ಜೈಲಿನಲ್ಲಿರುವ ಪ್ರಿಯಕರನ ಬಿಡಿಸಲು ಡ್ರಗ್ಸ್ ಸಾಗಾಟ: ಪ್ರಿಯತಮೆ ರೈಲ್ವೆ ನಿಲ್ದಾಣದಲ್ಲಿ ಬಂಧನ!

ವಿಜಯವಾಡ: ಜೈಲಿನಲ್ಲಿರುವ ತನ್ನ ಪ್ರಿಯಕರನಿಗೆ ಜಾಮೀನು ಕೊಡಿಸಲು ಹಣವಿಲ್ಲದೆ ಪರದಾಡುತ್ತಿದ್ದ ಯುವತಿಯೊಬ್ಬಳು ಕಮಿಷನ್ ಆಮಿಷಕ್ಕೆ ಬಲಿಪಾಯಾಗಿ ಎಂಡಿಎಂಎ (MDMA) ಮಾದಕವಸ್ತು ಸಾಗಿಸುತ್ತಿದ್ದ ವೇಳೆ ವಿಜಯವಾಡ ರೈಲ್ವೆ ನಿಲ್ದಾಣದಲ್ಲಿ ಈಗಲ್ ಮತ್ತು ಜಿಆರ್‌ಪಿ ಪೊಲೀಸರ ಜಂಟಿ ಕಾರ್ಯಾಚರಣೆಯಲ್ಲಿ ಸಿಕ್ಕಿಬಿದ್ದಿದ್ದಾಳೆ.

ವಿಜಯವಾಡದ ಪಟಮಟ ನಿವಾಸಿ ನಾಗಸೌಮ್ಯ ಎಂಬ ಯುವತಿಗೆ ಮಾದಕವಸ್ತು ಸೇವನೆಯ ಚಟವಿತ್ತು. ಈಕೆಯ ಪ್ರಿಯಕರ ಕಾಶಿವರ್ಧನ್ ಡ್ರಗ್ಸ್ ಸಾಗಾಟದ ಪ್ರಕರಣದಲ್ಲಿ ಮೂರು ತಿಂಗಳ ಹಿಂದೆ ಚಿತ್ತೂರಿನಲ್ಲಿ ಬಂಧನಕ್ಕೊಳಗಾಗಿ ಜೈಲು ಸೇರಿದ್ದನು. ಆತನನ್ನು ಜಾಮೀನಿನ ಮೇಲೆ ಹೊರತರಲು ಸೌಮ್ಯ ಬಳಿ ಹಣವಿರಲಿಲ್ಲ. ಈ ಪರಿಸ್ಥಿತಿಯನ್ನೇ ಬಂಡವಾಳ ಮಾಡಿಕೊಂಡ ಕೃಷ್ಣಲಂಕಾದ ಡ್ರಗ್ ಪೆಡ್ಲರ್ ಬಷೀರ್, ಆಕೆಗೆ ಒಂದು ಲಕ್ಷ ರೂಪಾಯಿ ನೀಡಿ ಬೆಂಗಳೂರಿನಿಂದ MDMA ತರುವಂತೆ ಹಾಗೂ ಅದಕ್ಕಾಗಿ ₹50,000 ಕಮಿಷನ್ ನೀಡುವುದಾಗಿ ಆಮಿಷವೊಡ್ಡಿದ್ದನು.

ಕೃತ್ಯದ ವಿವರ: ಅಕ್ಟೋಬರ್ 13ರಂದು ಬೆಂಗಳೂರಿನ ಯಲಹಂಕಕ್ಕೆ ತೆರಳಿದ್ದ ಸೌಮ್ಯ, ಅಪರಿಚಿತ ವ್ಯಕ್ತಿಯೊಬ್ಬನಿಂದ 110 ಗ್ರಾಂ MDMA ಪಡೆದುಕೊಂಡಿದ್ದಳು.

ಸಾಗಾಟದ ವಿಧಾನ: ಪೊಲೀಸರ ಕಣ್ಣು ತಪ್ಪಿಸಲು ತನ್ನ ಪ್ಯಾಂಟ್‌ನ ಒಳಭಾಗದಲ್ಲಿ ವಿಶೇಷವಾಗಿ ಹೊಲಿದಿದ್ದ ಜೇಬಿನಲ್ಲಿ ಡ್ರಗ್ಸ್ ಪೊಟ್ಟಣಗಳನ್ನು ಅಡಗಿಸಿಟ್ಟು ಬೆಂಗಳೂರು-ಹೌರಾ ಎಕ್ಸ್‌ಪ್ರೆಸ್ ರೈಲಿನ ಮೂಲಕ ವಿಜಯವಾಡಕ್ಕೆ ಪ್ರಯಾಣ ಬೆಳೆಸಿದ್ದಳು.

ಪೊಲೀಸ್ ಕಾರ್ಯಾಚರಣೆ: ಖಚಿತ ಮಾಹಿತಿ ಮೇರೆಗೆ ಈಗಲ್ ಇನ್ಸ್‌ಪೆಕ್ಟರ್ ರವೀಂದ್ರ ಹಾಗೂ ಜಿಆರ್‌ಪಿ ಇನ್ಸ್‌ಪೆಕ್ಟರ್ ರಮಣ ನೇತೃತ್ವದ ಪೊಲೀಸರು ವಿಜಯವಾಡ ರೈಲ್ವೆ ನಿಲ್ದಾಣದಲ್ಲಿ ಕಾಯುತ್ತಿದ್ದು, ಮಂಗಳವಾರ ತಡರಾತ್ರಿ ರೈಲು ತಲುಪುತ್ತಿದ್ದಂತೆ ತಪಾಸಣೆ ನಡೆಸಿ ಯುವತಿಯನ್ನು ವಶಕ್ಕೆ ಪಡೆದಿದ್ದಾರೆ.

ಪ್ರಮುಖ ಆರೋಪಿ ಬಂಧನ: ರೈಲಿನಲ್ಲಿ ತಪಾಸಣೆ ನಡೆಯುತ್ತಿರುವ ಬಗ್ಗೆ ಸೌಮ್ಯಳಿಂದ ಮಾಹಿತಿ ತಿಳಿದು ತಲೆಮರೆಸಿಕೊಂಡಿದ್ದ ಪೆಡ್ಲರ್ ಬಷೀರ್‌ನನ್ನು ಬುಧವಾರ ವಿಜಯವಾಡ ನಗರದಲ್ಲಿ ಪತ್ತೆಹಚ್ಚಿ ಬಂಧಿಸಲಾಗಿದೆ.

ಸದ್ಯ ವಶಪಡಿಸಿಕೊಂಡ 110 ಗ್ರಾಂ MDMA ಮಾದಕವಸ್ತುವನ್ನು ಜಪ್ತಿ ಮಾಡಲಾಗಿದ್ದು, ಇಬ್ಬರ ವಿರುದ್ಧ ಎನ್‌ಡಿಪಿಎಸ್ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಂಡು ಪೊಲೀಸರು ತನಿಖೆಯನ್ನು ಮುಂದುವರಿಸಿದ್ದಾರೆ.