ಇನೋಡೇಟಾ ಸಂಸ್ಥೆಯಿಂದ ಭಾರಿ ಲೇಆಫ್: ಭಾರತದಲ್ಲಿ 550, ಫಿಲಿಪೈನ್ಸ್‌ನಲ್ಲೂ ನೂರಾರು ಉದ್ಯೋಗಿಗಳು ವಜಾ

ನವದೆಹಲಿ: ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ ಹಾಗೂ ಡೇಟಾ ಇಂಜಿನಿಯರಿಂಗ್ ಕ್ಷೇತ್ರದಲ್ಲಿ ಮುಂಚೂಣಿಯಲ್ಲಿರುವ ಅಮೆರಿಕ ಮೂಲದ ಇನೋಡೇಟಾ ಸಂಸ್ಥೆಯು ಭಾರತ ಮತ್ತು ಫಿಲಿಪೈನ್ಸ್‌ನಲ್ಲಿ ಬೃಹತ್ ಪ್ರಮಾಣದ ಲೇಆಫ್ ನಡೆಸಿದೆ.

ಅಕ್ಟೋಬರ್ 26 ರಂದು ಭಾರತದಲ್ಲಿ ಸುಮಾರು 550ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ವಜಾಗೊಳಿಸಲಾಗಿದ್ದು, ಫಿಲಿಪೈನ್ಸ್‌ನಲ್ಲೂ ನೂರಾರು ನೌಕರರು ಕೆಲಸ ಕಳೆದುಕೊಂಡಿದ್ದಾರೆ. ಯಾವುದೇ ಪೂರ್ವಸೂಚನೆ ನೀಡದೆ ಏಕಾಏಕಿ ಕಂಪನಿಯ ಸಿಸ್ಟಮ್ ಹಾಗೂ ಐಡಿಗಳನ್ನು ಡಿಆಕ್ಟಿವೇಟ್ ಮಾಡಿದ್ದು, ನೌಕರರಲ್ಲಿ ತೀವ್ರ ಆತಂಕವನ್ನುಂಟುಮಾಡಿದೆ.

ಸಾಮಾನ್ಯ ದಿನದಂತೆ ಬೆಳಿಗ್ಗೆ ಲಾಗಿನ್ ಆಗಿ ಹಾಜರಾತಿ ದಾಖಲಿಸಿದ್ದ ಉದ್ಯೋಗಿಗಳಿಗೆ ಮಧ್ಯಾಹ್ನದ ವೇಳೆಗೆ ಆಘಾತ ಎದುರಾಗಿತ್ತು. ಉದ್ಯೋಗಿಗಳು ಕಾರ್ಯನಿರ್ವಹಿಸುತ್ತಿದ್ದಂತೆಯೇ ಕಂಪನಿಯ ಲ್ಯಾಪ್‌ಟಾಪ್‌ಗಳಿಂದ ಆಟೋಮ್ಯಾಟಿಕ್ ಆಗಿ ಲಾಗ್‌ಔಟ್ ಮಾಡಲಾಗಿದ್ದು, ಎಚ್‌ಆರ್ ಪೋರ್ಟಲ್ ಹಾಗೂ ಕಂಪನಿ ಐಡಿಗಳ ಪ್ರವೇಶವನ್ನು ರದ್ದುಗೊಳಿಸಲಾಯಿತು. ತದನಂತರ ನೌಕರರ ವೈಯಕ್ತಿಕ ಇಮೇಲ್ ಐಡಿಗಳಿಗೆ ವಜಾಗೊಳಿಸಿರುವ ಕುರಿತು ಅಧಿಕೃತ ಇಮೇಲ್ ಕಳುಹಿಸಲಾಗಿದೆ. ಪ್ರಮುಖ ಪ್ರಾಜೆಕ್ಟ್ ಒಂದರ ಕೆಲಸದ ಪ್ರಮಾಣ ತಗ್ಗಿದ ಹಿನ್ನೆಲೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಕಂಪನಿ ತಿಳಿಸಿದೆ.

