ಪ್ರಿಯಕರನ ಜೊತೆ ಸೇರಿ ಭಾವಿ ಪತಿಯನ್ನೇ ಕಂದಕಕ್ಕೆ ತಳ್ಳಿದ ಯುವತಿ: ಸಿಸಿಟಿವಿಯಲ್ಲಿ ಸಿಕ್ಕಿಬಿದ್ದ 48 ನಿಮಿಷಗಳ ರಹಸ್ಯ!

ಪುಣೆ: ಮಹಾರಾಷ್ಟ್ರದ ಪ್ರಸಿದ್ಧ ಲೋಹಗಡ ಕೋಟೆಯಲ್ಲಿ ಟ್ರೆಕ್ಕಿಂಗ್‌ ವೇಳೆ ಆಕಸ್ಮಿಕವಾಗಿ ಕಾಲು ಜಾರಿ ಬಿದ್ದು ಸಾವನ್ನಪ್ಪಿದ್ದಾರೆ ಎಂದು ಭಾವಿಸಲಾಗಿದ್ದ ಪುಣೆಯ ಉದ್ಯಮಿ ಕೇತನ್ ಅಗರ್ವಾಲ್ (25) ಅವರ ಸಾವು, ಇದೀಗ ಭೀಕರ ಕೊಲೆ ಕೇಸ್ ಆಗಿ ಮಾರ್ಪಟ್ಟಿದೆ. ಕೇತನ್ ಅವರ ಭಾವಿ ಪತ್ನಿ ಸಿಯಾ ಗೋಯಲ್ ಮತ್ತು ಆಕೆಯ ಪ್ರಿಯಕರ ಚೇತನ್ ಚೌಧರಿ ಸೇರಿ ಈ ಕೃತ್ಯ ಎಸಗಿರುವುದನ್ನು ಪುಣೆ ಗ್ರಾಮಾಂತರ ಪೊಲೀಸರು ಪತ್ತೆ ಹಚ್ಚಿದ್ದು, ಇಬ್ಬರನ್ನೂ ಬಂಧಿಸಿದ್ದಾರೆ.

ಕೇಸ್‌ನ ಸಂಪೂರ್ಣ ವಿವರ ಇಲ್ಲಿದೆ:

ಬದಲಾದ ಸಿಯಾ ಹೇಳಿಕೆಗಳು:

ಮೊದಲಿಗೆ ಬಲವಾದ ಗಾಳಿಯಿಂದಾಗಿ ಫೋಟೋ ಕ್ಲಿಕ್ಕಿಸುವಾಗ ಕೇತನ್ ಕಾಲು ಜಾರಿದರು ಎಂದು ಸಿಯಾ ಹೇಳಿದ್ದಳು. ನಂತರ ವಿಚಾರಣೆ ವೇಳೆ, ಸುಸ್ತಾಗಿ ವಿಶ್ರಮಿಸುವಾಗ ನೀರು ಕೊಡುವಾಗ ಜಾರಿದರು ಎಂದು ಹೇಳಿಕೆ ಬದಲಿಸಿದಳು. ಆದರೆ, ಕೇತನ್ ಮೊಬೈಲ್‌ನಲ್ಲಿ ಅಂದಿನ ಯಾವುದೇ ಫೋಟೋಗಳು ಇಲ್ಲದಿರುವುದು ಪೊಲೀಸರ ಅನುಮಾನಕ್ಕೆ ಕಾರಣವಾಯಿತು.

ಸಿಸಿಟಿವಿಯಲ್ಲಿ ಸಿಕ್ಕಿಬಿದ್ದ ಹುಡಿ ಧರಿಸಿದ ಯುವಕ:

ತನಿಖೆ ತೀವ್ರಗೊಳಿಸಿದ ಪೊಲೀಸರು ಕೋಟೆಯ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ, ಬಿಸಿಲಿನ ವಾತಾವರಣದಲ್ಲೂ ಮುಖ ಮುಚ್ಚಿಕೊಳ್ಳಲು ಹುಡಿ (Hoodie) ಧರಿಸಿದ್ದ ಯುವಕನೊಬ್ಬ ಕೇತನ್ ದಂಪತಿಯನ್ನು ಹಿಂಬಾಲಿಸುತ್ತಿರುವುದು ಕಂಡುಬಂದಿದೆ. ಸಿಯಾ ಪದೇ ಪದೇ ಆತನ ಕಡೆಗೆ ನೋಡಿ ಕೈ ಸನ್ನೆ ಮಾಡುತ್ತಿರುವುದು ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

48 ನಿಮಿಷಗಳ ರಹಸ್ಯ ಟ್ರಯಲ್:

ಡಿಜಿಟಲ್ ಲೋಕೇಷನ್ ಹಾಗೂ ಕಾಲ್ ರೆಕಾರ್ಡ್ಸ್ ಪರಿಶೀಲಿಸಿದಾಗ ಆ ಹುಡಿ ಧರಿಸಿದ ವ್ಯಕ್ತಿ ಸಿಯಾಳ ಪ್ರಿಯಕರ ಚೇತನ್ ಚೌಧರಿ ಎಂದು ತಿಳಿದುಬಂದಿದೆ. ಇವರಿಬ್ಬರು ಕಳೆದ 6 ತಿಂಗಳಲ್ಲಿ 2,004 ಬಾರಿ ಫೋನಿನಲ್ಲಿ ಮಾತನಾಡಿದ್ದರು. ಘಟನೆಯ ದಿನ ಚೇತನ್ ಕೇವಲ 48 ನಿಮಿಷಗಳ ಕಾಲ ಮಾತ್ರ ಕೋಟೆಯಲ್ಲಿದ್ದು ಕೃತ್ಯ ಎಸಗಿ ಪರಾರಿಯಾಗಿದ್ದ.

ಕೊಲೆಗೆ ಕಾರಣ:

ಉದ್ಯಮಿ ಕೇತನ್ ಜೊತೆ ಸಿಯಾ ನಿಶ್ಚಿತಾರ್ಥ ಫೆಬ್ರವರಿಯಲ್ಲಿ ನಡೆದಿತ್ತು ಹಾಗೂ ನವೆಂಬರ್‌ನಲ್ಲಿ ಉದಯಪುರದಲ್ಲಿ ಅದ್ಧೂರಿ ವಿವಾಹ ನಿಶ್ಚಯವಾಗಿತ್ತು. ಆದರೆ ಸಿಯಾಳಿಗೆ ಈ ಮದುವೆ ಇಷ್ಟವಿರಲಿಲ್ಲ. ಕುಟುಂಬದ ಮರ್ಯಾದೆಗೆ ಹೆದರಿ ಓಡಿಹೋಗಲಾಗದೆ, ಪ್ರಿಯಕರನ ಜೊತೆ ಸೇರಿ ಕೇತನ್‌ನನ್ನು ಮುಗಿಸಲು ಸಂಚು ರೂಪಿಸಿದ್ದಳು.

ಪ್ರಸ್ತುತ ಆರೋಪಿಗಳಿಬ್ಬರೂ ಪೊಲೀಸ್ ಕಸ್ಟಡಿಯಲ್ಲಿದ್ದು, ತನಿಖೆ ಮುಂದುವರಿದಿದೆ.