ಅನು ಮೀನಾ ಆತ್ಮಹತ್ಯೆ ಪ್ರಕರಣ: ‘ಬ್ಲ್ಯಾಕ್‌ಮೇಲ್ ಮಾಡಲಾಗುತ್ತಿದೆ, ತನಿಖೆಗೆ ಸಿದ್ಧ’ ಎಂದ PWD ಎಕ್ಸಿಕ್ಯೂಟಿವ್ ಇಂಜಿನಿಯರ್ ಗೌತಮ್ ಮೀನಾ!

ಜೈಪುರ: ಇಡೀ ದೇಶಾದ್ಯಂತ ಭಾರಿ ಆಕ್ರೋಶ ಮೂಡಿಸಿರುವ ಜೈಪುರದ ಅನು ಮೀನಾ ಆತ್ಮಹತ್ಯೆ ಪ್ರಕರಣಕ್ಕೆ ಈಗ ಹೊಸ ತಿರುವು ಸಿಕ್ಕಿದೆ.

ಪ್ರಕರಣದ ಮುಖ್ಯ ಆರೋಪಿ ಹಾಗೂ ಸಾರ್ವಜನಿಕ ನಿರ್ಮಾಣ ಇಲಾಖೆಯ (PWD) ಕಾರ್ಯಪಾಲಕ ಎಂಜಿನಿಯರ್ (XEN) ಆಗಿರುವ ಪತಿ ಗೌತಮ್ ಮೀನಾ ಇದೀಗ ವಿಡಿಯೋ ಹೇಳಿಕೆಯೊಂದನ್ನು ಬಿಡುಗಡೆ ಮಾಡಿದ್ದು, ತಮಗೆ “ಬ್ಲ್ಯಾಕ್‌ಮೇಲ್” ಮಾಡಲಾಗುತ್ತಿದೆ ಎಂದು ಆರೋಪಿಸಿದ್ದಾರೆ. ಜೊತೆಗೆ ತನಿಖೆಗೆ ಸಂಪೂರ್ಣ ಸಹಕಾರ ನೀಡುವುದಾಗಿ ತಿಳಿಸಿದ್ದಾರೆ.

ಘಟನೆಯ ಹಿನ್ನೆಲೆ: ಕಳೆದ ಏಪ್ರಿಲ್ 7 ರಂದು ಜೈಪುರದಲ್ಲಿ 36 ವರ್ಷದ ಅನು ಮೀನಾ ಆತ್ಮಹತ್ಯೆ ಮಾಡಿಕೊಂಡಿದ್ದರು. ಆರಂಭದಲ್ಲಿ ಇದನ್ನು ಸಾಮಾನ್ಯ ಆತ್ಮಹತ್ಯೆ ಎಂದು ಭಾವಿಸಲಾಗಿತ್ತು. ಆದರೆ ಸಾವಿನ 40 ದಿನಗಳ ನಂತರ ಅನು ಮೀನಾ ಅವರ ಮೊಬೈಲ್‌ನಿಂದ ದಿಕ್ಭ್ರಮೆಗೊಳಿಸುವ ಸಿಸಿಟಿವಿ ದೃಶ್ಯಾವಳಿಗಳು, ಆಡಿಯೋ ಮತ್ತು ವಿಡಿಯೋ ರೆಕಾರ್ಡಿಂಗ್‌ಗಳನ್ನು ಕುಟುಂಬಸ್ಥರು ಪತ್ತೆಹಚ್ಚಿದ್ದಾರೆ. ಈ ದೃಶ್ಯಗಳಲ್ಲಿ ಪತಿ ಗೌತಮ್ ಮೀನಾ ಪತ್ನಿಗೆ ಕ್ರೂರವಾಗಿ ಥಳಿಸುತ್ತಿರುವುದು, ಮನೆಯ ವಸ್ತುಗಳನ್ನು ಹಾಗೂ ಟಿವಿಯನ್ನು ಧ್ವಂಸಗೊಳಿಸುತ್ತಿರುವುದು ಸೆರೆಯಾಗಿದೆ. ಈ ಸಾಕ್ಷ್ಯಗಳ ಆಧಾರದ ಮೇಲೆ ಕುಟುಂಬಸ್ಥರು ವರದಕ್ಷಿಣೆ ಕಿರುಕುಳ ಮತ್ತು ಕೊಲೆಗೆ ಪ್ರಚೋದನೆ ನೀಡಿದ ಆರೋಪದಡಿ ದೂರು ದಾಖಲಿಸಿದ್ದಾರೆ.

