನ್ನು 3 ರಿಂದ 5 ಕ್ಕೆ ಹೆಚ್ಚಿಸಬೇಕು. ಇಂದಿನ ಕಾಲದಲ್ಲಿ ವಯಸ್ಸಾದ ಪೋಷಕರು ಮತ್ತು ಮಕ್ಕಳ ಶಿಕ್ಷಣದ ವೆಚ್ಚ ನಿಭಾಯಿಸಲು ಇದು ಅನಿವಾರ್ಯ ಎಂದು ನೌಕರರು ವಾದಿಸುತ್ತಿದ್ದಾರೆ.

ಪಿಂಚಣಿ ವಿಚಾರದಲ್ಲಿ ಮಧ್ಯಮ ಮಾರ್ಗ?

ಹಳೆಯ ಪಿಂಚಣಿ ಯೋಜನೆ (OPS) ಮರುಸ್ಥಾಪನೆಗಾಗಿ ನೌಕರರ ಒತ್ತಾಯ ಮುಂದುವರಿದಿದ್ದರೂ, ಇಷ್ಟು ವರ್ಷಗಳ ನಂತರ ಎನ್‌ಪಿಎಸ್ (NPS) ಅನ್ನು ಸಂಪೂರ್ಣವಾಗಿ ರದ್ದು ಮಾಡುವುದು ಕಷ್ಟ ಎಂಬುದನ್ನು ನೌಕರರ ಸಂಘಟನೆಗಳೂ ಖಾಸಗಿಯಾಗಿ ಒಪ್ಪಿಕೊಳ್ಳುತ್ತಿವೆ. ಹೀಗಾಗಿ, ಸಂಪೂರ್ಣ ರೋಲ್‌ಬ್ಯಾಕ್ ಮಾಡುವ ಬದಲು ‘ಒಪಿಎಸ್ ಮಾದರಿಯ ರಕ್ಷಣೆ’ ಅಂದರೆ ಕನಿಷ್ಠ ಖಾತರಿಯ ಪಿಂಚಣಿ ಮತ್ತು ತುಟ್ಟಿಭತ್ಯೆ ಆಧಾರಿತ ಪಿಂಚಣಿ ಸುರಕ್ಷತೆಯನ್ನು ಒದಗಿಸುವಂತೆ ಒತ್ತಾಯಿಸಲಾಗುತ್ತಿದೆ.

ಸರ್ಕಾರದ ಮುಂದಿರುವ ಸವಾಲು:

ನ್ಯಾಯಮೂರ್ತಿ (ನಿವೃತ್ತ) ರಂಜನಾ ಪ್ರಕಾಶ್ ದೇಸಾಯಿ ನೇತೃತ್ವದ 8ನೇ ವೇತನ ಆಯೋಗವು ಪ್ರಸ್ತುತ ದೇಶಾದ್ಯಂತ ತೀವ್ರ ಸಮಾಲೋಚನೆ ನಡೆಸುತ್ತಿದ್ದು, ಜುಲೈ 6 ಮತ್ತು 7 ರಂದು ಭುವನೇಶ್ವರದಲ್ಲಿ ಸಭೆ ನಿಗದಿಪಡಿಸಿದೆ. ಈ ಆಯೋಗದ ಶಿಫಾರಸುಗಳು ದೇಶದ ಸುಮಾರು 1.1 ಕೋಟಿ ಕೇಂದ್ರ ಸರ್ಕಾರಿ ನೌಕರರು ಮತ್ತು ನಿವೃತ್ತ ಪಿಂಚಣಿದಾರರ ಮೇಲೆ ನೇರ ಪರಿಣಾಮ ಬೀರಲಿವೆ. ಆದರೆ, ಹೆಚ್ಚುತ್ತಿರುವ ಹಣದುಬ್ಬರ ಮತ್ತು ಆರ್ಥಿಕ ಹೊರೆಯ ನಡುವೆ ಸರ್ಕಾರ ಇಷ್ಟೊಂದು ಭಾರಿ ಪ್ರಮಾಣದ ಹೆಚ್ಚಳಕ್ಕೆ ಒಪ್ಪಿಗೆ ನೀಡುತ್ತದೆಯೇ ಅಥವಾ ಮಧ್ಯಮ ಮಾರ್ಗವನ್ನು ಕಂಡುಕೊಳ್ಳುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.