ಮೊದಲ ಓವರ್‌ನಲ್ಲೇ ವಿಕೆಟ್ ಒಪ್ಪಿಸಿದ ಸ್ಟಾರ್ ಬ್ಯಾಟ್ಸ್‌ಮನ್‌ಗಳು: ಬ್ಯಾಟಿಂಗ್ ವೈಫಲ್ಯದ ಬಗ್ಗೆ ಕೋಚ್ ಗಂಭೀರ್ ಗರಂ!

ನವದೆಹಲಿ: ನ್ಯೂಜಿಲೆಂಡ್‌ ವಿರುದ್ಧದ 4ನೇ ಏಕಏಕದಿನ ಪಂದ್ಯದಲ್ಲಿ ಭಾರತ ಕ್ರಿಕೆಟ್ ತಂಡವು ಕೇವಲ 89 ರನ್‌ಗಳಿಗೆ ಆಲೌಟ್ ಆಗಿ 244 ರನ್‌ಗಳ ಬೃಹತ್ ಅಂತರದಿಂದ ಹೀನಾಯ ಸೋಲು ಅನುಭವಿಸಿದೆ. ಈ ಪಂದ್ಯದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಭಾರತ ತಂಡದ ಮುಖ್ಯ ಕೋಚ್ ಗೌತಮ್ ಗಂಭೀರ್, ಆರಂಭಿಕ ಆಘಾತ ಅನುಭವಿಸಿದ ಹಿರಿಯ ಆಟಗಾರರಾದ ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ ಮತ್ತು ಶ್ರೇಯಸ್ ಅಯ್ಯರ್ ಅವರ ಕಳಪೆ ಬ್ಯಾಟಿಂಗ್ ಪ್ರದರ್ಶನದ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದು, ಮ್ಯಾಟ್ ಹೆನ್ರಿ ಎಸೆತಗಳು ಅಸಾಧ್ಯವಾಗಿರಲಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ನ್ಯೂಜಿಲೆಂಡ್‌ ನೀಡಿದ 333 ರನ್‌ಗಳ ಬೃಹತ್ ಗುರಿಯನ್ನು ಬೆನ್ನಟ್ಟಿದ ಭಾರತ ತಂಡದ ಆರಂಭವೇ ಅತ್ಯಂತ ಕಳಪೆಯಾಗಿತ್ತು. ಕಿವೀಸ್ ವೇಗಿ ಮ್ಯಾಟ್ ಹೆನ್ರಿ ತಮ್ಮ ಮೊದಲ ಓವರ್‌ನಲ್ಲೇ ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ ಮತ್ತು ಶ್ರೇಯಸ್ ಅಯ್ಯರ್ ಅವರನ್ನು ಶೂನ್ಯ ಸುತ್ತಿಗೆ (ಡಕ್ಸ್) ಔಟ್ ಮಾಡುವ ಮೂಲಕ ಭಾರತಕ್ಕೆ ದೊಡ್ಡ ಆಘಾತ ನೀಡಿದರು. ಈ ಕುರಿತು ಮಾತನಾಡಿದ ಗಂಭೀರ್, ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಆಡಲು ಸಾಧ್ಯವೇ ಇಲ್ಲದ ಯಾವುದೇ ಎಸೆತಗಳಿರುವುದಿಲ್ಲ. ಮೊದಲ 10 ಓವರ್‌ಗಳನ್ನು ಆಡಿ ನಿಲ್ಲಿಸಬೇಕಿತ್ತು. ಮ್ಯಾಟ್ ಹೆನ್ರಿ ಉತ್ತಮ ಪ್ರದೇಶಗಳಲ್ಲಿ ಬೌಲಿಂಗ್ ಮಾಡಿದರು ನಿಜ, ಆದರೆ ನಾವು ಅದನ್ನು ಸಮರ್ಥವಾಗಿ ಎದುರಿಸಬೇಕಿತ್ತು ಎಂದು ಖಡಕ್ ಆಗಿ ನುಡಿದರು.

