ನಿಮ್ಮ ಕದ್ದ ಮೊಬೈಲ್ ಬಾಂಗ್ಲಾ, ನೇಪಾಳ ಸೇರುತ್ತಿದ್ದದ್ದು ಹೇಗೆ?, 10 ಮಂದಿ ಬಂಧಿಸಿದ ದೆಹಲಿ ಪೊಲೀಸರು ಬಿಚ್ಚಿಟ್ಟ ಹವಾಲ ದಂಧೆಯ ರೋಚಕ ಕಥೆ!

ನವದೆಹಲಿ: ದೇಶದ ರಾಜಧಾನಿಯಲ್ಲಿ ಸಕ್ರಿಯವಾಗಿದ್ದ ಬೃಹತ್ ಅಂತರರಾಷ್ಟ್ರೀಯ ಮತ್ತು ಅಂತರರಾಜ್ಯ ಮೊಬೈಲ್ ಕಳ್ಳಸಾಗಣೆ (Smuggling) ಜಾಲವನ್ನು ದೆಹಲಿಯ ರೋಹಿಣಿ ಜಿಲ್ಲಾ ಪೊಲೀಸರು ಯಶಸ್ವಿಯಾಗಿ ಧ್ವಂಸಗೊಳಿಸಿದ್ದಾರೆ.

ಕಾರ್ಯಾಚರಣೆಯಲ್ಲಿ ಬರೋಬ್ಬರಿ 1 ಕೋಟಿ ರೂಪಾಯಿ ಮೌಲ್ಯದ 325 ಕದ್ದ ಮೊಬೈಲ್ ಫೋನ್‌ಗಳನ್ನು ವಶಪಡಿಸಿಕೊಳ್ಳಲಾಗಿದ್ದು, ಜಾಲದ ನಂಟು ಹೊಂದಿದ್ದ 10 ಮಂದಿ ಆರೋಪಿಗಳನ್ನು ಬಂಧಿಸಲಾಗಿದೆ.

ಬಂಧಿತ ಆರೋಪಿಗಳು ದೆಹಲಿಯ ವಿವಿಧ ಭಾಗಗಳಲ್ಲಿ ಸಾರ್ವಜನಿಕರಿಂದ ಮೊಬೈಲ್ ಕಿತ್ತುಕೊಂಡು (Snatched), ಅವುಗಳನ್ನು ಅತ್ಯಂತ ವ್ಯವಸ್ಥಿತವಾಗಿ ನೆರೆರಾಷ್ಟ್ರಗಳಾದ ನೇಪಾಳ ಮತ್ತು ಬಾಂಗ್ಲಾದೇಶಕ್ಕೆ ಸಾಗಿಸುತ್ತಿದ್ದರು ಎಂದು ಉತ್ತರ ವಲಯದ ಜಂಟಿ ಪೊಲೀಸ್ ಕಮಿಷನರ್ ವಿಜಯ್ ಸಿಂಗ್ ಖಚಿತಪಡಿಸಿದ್ದಾರೆ.

ಕೇವಲ 5,000 ರೂಪಾಯಿಗೆ ಡೀಲ್!

ದೆಹಲಿಯ ರಸ್ತೆಗಳಲ್ಲಿ ಸಾರ್ವಜನಿಕರಿಂದ ಮೊಬೈಲ್ ಕದಿಯುತ್ತಿದ್ದ ರಾಜಾ ಎಂಬಾತನನ್ನು ವಿಚಾರಣೆ ನಡೆಸಿದಾಗ ಈ ದಂಧೆಯ ಅಸಲಿ ಮುಖವಾಡ ಬಯಲಾಗಿದೆ. ಕದ್ದ ಫೋನ್‌ಗಳನ್ನು ಮಂಗೋಲಪುರಿ ನಿವಾಸಿ ಗೋವಿಂದ್ ಎಂಬಾತನಿಗೆ ಕೇವಲ ₹5,000 ರೂಪಾಯಿಗೆ ಮಾರಾಟ ಮಾಡಲಾಗುತ್ತಿತ್ತು. ಗೋವಿಂದ್ ಜೇಬಿನಲ್ಲಿದ್ದ ಚೀಟಿಯೊಂದು ಕೋಲ್ಕತ್ತಾಗೆ ರವಾನಿಸಲು ಸಿದ್ಧವಾಗಿದ್ದ 101 ಫೋನ್‌ಗಳ ಬೇಡಿಕೆಯ ವಿವರವನ್ನು ಬಿಚ್ಚಿಟ್ಟಿದೆ.

