
ನವದೆಹಲಿ: ಕಳೆದ ವರ್ಷ ಮೇ ತಿಂಗಳಲ್ಲಿ ಭಾರತ ಮತ್ತು ಪಾಕಿಸ್ತಾನ ನಡುವೆ ನಡೆದ ‘ಆಪರೇಷನ್ ಸಿಂಧೂರ್’ ಸಂಘರ್ಷದ ವೇಳೆ ಪಾಕಿಸ್ತಾನಕ್ಕೆ ಚೀನಾ ನೀಡಿದ ಮಿಲಿಟರಿ ಬೆಂಬಲವು, ಭಾರತದ ಏಳಿಗೆಯನ್ನು ತಡೆಯುವ ವಿಶಾಲ ಕಾರ್ಯತಂತ್ರದ ಭಾಗವಾಗಿದೆ ಎಂದು ಅಮೆರಿಕದ ಪ್ರಮುಖ ಕಾಂಗ್ರೆಸ್ ಸಮಿತಿಯೊಂದು ತನ್ನ ವರದಿಯಲ್ಲಿ ತಿಳಿಸಿದೆ.
ಯುಎಸ್-ಚೀನಾ ಎಕನಾಮಿಕ್ ಅಂಡ್ ಸೆಕ್ಯುರಿಟಿ ರಿವ್ಯೂ ಕಮಿಷನ್ ತನ್ನ ವಾರ್ಷಿಕ ವರದಿಯಲ್ಲಿ, ಚೀನಾದ ಈ ನಡೆಗಳ ವಿರುದ್ಧ ಭಾರತ ಹಾಗೂ ಅಮೆರಿಕ ಆಳವಾದ ಗುಪ್ತಚರ, ಕಡಲ ಮತ್ತು ಉತ್ಪಾದನಾ ಸಹಕಾರವನ್ನು ಹೊಂದುವಂತೆ ಕರೆ ನೀಡಿದೆ. ಏಷ್ಯಾದಲ್ಲಿ ಚೀನಾವನ್ನು ಎದುರಿಸಲು ಭಾರತವು ನಿರ್ಣಾಯಕ ಪಾತ್ರ ವಹಿಸುತ್ತದೆ ಎಂದು ವರದಿ ಸ್ಪಷ್ಟಪಡಿಸಿದೆ.
ಚೀನಾದ ರಹಸ್ಯ ಬೆಂಬಲ: ಆಪರೇಷನ್ ಸಿಂಧೂರ್ ಸಮಯದಲ್ಲಿ ಪಾಕಿಸ್ತಾನ ವಾಯುಪಡೆಗೆ (PAF) ಸೇರಿದ ಜೆ-10ಸಿಇ (J-10CE) ಯುದ್ಧವಿಮಾನಗಳ ತಾಂತ್ರಿಕ ಕಾರ್ಯಕ್ಷಮತೆ ಹೆಚ್ಚಿಸಲು ಚೀನಾ ತಜ್ಞರು ಆನ್-ಸೈಟ್ ನೆರವು ನೀಡಿದ್ದರು ಹಾಗೂ ನೈಜ-ಸಮಯದ (Real-time) ಮಾಹಿತಿ ಒದಗಿಸಿದ್ದರು ಎಂದು ವರದಿ ಬಹಿರಂಗಪಡಿಸಿದೆ.
ದ್ವಿಮುಖ ಯುದ್ಧದ ಆತಂಕ: ಪಾಕಿಸ್ತಾನದೊಂದಿಗೆ ಚೀನಾ ಹೊಂದಿರುವ ಮಿಲಿಟರಿ ಪಾಲುದಾರಿಕೆಯು ಭಾರತಕ್ಕೆ ಭವಿಷ್ಯದಲ್ಲಿ ದ್ವಿಮುಖ ಯುದ್ಧದ ಗಂಭೀರ ಆತಂಕವನ್ನು ಸೃಷ್ಟಿಸಿದೆ ಎಂದು ಸಮಿತಿ ಎಚ್ಚರಿಸಿದೆ.
ಭಾರತದ ಕಾರ್ಯತಂತ್ರದ ಪ್ರಾಮುಖ್ಯತೆ: ಅಮೆರಿಕದ ಮೈತ್ರಿಕೂಟದ ಹೊರಗಿರುವ ಕೆಲವೇ ಕೆಲವು ಪ್ರಮುಖ ಶಕ್ತಿಗಳಲ್ಲಿ ಭಾರತವೂ ಒಂದಾಗಿದ್ದು, ಚೀನಾದೊಂದಿಗೆ ದೀರ್ಘಕಾಲೀನ ಸ್ಪರ್ಧೆಯಲ್ಲಿ ಪ್ರಭಾವ ಬೀರುವ ಸಾಮರ್ಥ್ಯ ಹೊಂದಿದೆ ಎಂದು ಸಮಿತಿ ಅಭಿಪ್ರಾಯಪಟ್ಟಿದೆ.
ಗಡಿಯುದ್ದಕ್ಕೂ ಮಿಲಿಟರಿ ಒತ್ತಡ, ಕೈಗಾರಿಕಾ ಸರಬರಾಜುಗಳ ಮೇಲಿನ ನಿಷೇಧ ಮತ್ತು ಹಿಂದೂ ಮಹಾಸಾಗರದಲ್ಲಿ ನೌಕಾಪಡೆಯ ಉಪಸ್ಥಿತಿಯನ್ನು ವಿಸ್ತರಿಸುವ ಮೂಲಕ ಚೀನಾ ಭಾರತವನ್ನು ನಿಯಂತ್ರಿಸಲು ಪ್ರಯತ್ನಿಸುತ್ತಿದೆ ಎಂದು ಅಮೆರಿಕದ ಈ ವರದಿ ಗಂಭೀರವಾಗಿ ಎಚ್ಚರಿಸಿದೆ.




