ಬೆಂಗಳೂರು: ರೀಲ್ಸ್ ಗೀಳು, 9 ಕೋಟಿ ವೀಕ್ಷಣೆ… NEET ಓದುತ್ತಿದ್ದ ವಿದ್ಯಾರ್ಥಿನಿಯರ ಭವಿಷ್ಯವೇ ಬುಡಮೇಲು!

ಬೆಂಗಳೂರು: ವೈದ್ಯಕೀಯ ಪ್ರವೇಶ ಪರೀಕ್ಷೆಯ (NEET) ತಯಾರಿಗಾಗಿ ಬೆಂಗಳೂರಿನ ಹಾಸ್ಟೆಲ್‌ನಲ್ಲಿ ಉಳಿದುಕೊಂಡಿದ್ದ ಇಬ್ಬರು ವಿದ್ಯಾರ್ಥಿನಿಯರು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುವ ಭರದಲ್ಲಿ ತಮ್ಮ ಶಿಕ್ಷಣ ಹಾಗೂ ಭವಿಷ್ಯವನ್ನು ಸಂಕಷ್ಟಕ್ಕೆ ತಂದುಕೊಂಡ ಘಟನೆ ವರದಿಯಾಗಿದೆ.

ಘಟನೆಯ ವಿವರ:

ಪರೀಕ್ಷಾ ಸಿದ್ಧತೆಯ ನಡುವೆ ಇಬ್ಬರೂ ವಿದ್ಯಾರ್ಥಿನಿಯರು ರೀಲ್ಸ್ ಮಾಡುವ ಹುಚ್ಚಿಗೆ ಬಿದ್ದಿದ್ದು, ಹಾಸ್ಟೆಲ್ ಕೊಠಡಿಯಲ್ಲಿ ಆಕ್ಷೇಪಾರ್ಹ ಹಾಗೂ ಅತಿರೇಕದ ರೀತಿಯಲ್ಲಿ ವಿಡಿಯೋ ಚಿತ್ರೀಕರಿಸಿ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದರು. ಕೇವಲ ಎರಡೇ ದಿನಗಳಲ್ಲಿ ಈ ವಿಡಿಯೋ ಕಾಳ್ಗಿಚ್ಚಿನಂತೆ ಹರಡಿ, ಬರೋಬ್ಬರಿ 90 ಮಿಲಿಯನ್‌ಗೂ (9 ಕೋಟಿ) ಅಧಿಕ ವೀಕ್ಷಣೆ ಪಡೆದುಕೊಂಡಿತ್ತು. ಈ ವಿಡಿಯೋ ವಿದ್ಯಾರ್ಥಿನಿಯೊಬ್ಬಳ ಸಹೋದರನ ಕಣ್ಣಿಗೆ ಬಿದ್ದು, ತಕ್ಷಣವೇ ಆತ ಪೋಷಕರಿಗೆ ಮಾಹಿತಿ ನೀಡಿದ್ದಾನೆ.

ಪೋಷಕರ ಆಘಾತ ಹಾಗೂ ಕಠಿಣ ನಿರ್ಧಾರ:

ವಿಷಯ ತಿಳಿದು ತೀವ್ರ ಆಘಾತಕ್ಕೊಳಗಾದ ಪೋಷಕರು ಬೆಂಗಳೂರಿಗೆ ಧಾವಿಸಿ ಮಗಳನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಈ ವೇಳೆ ಕೇವಲ “ಲೈಕ್ಸ್ ಹಾಗೂ ಫಾಲೋವರ್ಸ್ ಗಳಿಸುವ ಉದ್ದೇಶದಿಂದಷ್ಟೇ ಈ ವಿಡಿಯೋ ಮಾಡಿದೆವು” ಎಂದು ವಿದ್ಯಾರ್ಥಿನಿ ಸಮರ್ಥಿಸಿಕೊಳ್ಳಲು ಯತ್ನಿಸಿದ್ದಾಳೆ. ಆದರೆ ಮಗಳ ಬೇಜವಾಬ್ದಾರಿಯುತ ನಡವಳಿಕೆಯಿಂದ ಮನನೊಂದ ಪೋಷಕರು, ವೈದ್ಯಕೀಯ ವ್ಯಾಸಂಗವನ್ನು ಮೊಟಕುಗೊಳಿಸಿ ಆಕೆಯನ್ನು ಬಲವಂತವಾಗಿ ಊರಿಗೆ ವಾಪಸ್ ಕರೆದೊಯ್ದಿದ್ದಾರೆ.

ಸಾಮಾಜಿಕ ಮಾಧ್ಯಮಗಳಲ್ಲಿ ಸಿಗುವ ಕ್ಷಣಿಕ ಜನಪ್ರಿಯತೆಯ ಭರದಲ್ಲಿ ಯುವಪೀಳಿಗೆ ತಮ್ಮ ಜವಾಬ್ದಾರಿ, ಕುಟುಂಬದ ಗೌರವ ಮತ್ತು ಭವಿಷ್ಯವನ್ನು ಮರೆಯುತ್ತಿರುವುದು ಸಾರ್ವಜನಿಕ ವಲಯದಲ್ಲಿ ತೀವ್ರ ಕಳವಳಕ್ಕೆ ಕಾರಣವಾಗಿದೆ.