ಹವಾಲಾ ಮತ್ತು ಕೋರಿಯರ್ ಲಿಂಕ್:

ರೋಹಿಣಿ ಮೂಲದ ಅಜಯ್ ಮತ್ತು ಅಲಿ ಖಾನ್ ಎಂಬುವರು ಬಾಡಿಗೆ ಗೋದಾಮಿನಲ್ಲಿ ಈ ಫೋನ್‌ಗಳನ್ನು ಪ್ರೊಫೆಷನಲ್ ಆಗಿ ಪ್ಯಾಕ್ ಮಾಡುತ್ತಿದ್ದರು. ಖಾಸಗಿ ಕೊರಿಯರ್ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದ ವಿಕ್ರಮ್ ಮತ್ತು ವಿನಯ್ ಎಂಬ ಇಬ್ಬರು ವಾಟ್ಸಾಪ್ ಮೂಲಕ ಸಂವಹನ ನಡೆಸಿ, ಈ ಪಾರ್ಸೆಲ್‌ಗಳನ್ನು ಪಶ್ಚಿಮ ಬಂಗಾಳದ ಮಾಲ್ಡಾ ಮತ್ತು ಮುರ್ಷಿದಾಬಾದ್‌ಗೆ ಸುರಕ್ಷಿತವಾಗಿ ತಲುಪಿಸುತ್ತಿದ್ದರು. ಅಲ್ಲಿಂದ ಮೊಹಮ್ಮದ್ ಶೈದುಲ್ ಇಸ್ಲಾಂ ಮತ್ತು ಶಬುದ್ದೀನ್ ಸಾಹಿಬ್ ಎಂಬ ಏಜೆಂಟರು ಇವುಗಳನ್ನು ಬಾಂಗ್ಲಾದೇಶದ ಗಡಿ ದಾಟಿಸುತ್ತಿದ್ದರು. ಈ ಇಡೀ ನೆಟ್‌ವರ್ಕ್‌ನ ಹಣಕಾಸು ವಹಿವಾಟು ಸಂಪೂರ್ಣವಾಗಿ ‘ಹವಾಲಾ’ (Hawala Network) ಮೂಲಕ ನಡೆಯುತ್ತಿತ್ತು ಎಂದು ಡಿಸಿಪಿ ಶಶಾಂಕ್ ಜೈಸ್ವಾಲ್ ತಿಳಿಸಿದ್ದಾರೆ.

ಉತ್ತರ ಪ್ರದೇಶ ಮಾರ್ಗವಾಗಿ ನೇಪಾಳಕ್ಕೆ ಎಂಟ್ರಿ:

ಇದೇ ಗ್ಯಾಂಗ್ ಮತ್ತೊಂದು ತಂಡದ ಮೂಲಕ ಉತ್ತರ ಪ್ರದೇಶದ ರಸ್ತೆಯ ಮಾರ್ಗವಾಗಿ ನೇಪಾಳಕ್ಕೆ ಫೋನ್‌ಗಳನ್ನು ಕಳಿಸುತ್ತಿತ್ತು. ಈ ಲಿಂಕ್ ಮೇರೆಗೆ ಪೊಲೀಸರು ಸಂಜೀವ್ ಮತ್ತು ಸನ್ನಿ ಕುಮಾರ್ ಎಂಬುವರನ್ನು ಬಂಧಿಸಿ ಹೆಚ್ಚುವರಿ 124 ಫೋನ್‌ಗಳನ್ನು ವಶಕ್ಕೆ ಪಡೆದಿದ್ದಾರೆ. ಬಂಧಿತರು ಇದುವರೆಗೆ 12,000 ಕ್ಕೂ ಹೆಚ್ಚು ಫೋನ್‌ಗಳನ್ನು ಗಡಿ ದಾಟಿಸಿರುವುದಾಗಿ ಒಪ್ಪಿಕೊಂಡಿದ್ದಾರೆ.

ಕೆಲವೊಮ್ಮೆ ಫೋನ್‌ಗಳ ಲಾಕ್ ತೆರೆಯದೇ ಹಾಗೆಯೇ ಮಾರಾಟ ಮಾಡಿದರೆ, ಇನ್ನು ಕೆಲವು ಬಾರಿ ಡೇಟಾ ಆಕ್ಸೆಸ್ ಮಾಡಲು ಪಾಸ್‌ವರ್ಡ್ ರಿಸೆಟ್ ಮಾಡಿ ಬಳಕೆದಾರರ ವೈಯಕ್ತಿಕ ಮಾಹಿತಿ ಹಾಗೂ ಡೇಟಾವನ್ನು ಬೇರೆ ದೇಶಗಳಿಗೆ ಮಾರಾಟ ಮಾಡುತ್ತಿದ್ದ ಆಘಾತಕಾರಿ ಅಂಶವೂ ಬೆಳಕಿಗೆ ಬಂದಿದೆ. ಸದ್ಯ ಬಾಂಗ್ಲಾದೇಶದಲ್ಲಿರುವ ಇದರ ಮಾಸ್ಟರ್‌ಮೈಂಡ್ ಪತ್ತೆಗೆ ಪೊಲೀಸರು ಜಾಲ ಬೀಸಿದ್ದಾರೆ.