ಪಶ್ಚಿಮ ಬಂಗಾಳದಲ್ಲಿ ಪ್ರಾಣಿ ಹತ್ಯೆಗೆ ಬ್ರೇಕ್: ಸರ್ಟಿಫಿಕೇಟ್ ಇಲ್ಲದೆ ಹತ್ಯೆ ಮಾಡಿದರೆ ಜೈಲು ಶಿಕ್ಷೆ ಗ್ಯಾರಂಟಿ!

ಕೋಲ್ಕತ್ತಾ: ಪಶ್ಚಿಮ ಬಂಗಾಳದ ನೂತನ ಬಿಜೆಪಿ ಸರ್ಕಾರವು ಪ್ರಾಣಿ ಹತ್ಯೆ ನಿಯಂತ್ರಣಕ್ಕೆ ಸಂಬಂಧಿಸಿದಂತೆ ಮಹತ್ವದ ಆದೇಶ ಹೊರಡಿಸಿದೆ.

ಇನ್ಮುಂದೆ ರಾಜ್ಯದಲ್ಲಿ ಹಸು, ಎತ್ತು, ಎಮ್ಮೆ ಅಥವಾ ಕರುಗಳನ್ನು ಹತ್ಯೆ ಮಾಡುವ ಮೊದಲು ಅಧಿಕೃತ ಅಧಿಕಾರಿಗಳಿಂದ ‘ಫಿಟ್‌ನೆಸ್ ಸರ್ಟಿಫಿಕೇಟ್’ (ದೃಢೀಕರಣ ಪತ್ರ) ಪಡೆಯುವುದು ಕಡ್ಡಾಯವಾಗಿದೆ.

ಸರ್ಕಾರದ ಪ್ರಮುಖ ನಿಯಮಗಳು:

ವಯಸ್ಸಿನ ಮಿತಿ: ಕೇವಲ 14 ವರ್ಷ ಮೇಲ್ಪಟ್ಟ ಪ್ರಾಣಿಗಳನ್ನು ಮಾತ್ರ ಹತ್ಯೆ ಮಾಡಲು ಅವಕಾಶವಿರುತ್ತದೆ.

ದೃಢೀಕರಣ ಕಡ್ಡಾಯ: ಹತ್ಯೆ ಮಾಡಲಾಗುವ ಪ್ರಾಣಿಯು ಕೆಲಸಕ್ಕೆ ಅಥವಾ ಸಂತಾನೋತ್ಪತ್ತಿಗೆ ಅಸಮರ್ಥವಾಗಿದೆ ಎಂದು ಸರ್ಕಾರಿ ಪಶುವೈದ್ಯರು ಮತ್ತು ಸ್ಥಳೀಯ ಪುರಸಭೆ ಅಥವಾ ಪಂಚಾಯತ್ ಅಧ್ಯಕ್ಷರು ಜಂಟಿಯಾಗಿ ಪ್ರಮಾಣೀಕರಿಸಬೇಕು.

ನಿರ್ದಿಷ್ಟ ಸ್ಥಳ: ಸಾರ್ವಜನಿಕ ಸ್ಥಳಗಳಲ್ಲಿ ಪ್ರಾಣಿ ಹತ್ಯೆಯನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಕೇವಲ ಸರ್ಕಾರ ಗುರುತಿಸಿರುವ ಕಸಾಯಿಖಾನೆಗಳಲ್ಲಿ ಮಾತ್ರ ಹತ್ಯೆಗೆ ಅವಕಾಶವಿದೆ.

ಶಿಕ್ಷೆಯ ವಿವರ: ಈ ನಿಯಮಗಳನ್ನು ಉಲ್ಲಂಘಿಸಿದರೆ 6 ತಿಂಗಳವರೆಗೆ ಜೈಲು ಶಿಕ್ಷೆ ಅಥವಾ ₹1,000 ದಂಡ ಅಥವಾ ಎರಡನ್ನೂ ವಿಧಿಸಬಹುದಾಗಿದೆ.

ಮಮತಾ ಬ್ಯಾನರ್ಜಿ ನೇತೃತ್ವದ ತೃಣಮೂಲ ಕಾಂಗ್ರೆಸ್ ಸರ್ಕಾರವು ಇತ್ತೀಚಿನ ವಿಧಾನಸಭಾ ಚುನಾವಣೆಯಲ್ಲಿ ಸೋಲನುಭವಿಸಿದ ನಂತರ ಅಧಿಕಾರಕ್ಕೆ ಬಂದಿರುವ ಬಿಜೆಪಿ ಸರ್ಕಾರವು ಈ ಕಠಿಣ ಕ್ರಮಗಳನ್ನು ಜಾರಿಗೆ ತಂದಿದೆ.