ಅನಿರೀಕ್ಷಿತ ವಜಾ: ಮುನ್ಸೂಚನೆ ನೀಡದೆ ಭಾರತದಲ್ಲಿ 550 ಹಾಗೂ ಫಿಲಿಪೈನ್ಸ್‌ನಲ್ಲಿ ನೂರಾರು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕಲಾಗಿದೆ.

ಸಿಸ್ಟಮ್ ಲಾಕ್‌ಔಟ್: ಲ್ಯಾಪ್‌ಟಾಪ್, ಎಚ್‌ಆರ್ ಪೋರ್ಟಲ್ ಮತ್ತು ಆಫೀಶಿಯಲ್ ಐಡಿಗಳನ್ನು ತಕ್ಷಣವೇ ಡಿಆಕ್ಟಿವೇಟ್ ಮಾಡಿದ್ದರಿಂದ ಪೇಸ್ಲಿಪ್ ಸೇರಿದಂತೆ ಮುಖ್ಯ ದಾಖಲೆಗಳನ್ನು ಡೌನ್‌ಲೋಡ್ ಮಾಡಲು ನೌಕರರಿಗೆ ಸಾಧ್ಯವಾಗಿಲ್ಲ.

ಕಾರಣ ಸ್ಪಷ್ಟನೆ: ನೌಕರರ ವೈಯಕ್ತಿಕ ಕಾರ್ಯಕ್ಷಮತೆ ಕೊರತೆಯಿಂದಲ್ಲ, ಬದಲಾಗಿ ಉದ್ಯೋಗ ನಿಯೋಜಿಸಲಾಗಿದ್ದ ಪ್ರಾಜೆಕ್ಟ್ ಬಿಸಿನೆಸ್ ಪ್ರಮಾಣ ತಗ್ಗಿರುವ ಕಾರಣಕ್ಕೆ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಕಂಪನಿ ಇಮೇಲ್‌ನಲ್ಲಿ ಸ್ಪಷ್ಟಪಡಿಸಿದೆ.

ಪರಿಹಾರ ಧನ: ಡಿಮ್ಯಾಂಡ್ ಡ್ರಾಫ್ಟ್  ಮೂಲಕ ಪೂರ್ಣ ಮತ್ತು ಅಂತಿಮ ಇತ್ಯರ್ಥ  ನೀಡಲಾಗುತ್ತಿದ್ದು, ಕಂಪನಿಯ ಸ್ವತ್ತುಗಳನ್ನು ಮರಳಿಸಿದ ನಂತರ ನೀಡಲಾಗುವುದು ಎಂದು ಸಂಸ್ಥೆ ತಿಳಿಸಿದೆ.

ತಮ್ಮ ಸಹೋದ್ಯೋಗಿಗಳನ್ನು ಸಂಪರ್ಕಿಸಲು ಮತ್ತು ಪರಿಸ್ಥಿತಿಯ ಗಂಭೀರತೆ ತಿಳಿದುಕೊಳ್ಳಲು ಉದ್ಯೋಗಿಗಳು ವಾಟ್ಸಾಪ್ ಗ್ರೂಪ್‌ಗಳನ್ನು ರಚಿಸಿಕೊಂಡು ಮಾಹಿತಿಯನ್ನು ಹಂಚಿಕೊಳ್ಳುತ್ತಿದ್ದಾರೆ. ತಾಂತ್ರಿಕ ಕ್ಷೇತ್ರದಲ್ಲಿ ಮಾರುಕಟ್ಟೆ ಏರಿಳಿತ ಮತ್ತು ಪ್ರಾಜೆಕ್ಟ್ ಕಡಿತದ ಸವಾಲುಗಳು ಉದ್ಯೋಗಿಗಳ ಭವಿಷ್ಯವನ್ನು ಕತ್ತಲಿಗೆ ತಳ್ಳುತ್ತಿರುವುದಕ್ಕೆ ಈ ಘಟನೆ ಮತ್ತೊಂದು ಸಾಕ್ಷಿಯಾಗಿದೆ.