ವಿಶ್ವಾಸಮತ ಗೆದ್ದ ಸಿಎಂ ವಿಜಯ್; ಎಐಎಡಿಎಂಕೆ ಇಬ್ಬಾಗ, ಕುದುರೆ ವ್ಯಾಪಾರದ ಗಂಭೀರ ಆರೋಪ ಮಾಡಿದ ಇಪಿಎಸ್! ದಳಪತಿ ಕೊಟ್ಟ ಕೌಂಟರ್ ಏನು?

ಚೆನ್ನೈ: ತಮಿಳುನಾಡು ಮುಖ್ಯಮಂತ್ರಿ ವಿಜಯ್ ಅವರು ಇಂದು ವಿಧಾನಸಭೆಯಲ್ಲಿ ನಡೆದ ವಿಶ್ವಾಸಮತ ಪರೀಕ್ಷೆಯಲ್ಲಿ 144 ಮತಗಳನ್ನು ಪಡೆಯುವ ಮೂಲಕ ಜಯಗಳಿಸಿದ್ದಾರೆ. ಆದರೆ ಈ ಪ್ರಕ್ರಿಯೆಯು ರಾಜ್ಯದ ಪ್ರಮುಖ ವಿರೋಧ ಪಕ್ಷವಾದ ಎಐಎಡಿಎಂಕೆಯಲ್ಲಿ (AIADMK) ಬಹಿರಂಗ ಸೀಳನ್ನು ಉಂಟುಮಾಡಿದೆ.

ಶಾಸಕರಿಗೆ ಹಣ ಕೊಟ್ಟು ಕುದುರೆ ವ್ಯಾಪಾರ ಮಾಡಲಾಗಿದೆ ಎಂದು ವಿಪಕ್ಷಗಳು ಆರೋಪಿಸಿದರೆ, ಇದಕ್ಕೆ ಸಖತ್ ಕೌಂಟರ್ ಕೊಟ್ಟ ವಿಜಯ್ ಇದು ಕುದುರೆ ವ್ಯಾಪಾರವಲ್ಲ, ಕುದುರೆ ರೇಸ್ ನಲ್ಲಿ ಓಡುವ ಕುದುರೆಗಳು. ವಿಪಕ್ಷಗಳ ಆರೋಪ ಸುಳ್ಳು ಎಂದು ಹೇಳಿದ್ದಾರೆ.

ಪಕ್ಷದ ಪ್ರಧಾನ ಕಾರ್ಯದರ್ಶಿ ಎಡಪ್ಪಾಡಿ ಕೆ. ಪಳನಿಸ್ವಾಮಿ (EPS) ಅವರು ತಮ್ಮ ಶಾಸಕರಿಗೆ ಹಣದ ಆಮಿಷ ಒಡ್ಡಲಾಗಿದೆ ಎಂದು ಗಂಭೀರ ಆರೋಪ ಮಾಡಿದರು. ಇದರ ಬೆನ್ನಲ್ಲೇ ಎಐಎಡಿಎಂಕೆ ಎರಡು ಗುಂಪುಗಳಾಗಿ ವಿಭಜನೆಯಾಯಿತು. ಇಪಿಎಸ್ ನೇತೃತ್ವದ 22 ಶಾಸಕರು ಸರ್ಕಾರದ ವಿರುದ್ಧ ಮತ ಚಲಾಯಿಸಿದರೆ, ಎಸ್.ಪಿ. ವೇಲುಮಣಿ ನೇತೃತ್ವದ 25 ಶಾಸಕರು ಪಕ್ಷದ ವಿಪ್ ಉಲ್ಲಂಘಿಸಿ ವಿಜಯ್ ಸರ್ಕಾರಕ್ಕೆ ಬೆಂಬಲ ಘೋಷಿಸಿದರು. ಮತ್ತೊಂದೆಡೆ, ಡಿಎಂಕೆ (DMK) ನಾಯಕ ಉದಯನಿಧಿ ಸ್ಟಾಲಿನ್ ಅವರು ಸರ್ಕಾರದ ಅಕ್ರಮಗಳ ಬಗ್ಗೆ ಕಿಡಿಕಾರಿ ಸದನದಿಂದ ಹೊರನಡೆದರು.

ಪ್ರಮುಖ ಅಂಶಗಳು

ಸಿಎಂ ವಿಜಯ್ ಜಯ: 118 ಬಹುಮತದ ಅಗತ್ಯವಿದ್ದಲ್ಲಿ 144 ಶಾಸಕರ ಬೆಂಬಲದೊಂದಿಗೆ ವಿಜಯ್ ವಿಶ್ವಾಸಮತ ಸಾಬೀತುಪಡಿಸಿದರು.

ಎಐಎಡಿಎಂಕೆ ಒಡಕು: ಎಸ್.ಪಿ. ವೇಲುಮಣಿ ಬಣವು ಬಹಿರಂಗವಾಗಿಯೇ ವಿಜಯ್ ಸರ್ಕಾರವನ್ನು ಬೆಂಬಲಿಸಿದ್ದು, ಪಳನಿಸ್ವಾಮಿ ಅವರಿಗೆ ದೊಡ್ಡ ಹಿನ್ನಡೆಯಾಗಿದೆ.

ಕುದುರೆ ವ್ಯಾಪಾರ ಆರೋಪ: ಎಐಎಡಿಎಂಕೆ ಶಾಸಕರಿಗೆ ಸಚಿವ ಸ್ಥಾನ ಮತ್ತು ನಗದು ಆಮಿಷ ಒಡ್ಡಲಾಗಿದೆ ಎಂದು ಇಪಿಎಸ್ ಕಿಡಿಕಾರಿದರು.

ಡಿಎಂಕೆ ವಾಕೌಟ್: ಉದಯನಿಧಿ ಸ್ಟಾಲಿನ್ ನೇತೃತ್ವದಲ್ಲಿ ಡಿಎಂಕೆ ಶಾಸಕರು ಮತದಾನಕ್ಕೂ ಮುನ್ನವೇ ಸದನದಿಂದ ಹೊರನಡೆದರು.