ಕರುಳು ಹಿಂಡುವ ಘಟನೆ: ತಾಯಿಯನ್ನು ರಕ್ಷಿಸಲು ಹೋಗಿ ಬಸ್ಸಿನ ಬೆಂಕಿಯಲ್ಲೇ ಕೊನೆಯುಸಿರೆಳೆದ ಮಗ!

ಗ್ರೇಟರ್ ನೋಯ್ಡಾ:ಉತ್ತರ ಪ್ರದೇಶದ ಗ್ರೇಟರ್ ನೋಯ್ಡಾ ವ್ಯಾಪ್ತಿಯ ಯಮುನಾ ಎಕ್ಸ್‌ಪ್ರೆಸ್‌ವೇನಲ್ಲಿ ತಡರಾತ್ರಿ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಚಲಿಸುತ್ತಿದ್ದ ಪ್ರವಾಸಿ ಬಸ್ಸಿನಲ್ಲಿ ದಿಢೀರ್ ಬೆಂಕಿ ಕಾಣಿಸಿಕೊಂಡು 9 ಮಂದಿ ಪ್ರಯಾಣಿಕರು ದುರಂತವಾಗಿ ಸಜೀವ ದಹನಗೊಂಡಿದ್ದಾರೆ.

ಚಾಲಕನ ಉಡಾಫೆಗೆ ಒಂಬತ್ತು ಬಲಿ:

ಮಾಹಿತಿಯ ಪ್ರಕಾರ, ಬಸ್ಸು ವೇಗವಾಗಿ ಚಲಿಸುತ್ತಿದ್ದಾಗ ಒಳಗೆ ಹೊಗೆ ಆವರಿಸಲು ಪ್ರಾರಂಭಿಸಿತು. ಇದನ್ನು ತಕ್ಷಣವೇ ಗಮನಿಸಿದ ಜಾಗರೂಕ ಪ್ರಯಾಣಿಕರು ಚಾಲಕ ಮತ್ತು ಕ್ಲೀನರ್‌ಗೆ ಎಚ್ಚರಿಕೆ ನೀಡಿ ಬಸ್ಸನ್ನು ನಿಲ್ಲಿಸುವಂತೆ ವಿನಂತಿಸಿದರು. ಆದರೆ, “ಹೊರಗಿನಿಂದ ಹೊಗೆ ಬರುತ್ತಿರಬಹುದು, ಬಸ್ಸಿನಲ್ಲಿ ಯಾವುದೇ ತೊಂದರೆಯಿಲ್ಲ” ಎಂದು ಉಡಾಫೆಯಾಗಿ ಉತ್ತರಿಸಿದ ಚಾಲಕ ಪ್ರಯಾಣಿಕರ ಮನವಿಯನ್ನು ನಿರ್ಲಕ್ಷಿಸಿ ಚಾಲನೆ ಮುಂದುವರಿಸಿದ್ದಾನೆ.

ಎಸಿ ಸ್ಫೋಟ – ಕರುಣಾಜನಕ ಸಾವು:

ಇದಾದ ಕೆಲವೇ ನಿಮಿಷಗಳಲ್ಲಿ ಬಸ್ಸಿನಲ್ಲಿದ್ದ ಎಸಿ (AC) ಯಂತ್ರ ಏಕಾಏಕಿ ಸ್ಫೋಟಗೊಂಡಿದ್ದು, ಕ್ಷಣಾರ್ಧದಲ್ಲೇ ಇಡೀ ಬಸ್ಸನ್ನು ಬೆಂಕಿಯ ಕೆನ್ನಾಲಿಗೆ ಆವರಿಸಿಕೊಂಡಿದೆ. ಗಾಬರಿಗೊಂಡ ಪ್ರಯಾಣಿಕರು ಚೀರಾಡುತ್ತಾ ಹೊರಗೆ ಜಿಗಿಯಲು ಯತ್ನಿಸಿದರಾದರೂ, ಬೆಂಕಿಯ ತೀವ್ರತೆಯಿಂದಾಗಿ 9 ಮಂದಿಗೆ ಹೊರಬರಲು ಸಾಧ್ಯವಾಗದೆ ಸ್ಥಳದಲ್ಲೇ ಸಜೀವ ದಹನಗೊಂಡಿದ್ದಾರೆ.

ತಾಯಿಯನ್ನು ಕಾಪಾಡಲು ಹೋಗಿ ಮಗನೂ ಸಜೀವ ದಹನ:

ಈ ಘಟನೆಯಲ್ಲಿ ಬಿಜೆಪಿ ಜಿಲ್ಲಾ ಖಜಾಂಚಿ ನೀರಜ್ ಚೋಪ್ರಾ ಅವರ ಪತ್ನಿ ಸುನೀತಾ ಮತ್ತು ಪುತ್ರ ಶಶಾಂಕ್ ದುರಂತವಾಗಿ ಸಾವನ್ನಪ್ಪಿದ್ದಾರೆ. ಸರಿಯಾಗಿ ನಡೆಯಲಾಗದ ಸ್ಥಿತಿಯಲ್ಲಿದ್ದ ತಾಯಿ ಸುನೀತಾ ಬಸ್ಸಿನ ಹಿಂಬದಿಯ ಸೀಟಿನಲ್ಲಿ ಕುಳಿತಿದ್ದರು. ಬೆಂಕಿ ಆವರಿಸಿದಾಗ ತಾಯಿಯನ್ನು ಒಂಟಿಯಾಗಿ ಬಿಟ್ಟು ಬರಲು ಮನಸ್ಸಾಗದ ಮಗ ಶಶಾಂಕ್, ಅವರನ್ನು ಎತ್ತಿಕೊಂಡು ಹೊರತರಲು ಕೊನೆಯವರೆಗೂ ಹೋರಾಡಿದ್ದಾನೆ. ಆದರೆ, ಬೆಂಕಿ ಸಂಪೂರ್ಣವಾಗಿ ಆವರಿಸಿದ್ದರಿಂದ ತಾಯಿಯ ರಕ್ಷಣೆಗೆ ನಿಂತ ಮಗನೂ ಆಕೆಯೊಂದಿಗೇ ಸಜೀವ ದಹನವಾಗಿದ್ದು, ಸ್ಥಳೀಯರಲ್ಲಿ ತೀವ್ರ ಶೋಕವನ್ನುಂಟುಮಾಡಿದೆ.

ಸ್ಥಳೀಯ ಪೊಲೀಸರು ಹಾಗೂ ಅಗ್ನಿಶಾಮಕ ದಳದ ಸಿಬ್ಬಂದಿ ಕಾರ್ಯಾಚರಣೆ ನಡೆಸಿ ಬೆಂಕಿಯನ್ನು ಹತೋಟಿಗೆ ತಂದಿದ್ದು, ಚಾಲಕನ ಬೇಜವಾಬ್ದಾರಿ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.