ಆರೋಪಿ ಪತಿಯ ಸರಣಿ ವಾದಗಳು: ಪ್ರಕರಣ ಬೆಳಕಿಗೆ ಬರುತ್ತಿದ್ದಂತೆ ತಲೆಮರೆಸಿಕೊಂಡಿದ್ದ ಗೌತಮ್ ಮೀನಾ ಈಗ ವಿಡಿಯೋ ಮೂಲಕ ತಮ್ಮ ವಾದ ಮಂಡಿಸಿದ್ದಾರೆ:

ಆಸ್ತಿ ವರ್ಗಾವಣೆ: ತನ್ನ ಜೀವಮಾನದ ಗಳಿಕೆಯ ಶೇಕಡಾ 70 ರಷ್ಟು ಆಸ್ತಿಯನ್ನು (ಜೈಪುರ ಮತ್ತು ಚೋಮುನಲ್ಲಿರುವ ಪ್ಲಾಟ್‌ಗಳು) ಅನು ಮೀನಾ ಹೆಸರಲ್ಲೇ ನೋಂದಣಿ ಮಾಡಿಸಲಾಗಿತ್ತು ಎಂದು ಗೌತಮ್ ಕ್ಲೈಮ್ ಮಾಡಿದ್ದಾರೆ.

ಆತ್ಮಹತ್ಯೆಯ ದಿನ ಏನಾಯಿತು?: ಏಪ್ರಿಲ್ 7 ರಂದು ಬೆಳಿಗ್ಗೆ ಮಕ್ಕಳನ್ನು ಸ್ಕೂಲ್ ಬಸ್‌ಗೆ ಹತ್ತಿಸಿ ನಾನು ಚೋಮುಗೆ ಕೆಲಸದ ನಿಮಿತ್ತ ಹೊರಟಿದ್ದೆ. ಮಾರ್ಗಮಧ್ಯೆ ಅನು ವಾಟ್ಸಾಪ್ ವಿಡಿಯೋ ಕಾಲ್ ಮಾಡಿ ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಬೆದರಿಸಿದಳು. ನಾನು ತಕ್ಷಣ ನೆರೆಹೊರೆಯವರಿಗೆ ಕರೆ ಮಾಡಿ ಗೇಟ್ ಒಡೆಯಲು ಹೇಳಿದೆ. ಆದರೆ ಅಷ್ಟರಲ್ಲೇ ತಡವಾಗಿತ್ತು ಎಂದು ಗೌತಮ್ ಹೇಳಿದ್ದಾರೆ.

ಬ್ಲ್ಯಾಕ್‌ಮೇಲ್ ಆರೋಪ: ಅನು ಸಾವಿನ ನಂತರ ಆಕೆಯ ಮನೆಯವರು ನನ್ನ ಅನುಪಸ್ಥಿತಿಯಲ್ಲಿ ಮನೆಯಲ್ಲಿದ್ದ ಚಿನ್ನಾಭರಣ, ಆಸ್ತಿ ಪತ್ರಗಳು, ಮೊಬೈಲ್ ಹಾಗೂ ಸಿಸಿಟಿವಿ ರೆಕಾರ್ಡಿಂಗ್‌ಗಳನ್ನು ಕದ್ದೊಯ್ದಿದ್ದಾರೆ. ನನ್ನ ಮಕ್ಕಳನ್ನು ನನ್ನಿಂದ ದೂರವಿಟ್ಟು, ಅವರಿಗೆ ಇಲ್ಲಸಲ್ಲದನ್ನು ಹೇಳಿಕೊಟ್ಟು ನನ್ನ ವಿರುದ್ಧವೇ ತಿರುಗಿಸಿದ್ದಾರೆ. ನನ್ನ ಕೆಲಸವನ್ನು ಕಳೆದು ನನ್ನನ್ನು ಬರ್ಬಾದ್ ಮಾಡಲು ಸಂಚು ಹೂಡಿದ್ದಾರೆ ಎಂದು ಗೌತಮ್ ಆರೋಪಿಸಿದ್ದಾರೆ.

ಪ್ರಸ್ತುತ ಮುಹಾನಾ ಪೊಲೀಸ್ ಠಾಣೆಯ ಅಧಿಕಾರಿಗಳು ಸಿಸಿಟಿವಿ ದೃಶ್ಯಾವಳಿ, ಬ್ಯಾಂಕ್ ವಹಿವಾಟು ಹಾಗೂ ಮೊಬೈಲ್ ದಾಖಲೆಗಳನ್ನು ವಶಕ್ಕೆ ಪಡೆದು ತನಿಖೆಯನ್ನು ತೀವ್ರಗೊಳಿಸಿದ್ದಾರೆ.