ಗೌರಿ, ಎಂ.ಎಂ. ಕಲಬುರ್ಗಿಹತ್ಯೆಯಲ್ಲಿ ಆರ್ ಎಸ್ಎಸ್ ಕೈವಾಡದ ಬಗ್ಗೆ 3 ದಿನದಲ್ಲಿ ಸಾಕ್ಷ್ಯ ಕೊಡಿ, ಇಲ್ಲದಿದ್ದರೆ ರಾಜೀನಾಮೆ ನೀಡಿ: ಸಚಿವ ಪ್ರಿಯಾಂಕ್ ಖರ್ಗೆಗೆ ಸಂಸದ ತೇಜಸ್ವಿ ಸೂರ್ಯ ಸವಾಲು!

ಬೆಂಗಳೂರು: ಹಿರಿಯ ಪತ್ರಕರ್ತೆ ಗೌರಿ ಲಂಕೇಶ್, ಎಂ.ಎಂ. ಕಲಬುರ್ಗಿ ಸೇರಿದಂತೆ ಪ್ರಮುಖ ಹತ್ಯೆಗಳ ಹಿಂದೆ ಆರ್‌ಎಸ್‌ಎಸ್ (RSS) ನಂಟಿದೆ ಎಂದು ಕರ್ನಾಟಕದ ಸಚಿವ ಪ್ರಿಯಾಂಕ್ ಖರ್ಗೆ ನೀಡಿರುವ ಹೇಳಿಕೆಯು ರಾಜ್ಯ ಮತ್ತು ರಾಷ್ಟ್ರ ರಾಜಕಾರಣದಲ್ಲಿ ತೀವ್ರ ಕೋಲಾಹಲ ಸೃಷ್ಟಿಸಿದೆ.

ಈ ಆರೋಪಕ್ಕೆ ತೀವ್ರವಾಗಿ ತಿರುಗೇಟು ನೀಡಿರುವ ಬಿಜೆಪಿ ಸಂಸದ ತೇಜಸ್ವಿ ಸೂರ್ಯ, ಸಚಿವರು 3 ದಿನಗಳಲ್ಲಿ ತಮ್ಮ ಆರೋಪಕ್ಕೆ ತಕ್ಕ ಸಾಕ್ಷ್ಯ ಒದಗಿಸಬೇಕು ಅಥವಾ ತಮ್ಮ ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕು ಎಂದು ಗಡುವು ನೀಡಿ ಸವಾಲು ಹಾಕಿದ್ದಾರೆ.

ಕೇರಳದಲ್ಲಿ ನಡೆದ ಮುಸ್ಲಿಮ್ ಯೂತ್ ಲೀಗ್ ಸಮಾವೇಶದಲ್ಲಿ ಮಾತನಾಡಿದ್ದ ಪ್ರಿಯಾಂಕ್ ಖರ್ಗೆ, ಗೌರಿ ಲಂಕೇಶ್, ಕಲಬುರ್ಗಿ ಮತ್ತು ನರೇಂದ್ರ ದಾಬೋಲ್ಕರ್ ಹತ್ಯೆಗಳ ತನಿಖೆಯು ಆರ್‌ಎಸ್‌ಎಸ್ ಗುಪ್ತ ಜಾಲಗಳ ನಂಟನ್ನು ಬಹಿರಂಗಪಡಿಸಿದೆ ಎಂದಿದ್ದರು. ಈ ಹೇಳಿಕೆಯನ್ನು ಖಂಡಿಸಿದ ತೇಜಸ್ವಿ ಸೂರ್ಯ, ನ್ಯಾಯಾಲಯದಲ್ಲಿ ವಿಚಾರಣೆ ನಡೆಯುತ್ತಿರುವಾಗ ಸಚಿವರೊಬ್ಬರು ರಾಜಕೀಯ ವೇದಿಕೆಯಿಂದ ಇಂತಹ ಪೂರ್ವಗ್ರಹಪೀಡಿತ ಹೇಳಿಕೆ ನೀಡುವುದು ಸರಿಯಲ್ಲ ಎಂದು ಆಕ್ಷೇಪ ವ್ಯಕ್ತಪಡಿಸಿ ಮೂರು ದಿನಗಳ ಸವಾಲು ಎಸೆದಿದ್ದಾರೆ.

ತನಿಖಾ ವರದಿಗಳ ಉಲ್ಲೇಖ: ಎಸ್‌ಐಟಿ (SIT) ಮತ್ತು ಸಿಬಿಐ (CBI) ತನಿಖೆಗಳಲ್ಲಿ ಹತ್ಯೆಗಳ ಆರೋಪಿಗಳಿಗೂ ಆರ್‌ಎಸ್‌ಎಸ್ ಗುಪ್ತ ಜಾಲಗಳಿಗೂ ನಂಟಿರುವುದು ಪತ್ತೆಯಾಗಿದೆ ಎಂದು ಪ್ರಿಯಾಂಕ್ ಖರ್ಗೆ ವಾದಿಸಿದ್ದಾರೆ.

ತೇಜಸ್ವಿ ಸೂರ್ಯ ಆಕ್ರೋಶ: ಸಾಕ್ಷ್ಯಗಳಿಲ್ಲದೆ ಆರ್‌ಎಸ್‌ಎಸ್ ಮೇಲೆ ಗೂಬೆ ಕೂರಿಸುತ್ತಿರುವ ಖರ್ಗೆಯವರು 3 ದಿನಗಳಲ್ಲಿ ದಾಖಲೆಗಳನ್ನು ಬಿಡುಗಡೆ ಮಾಡಬೇಕು ಅಥವಾ ರಾಜೀನಾಮೆ ನೀಡಬೇಕು ಎಂದು ಸೂರ್ಯ ಒತ್ತಾಯಿಸಿದ್ದಾರೆ.

ಆರ್‌ಎಸ್‌ಎಸ್ ನೋಂದಣಿ ಸವಾಲು: ತೇಜಸ್ವಿ ಸೂರ್ಯ ಅವರ ಸವಾಲಿಗೆ ಪ್ರತಿಕ್ರಿಯಿಸಿದ ಪ್ರಿಯಾಂಕ್ ಖರ್ಗೆ, “ಆರ್‌ಎಸ್‌ಎಸ್‌ಗೆ ಅಧಿಕೃತ ನೋಂದಣಿ, ಸದಸ್ಯರ ಪಟ್ಟಿ ಅಥವಾ ಲೆಕ್ಕಪತ್ರಗಳಿಲ್ಲ. ಧೈರ್ಯವಿದ್ದರೆ ಅದನ್ನು ನೋಂದಾಯಿಸಿ, ನೋಂದಣಿ ಖರ್ಚನ್ನು ನಾನೇ ಭರಿಸುತ್ತೇನೆ” ಎಂದು ತಿರುಗೇಟು ನೀಡಿದ್ದಾರೆ.

ಸ್ವಾತಂತ್ರ್ಯ ಹೋರಾಟದಲ್ಲೂ ಆರ್‌ಎಸ್‌ಎಸ್ ಪಾತ್ರವೇನು ಎಂದು ಪ್ರಶ್ನಿಸಿರುವ ಖರ್ಗೆ, ಬ್ರಿಟಿಷರ ವಿರುದ್ಧ ಹೋರಾಡಿದವರನ್ನು ಮಾತ್ರ ದೇಶಪ್ರೇಮಿಗಳು ಎಂದು ಕರೆಯಲಾಗುತ್ತದೆ ಎಂದು ವಾಗ್ದಾಳಿ ನಡೆಸಿದ್ದಾರೆ.