ಮಥುರಾ: ಚುನಾವಣೆಯಲ್ಲಿ ಜನರಿಂದ ಮತ ಸಿಗದಿದ್ದಾಗ ವಿರೋಧ ಪಕ್ಷಗಳು ‘ಮತ ಕಳ್ಳತನ’ ಮಾಡಲಾಗಿದೆ ಎಂದು ಆರೋಪಿಸಲು ಶುರು ಮಾಡುತ್ತವೆ ಎಂದು ಬಿಜೆಪಿ ಸಂಸದೆ ಹಾಗೂ ನಟಿ ಹೇಮಾಮಾಲಿನಿ ತಿರುಗೇಟು ನೀಡಿದ್ದಾರೆ.
ಉತ್ತರ ಪ್ರದೇಶದಲ್ಲಿ 2027ರ ವಿಧಾನಸಭಾ ಚುನಾವಣೆ ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ ಮಥುರಾದಲ್ಲಿ ಆಯೋಜಿಸಲಾಗಿರುವ ಪಕ್ಷದ ಎರಡು ದಿನಗಳ ಮಹತ್ವದ ಕಾರ್ಯತಂತ್ರ ಸಭೆಯ ಒಡನಾಟದಲ್ಲಿ ಎನ್ಡಿಟಿವಿ ಜೊತೆ ಮಾತನಾಡಿದ ಅವರು ಈ ವಾಗ್ದಾಳಿ ನಡೆಸಿದರು.
ಪ್ರಧಾನಿ ನರೇಂದ್ರ ಮೋದಿ ಹಾಗೂ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರ ನಾಯಕತ್ವದ ಬಗ್ಗೆ ಹೆಮ್ಮೆಯಿದೆ ಎಂದು ತಿಳಿಸಿದ ಅವರು, ಬಿಜೆಪಿ ಸರ್ಕಾರವು ನೀಡಿದ ಭರವಸೆಗಳನ್ನು ಈಡೇರಿಸುವ ಮೂಲಕ ಅಭಿವೃದ್ಧಿಯ ಹಾದಿಯಲ್ಲಿ ಮುನ್ನಡೆಯುತ್ತಿದೆ ಎಂದರು. 2027ರ ಯುಪಿ ವಿಧಾನಸಭಾ ಚುನಾವಣೆಯಲ್ಲಿ ದೊಡ್ಡ ಅಂತರದಿಂದ ಭರ್ಜರಿ ಜಯಗಳಿಸುವುದೇ ನಮ್ಮ ಪ್ರಮುಖ ಗುರಿಯಾಗಿದೆ ಎಂದು ಹೇಮಾಮಾಲಿನಿ ಸ್ಪಷ್ಟಪಡಿಸಿದರು.
ವಿಪಕ್ಷಗಳ ವಿರುದ್ಧ ವೋಟ್ ಚೋರಿ ವಾಗ್ದಾಳಿ: ವಿರೋಧ ಪಕ್ಷಗಳಿಗೆ ಚುನಾವಣೆಯಲ್ಲಿ ಸೋಲಾದಾಗಲೆಲ್ಲಾ ಇವಿಎಂ ಅಥವಾ ವೋಟ್ ಕಳ್ಳತನದ ಆರೋಪ ಮಾಡುವುದು ನಿತ್ಯದ ಚಾಳಿಯಾಗಿದೆ ಎಂದು ಅವರು ವ್ಯಂಗ್ಯವಾಡಿದರು.
ಮಥುರಾದಲ್ಲಿ ಬಿಜೆಪಿಯ ಮಹತ್ವದ ಸಭೆ: 2027ರ ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆಗೆ ಪಕ್ಷದ ರಸ್ತೆ ನಕ್ಷೆ ಹಾಗೂ ಚುನಾವಣಾ ಕಾರ್ಯತಂತ್ರ ರೂಪಿಸಲು ಸುಮಾರು 50 ಹಿರಿಯ ನಾಯಕರು ಮಥುರಾದಲ್ಲಿ ಸಭೆ ಸೇರಿದ್ದಾರೆ.
ರಾಜ್ಯದಲ್ಲಿ ಕೈಗಾರಿಕಾ ಕ್ರಾಂತಿ: ಹಿಂದೆ ಉತ್ತರ ಪ್ರದೇಶಕ್ಕೆ ಬಂಡವಾಳ ಹೂಡಿಕೆದಾರರು ಬರಲು ಹಿಂದೇಟು ಹಾಕುತ್ತಿದ್ದರು. ಆದರೆ ಯೋಗಿ ಆದಿತ್ಯನಾಥ್ ಆಡಳಿತದಲ್ಲಿ ಇಂದು ಉದ್ಯಮಿಗಳು ಮುಂದೆ ಬರುತ್ತಿರುವುದು ರಾಜ್ಯದಲ್ಲಿ ಕಂಡುಬಂದಿರುವ ಸ್ವಾಗತಾರ್ಹ ಬದಲಾವಣೆಯಾಗಿದೆ ಎಂದರು.
ಮಥುರಾ ದೇಗುಲದ ಕುರಿತು ಪ್ರತಿಕ್ರಿಯೆ: ಅಯೋಧ್ಯೆ ಮತ್ತು ಕಾಶಿಯಂತೆ ಮಥುರಾದಲ್ಲೂ ಶ್ರೀಕೃಷ್ಣನ ದೇವಸ್ಥಾನದ ಕುರಿತ ಚರ್ಚೆಗೆ ಪ್ರತಿಕ್ರಿಯಿಸಿ, ಇದು ಕೃಷ್ಣನ ನಗರಿಯಾಗಿದ್ದು ಆತನ ಕೃಪೆಯಿಂದ ಎಲ್ಲವೂ ಒಳ್ಳೆಯದಾಗಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಸೋನಿಯಾ ಗಾಂಧಿ ಅವರ ಇತ್ತೀಚಿನ ‘ಬೆಲಾಂಗಿಂಗ್’ ಆತ್ಮಕಥೆಯ ಕುರಿತು ಮಾತನಾಡಿದ ಅವರು, ತಾನು ಇನ್ನೂ ಪುಸ್ತಕ ಓದಿಲ್ಲವಾದರೂ, ಸೋನಿಯಾ ಗಾಂಧಿ ತಮ್ಮ ಒಳ್ಳೆಯ ಸ್ನೇಹಿತೆಯಾಗಿದ್ದು ಖಂಡಿತವಾಗಿಯೂ ಪುಸ್ತಕವನ್ನು ಓದುವುದಾಗಿ ತಿಳಿಸಿದರು.





Leave a comment