ಬ್ಯಾಟಿಂಗ್ ವೈಫಲ್ಯದ ಕಳವಳ: ಕೇವಲ 90 ರನ್‌ಗಳ್ಳೊಳಗೆ ತಂಡ ಆಲೌಟ್ ಆಗಿರುವುದು ಕಳವಳಕಾರಿಯಾಗಿದೆ. ಇದರ ಹಿಂದಿನ ಪಂದ್ಯದಲ್ಲೂ ನಾವು 111 ರನ್‌ಗಳಿಗೆ 7 ವಿಕೆಟ್ ಕಳೆದುಕೊಂಡಿದ್ದೆವು. ಆಟಗಾರರು ಮಾನಸಿಕವಾಗಿ ಮತ್ತು ಕೌಶಲ್ಯದ ಮಟ್ಟದಲ್ಲಿ ಸಿದ್ಧರಾಗಬೇಕಿದೆ ಎಂದು ಗಂಭೀರ್ ತಿಳಿಸಿದ್ದಾರೆ.

ಫೀಲ್ಡಿಂಗ್ ಲೋಪಗಳು: ನ್ಯೂಜಿಲೆಂಡ್‌ 333 ರನ್ ಗಳಿಸಿದರೂ ಬೌಲಿಂಗ್ ವಿಭಾಗದ ಬಗ್ಗೆ ತಮಗೆ ಹೆಚ್ಚಿನ ದೂರುಗಳಿಲ್ಲ. ಆದರೆ ಫೀಲ್ಡಿಂಗ್ ವೇಳೆ ಕೆಲವು ಕ್ಯಾಚ್‌ಗಳನ್ನು ಕೈಚೆಲ್ಲಿದ್ದರಿಂದ ನಾವು ದೊಡ್ಡ ಬೆಲೆ ತೆರಬೇಕಾಯಿತು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ತಾಂತ್ರಿಕ ಲೋಪಗಳಲ್ಲ, ಎಚ್ಚರಿಕೆಯ ಕೊರತೆ: ಪಿಚ್‌ನ ಸೀಮ್ ಮೂವ್‌ಮೆಂಟ್ ಬಗ್ಗೆ ಮಾತನಾಡಿದ ಗಂಭೀರ್, ತಾವು ತಾಂತ್ರಿಕ ವಿಷಯಗಳ ಬಗ್ಗೆ ಹೆಚ್ಚು ತಲೆಕೆಡಿಸಿಕೊಳ್ಳುವುದಿಲ್ಲ. ಬ್ಯಾಟ್ಸ್‌ಮನ್‌ಗಳು ಚಲನೆಯನ್ನು ನಿಭಾಯಿಸಬೇಕು. ಸೀಮ್‌ಗಿಂತ ಹೆಚ್ಚಾಗಿ ಬೌಲರ್‌ಗಳ ಲೆಂಗ್ತ್ ಮತ್ತು ಸರಿಯಾದ ಜಾಗದಲ್ಲಿ ಎಸೆದದ್ದೇ ಸಮಸ್ಯೆಯನ್ನುಂಟುಮಾಡಿತು ಎಂದಿದ್ದಾರೆ.

ವಿಶ್ವಕಪ್ ಸಿದ್ಧತೆಯ ಹತ್ತಿರದಲ್ಲಿರುವ ಈ ಸಂದರ್ಭದಲ್ಲಿ ಬ್ಯಾಟಿಂಗ್‌ ವಿಭಾಗದಲ್ಲಿ ನಿರಂತರವಾಗಿ ಕುಸಿತ ಕಾಣುತ್ತಿರುವುದು ತಂಡಕ್ಕೆ ದೊಡ್ಡ ತಲೆನೋವಾಗಿ ಪರಿಣಮಿಸಿದ್ದು, ಮುಂದಿನ ಅಂತಿಮ ಪಂದ್ಯದಲ್ಲಿ ಆಟಗಾರರು ಎಚ್ಚೆತ್ತುಕೊಂಡು ಪ್ರದರ್ಶನ ನೀಡಬೇಕಾದ ಅಗತ್ಯವಿದೆ.