ಸಂವಿಧಾನ ಜೇಬಿನಲ್ಲಿದೆ ಎಂದುಕೊಳ್ಳುವವರದ್ದು ಅಧಿಕಾರದ ಅಮಲು: ರಾಹುಲ್ ಗಾಂಧಿ ವಿರುದ್ಧ ಪ್ರಧಾನಿ ಮೋದಿ ವಾಗ್ದಾಳಿ

ನವದೆಹಲಿ: ಭಾರತ್ ಕೃಷಿ ಸಮ್ಮೇಳನ 2026’ರಲ್ಲಿ ಮಾತನಾಡಿದ ಪ್ರಧಾನಿ ನರೇಂದ್ರ ಮೋದಿ ಅವರು ವಿರೋಧ ಪಕ್ಷಗಳ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದರು. ಕೆಲವು ನಾಯಕರು ಸಂವಿಧಾನವನ್ನು ತಮ್ಮ ಜೇಬಿನಲ್ಲಿಟ್ಟುಕೊಂಡಿದ್ದಾರೆ ಎಂದು ಭಾವಿಸಿದ್ದಾರೆ ಮತ್ತು ದೇಶದ ಸಂವಿಧಾನ ಹಾಗೂ ಪ್ರಜಾಪ್ರಭುತ್ವವನ್ನು ತಮ್ಮ ಸ್ವಂತ ಆಸ್ತಿಯಂತೆ ನಡೆಸಿಕೊಳ್ಳುತ್ತಿದ್ದಾರೆ ಎಂದು ಕಿಡಿಕಾರಿದರು.

ಅಧಿಕಾರದಲ್ಲಿಲ್ಲದಿದ್ದರೂ ಆ ನಾಯಕರು ವಿಚಿತ್ರವಾದ ಅಧಿಕಾರದ ಅಮಲಿನಲ್ಲಿ ವರ್ತಿಸುತ್ತಿದ್ದಾರೆ ಎಂದು ಅವರು ಟೀಕಿಸಿದರು.

ತಮ್ಮ ಗುಜರಾತ್ ಮುಖ್ಯಮಂತ್ರಿ ಯೋಗದ ದಿನಗಳನ್ನು ಸ್ಮರಿಸಿದ ಪ್ರಧಾನಿ ಮೋದಿ, ಅಂದು ಕೇಂದ್ರದಲ್ಲಿದ್ದ ಯುಪಿಎ ಸರ್ಕಾರದ ಧೋರಣೆಗಳನ್ನು ಟೀಕಿಸಿದರು. ಹಿಂದೊಮ್ಮೆ ಆರ್ಥಿಕ ಕಾರ್ಯಕ್ಷಮತೆ ಸಮೀಕ್ಷೆಯಲ್ಲಿ ಗುಜರಾತ್ ರಾಜ್ಯವು ದೇಶದಲ್ಲೇ ನಂಬರ್ ಒನ್ ಸ್ಥಾನ ಪಡೆದಿತ್ತು. ಆದರೆ ದೆಹಲಿಯಲ್ಲಿ ಅಧಿಕಾರದಲ್ಲಿದ್ದವರಿಗೆ ಗುಜರಾತ್‌ಗೆ ಸಿಕ್ಕ ಮನ್ನಣೆ ಸಹಿಸಲಾಗಲಿಲ್ಲ. ಯಾವುದೇ ವರದಿ ಪ್ರಕಟಿಸುವ ಮುನ್ನ ಸರ್ಕಾರದ ಅನುಮತಿ ಪಡೆಯಬೇಕೆಂದು ಸಂಶೋಧಕರಿಗೆ ಒತ್ತಡ ಹೇರಲಾಗಿತ್ತು ಎಂದು ಗಂಭೀರ ಆರೋಪ ಮಾಡಿದರು.

ಸಂವಿಧಾನದ ಬಗ್ಗೆ ಟೀಕೆ: ಕೆಲವು ನಾಯಕರು ಸದಾ ಸಂವಿಧಾನವನ್ನು ಕೈಯಲ್ಲಿ ಹಿಡಿದುಕೊಂಡು, ದೇಶದ ವ್ಯವಸ್ಥೆ ಮತ್ತು ಪ್ರಜಾಪ್ರಭುತ್ವ ತಮ್ಮ ಜೇಬಿನಲ್ಲಿದೆ ಎಂದು ಭ್ರಮೆಪಟ್ಟುಕೊಳ್ಳುತ್ತಾರೆ ಎಂದು ಪ್ರಧಾನಿ ವಾಗ್ದಾಳಿ ನಡೆಸಿದರು.

ಅಧಿಕಾರದ ಅಮಲು: ವಿಪಕ್ಷ ನಾಯಕರು ಅಧಿಕಾರ ಕಳೆದುಕೊಂಡರೂ ಅವರಲ್ಲಿನ ಅಧಿಕಾರದ ದರ್ಪ ಹಾಗೂ ಅಹಂ ಕಡಿಮೆ ಆಗಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಗುಜರಾತ್ ಸಾಧನೆಗೆ ಅಡ್ಡಿ: ತಾವು ಗುಜರಾತ್ ಮುಖ್ಯಮಂತ್ರಿಯಾಗಿದ್ದಾಗ ರಾಜ್ಯದ ಆರ್ಥಿಕ ಪ್ರಗತಿಯ ವರದಿಗಳನ್ನು ಪ್ರಕಟಿಸದಂತೆ ಅಂದಿನ ಕೇಂದ್ರ ಸರ್ಕಾರ ತಡೆ ಒಡ್ಡಲು ಯತ್ನಿಸಿತ್ತು ಎಂದು ಹಳೆಯ ಘಟನೆಯನ್ನು ನೆನಪಿಸಿಕೊಂಡರು.

ಮಾಧ್ಯಮಗಳ ಬಗ್ಗೆ ಹಗುರ ಮಾತು: ತಮ್ಮ ಭಾಷಣದಲ್ಲಿ ಯಾವುದೇ ವಿವಾದಾತ್ಮಕ ಹೇಳಿಕೆ ಸಿಗದೆ ಮಾಧ್ಯಮದವರು ನಿರಾಶರಾಗಿರಬಹುದು ಎಂದು ಹಾಸ್ಯಭರಿತವಾಗಿ ನುಡಿದರು.