ಅಕ್ರಮ ಭೂ ಒಡೆತನ ಹಾಗೂ ಪರಿಹಾರ ಹಗರಣ: ಇಡಿ ಬಲೆಗೆ ಬಿದ್ದ ಆಪ್ ಶಾಸಕಿ ಅಮನ್‌ದೀಪ್ ಕೌರ್

ಚಂಡೀಗಢ: ರಾಷ್ಟ್ರೀಯ ಹೆದ್ದಾರಿಗಾಗಿ ಸ್ವಾಧೀನಪಡಿಸಿಕೊಂಡ ಭೂಮಿಗೆ ಸಂಬಂಧಿಸಿದ ಕೋಟಿ ರೂ. ಗೂ ಅಧಿಕ ಹಣದ ಅಕ್ರಮ ಭೂ ಪರಿಹಾರ ಹಗರಣಕ್ಕೆ ಸಂಬಂಧಿಸಿದಂತೆ, ಜಾರಿ ನಿರ್ದೇಶನಾಲಯವು  ಪಂಜಾಬ್‌ನ ಮೊಗಾ ಕ್ಷೇತ್ರದಿಂದ ಆಮ್ ಆದ್ಮಿ ಪಾರ್ಟಿ ಶಾಸಕಿ ಹಾಗೂ ವೈದ್ಯೆಯಾಗಿರುವ ಅಮನ್‌ದೀಪ್ ಕೌರ್ ಅರೋರಾ ಅವರಿಗೆ ಸೇರಿದ 7 ಸ್ಥಳಗಳಲ್ಲಿ ದಿಢೀರ್ ದಾಳಿ ನಡೆಸಿ ಶೋಧ ನಡೆಸಿದೆ.

ನವೆಂಬರ್ 4 ರಂದು ಪಿಎಂಎಲ್‌ಎ (PMLA) ಕಾಯ್ದೆಯಡಿ ಇಡಿ ಚಂಡೀಗಢ ವಲಯ ಕಚೇರಿ-I ಈ ಕಾರ್ಯಾಚರಣೆ ನಡೆಸಿದ್ದು, ದಾಳಿಯ ವೇಳೆ ಹಲವಾರು ಪ್ರಮುಖ ದಾಖಲೆಗಳು, ಎಲೆಕ್ಟ್ರಾನಿಕ್ ಸಾಧನಗಳು ಹಾಗೂ ಅಕ್ರಮ ಬೆನಾಮಿ ಆಸ್ತಿಗಳಿಗೆ ಸಂಬಂಧಿಸಿದ ಸಾಕ್ಷ್ಯಗಳು ಪತ್ತೆಯಾಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಶಾಸಕಿಯ ಒಡೆತನದ ಆಸ್ಪತ್ರೆ-ಕೇಂದ್ರದ ಮೇಲೂ ಈ ದಾಳಿ ನಡೆದಿದೆ.

ಹಗರಣದ ಹಿನ್ನೆಲೆ: ಮೊಗಾದ ಧರ್ಮಕೋಟ್ ಪೊಲೀಸ್ ಠಾಣೆಯಲ್ಲಿ ದಾಖಲಾದ ಎಫ್‌ಐಆರ್ ಆಧಾರದ ಮೇಲೆ ಇಡಿ ತನಿಖೆ ಆರಂಭಿಸಿದೆ. ರಾಷ್ಟ್ರೀಯ ಹೆದ್ದಾರಿ (NH-754A) ಗಾಗಿ ಸ್ವಾಧೀನಪಡಿಸಿಕೊಂಡ ಭೂಮಿಗೆ ಸಂಬಂಧಿಸಿದ ಕಂದಾಯ ದಾಖಲೆಗಳನ್ನು ತಿರುಚಿ, ಅಕ್ರಮವಾಗಿ 1 ಕೋಟಿ ರೂ. ಗೂ ಅಧಿಕ ಪರಿಹಾರ ಹಣವನ್ನು ದೋಚಲಾಗಿದೆ.

ಬೆನಾಮಿ ಆಸ್ತಿಗಳು ಮತ್ತು ಜಮೀನು ಕಬಳಿಕೆ: ಸರ್ಕಾರದ ಜಮೀನು, ಪುರಸಭೆ ಹಾಗೂ ಚರ್ಚ್ ಟ್ರಸ್ಟ್ ಸೇರಿದಂತೆ ಹಲವು ಸಾರ್ವಜನಿಕ ಆಸ್ತಿಗಳನ್ನು ಕಂದಾಯ ದಾಖಲೆಗಳನ್ನು ತಿರುಚಿ ಶಾಸಕರ ಸಂಬಂಧಿಕರ ಹೆಸರಿಗೆ ವರ್ಗಾಯಿಸಿರುವುದು ತನಿಖೆಯಿಂದ ಬಯಲಾಗಿದೆ.

ಬ್ಯಾಂಕ್ ಖಾತೆ ಜಪ್ತಿ: ಅಕ್ರಮ ಭೂ ಪರಿಹಾರದ ಹಣವು ದಿಲ್ಕುಶ್ ಕುಮಾರಿ ಎಂಬುವವರ ಬ್ಯಾಂಕ್ ಖಾತೆಗೆ ಜಮೆಯಾಗಿದ್ದು, ನಂತರ ಅದನ್ನು ಬ್ಯಾಂಕ್ ಕخಾತೆ ಮುಖಾಂತರ ತಡೆಹಿಡಿಯಲಾಗಿದೆ. ಶಾಸಕಿ ಮತ್ತು ಅವರ ಪತಿಯ ಪಾತ್ರದ ಬಗ್ಗೆಯೂ ತನಿಖೆ ಮುಂದುವರಿದಿದೆ.