ಡಾಕ್ಟೋರೇಟ್ ಪದವಿಗೆ ಡಾ. ವಾಸುದೇವ ಕಲ್ಕುಂಟೆ ಆತ್ರೆ, ರೇವಣಸಿದ್ದಯ್ಯ ಭಾಜನ: ಈ ಸಾಧಕರ ಫುಲ್ ಡೀಟೈಲ್ಸ್

ದಾವಣಗೆರೆ: ದಾವಣಗೆರೆ ವಿವಿಯಿಂದ ಕೊಡಮಾಡಲ್ಪಡುವ ಡಾಕ್ಟೊರೇಟ್ ಗೆ ಡಾ. ವಾಸುದೇವ ಕಲ್ಕುಂಟೆ ಆತ್ರೆ ಭಾಜನರಾಗಿದ್ದಾರೆ. ಸಾಧಕರಾದ ಎಲ್. ರೇವಣ್ಣಸಿದ್ಧಯ್ಯ, ವಿಶ್ರಾಂತ ಐ.ಪಿ.ಎಸ್ ಅಧಿಕಾರಿ ಅವರಿಗೂ ಡಾಕ್ಟೊರೇಟ್ ನೀಡಲಾಗಿದೆ. 

ಡಾ. ವಾಸುದೇವ್ ಕಲ್ಕುಂಟೆ ಆತ್ರೆ (ವಿ.ಕೆ. ಆತ್ರೆ) ಅವರು ಭಾರತದ ಅತ್ಯಂತ ವಾಯುಯಾನ ಮತ್ತು ರಕ್ಷಣಾ ವಿಜ್ಞಾನಿಗಳಲ್ಲಿ ಒಬ್ಬರಾಗಿದ್ದು, ಅವರ ವೃತ್ತಿಜೀವನವು ದೇಶದ ತಾಂತ್ರಿಕ ಸ್ವಾವಲಂಬನೆಯ ಗುರಿಯೊಂದಿಗೆ ಆಳವಾಗಿ ಜೋಡಣೆಗೊಂಡಿದೆ.

1939ರಲ್ಲಿ ಬೆಂಗಳೂರು ನಗರದಲ್ಲಿ ಜನಿಸಿದ ಅವರು, ಬಾಲ್ಯದಲ್ಲಿಯೇ ಎಂಜಿನಿಯರಿಂಗ್ ಮೇಲಿನ ಆಸಕ್ತಿಯನ್ನು ಬೆಳೆಸಿಕೊಂಡು, ಮುಂದಿನ ದಿನಗಳಲ್ಲಿ ಭಾರತದ ಆಧುನಿಕ ರಕ್ಷಣಾ ಸಂಶೋಧನಾ ವ್ಯವಸ್ಥೆಯನ್ನು ರೂಪಿಸುವಲ್ಲಿ ಮಹತ್ವದ ಪಾತ್ರವಹಿಸಿದರು.

ಡಾ. ಆತ್ರೆ ಅವರು ಭಾರತದಲ್ಲೇ ತಮ್ಮ ಪ್ರಾರಂಭಿಕ ವಿದ್ಯಾಭ್ಯಾಸವನ್ನು ಪೂರ್ಣಗೊಳಿಸಿ, 1967ರಲ್ಲಿ ಕೆನಡಾದ ಯೂನಿವರ್ಸಿಟಿ ಆಫ್ ವಾಟರ್‌ಲೂನಲ್ಲಿ ಎಂಜಿನಿಯರಿಂಗ್ ವಿಷಯದಲ್ಲಿ ಪಿಎಚ್.ಡಿ ಪದವಿಯನ್ನು ಪಡೆದರು. ಕೆಲ ವರ್ಷಗಳು ಕೆನಡಾದಲ್ಲಿ ಕಾರ್ಯನಿರ್ವಹಿಸಿದ ನಂತರ, ದೇಶ ಸೇವೆಯ ಉದ್ದೇಶದಿಂದ ಭಾರತಕ್ಕೆ ಮರಳಿ, ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆಗೆ ಸೇರಿದರು. ಈ ನಿರ್ಧಾರವು ಭಾರತದ ರಕ್ಷಣಾ ವಿಜ್ಞಾನ ಕ್ಷೇತ್ರದಲ್ಲಿ ಅವರ ದೀರ್ಘ ಮತ್ತು ಪ್ರಭಾವಶಾಲಿ ಸೇವೆಯ ಆರಂಭವಾಗಿತ್ತು.

ಡಿಆರ್‌ಡಿಒನಲ್ಲಿ ಹಂತಹಂತವಾಗಿ ಉನ್ನತ ಸ್ಥಾನಗಳಿಗೆ ಏರಿದ ಡಾ. ಆತ್ರೆ ಅವರು, ಸಂಸ್ಥೆಯ ಮಹಾನಿರ್ದೇಶಕರಾಗಿ ಹಾಗೂ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಇಲಾಖೆಯ ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸಿದರು.

1999ರಿಂದ 2004ರವರೆಗೆ ಅವರು ಭಾರತದ ರಕ್ಷಣಾ ಸಚಿವರ ವೈಜ್ಞಾನಿಕ ಸಲಹೆಗಾರರಾಗಿ ಕಾರ್ಯನಿರ್ವಹಿಸಿದರು. ಈ ಅವಧಿಯಲ್ಲಿ ಲೈಟ್ ಕಾಂಬಾಟ್ ಏರ್‌ಕ್ರಾಫ್ಟ್ (ತೇಜಸ್), ಕಾವೇರಿ ಏರೋ ಎಂಜಿನ್, ಅರ್ಜುನ್ ಮುಖ್ಯ ಯುದ್ಧ ಟ್ಯಾಂಕ್, ಕ್ಷಿಪಣಿ ವ್ಯವಸ್ಥೆಗಳು ಮತ್ತು ಎಲೆಕ್ಟ್ರಾನಿಕ್ ವಾರ್‌ಫೇರ್ ತಂತ್ರಜ್ಞಾನಗಳಂತಹ ಪ್ರಮುಖ ಸ್ವದೇಶಿ ರಕ್ಷಣಾ ಯೋಜನೆಗಳಿಗೆ ತಂತ್ರಾತ್ಮಕ ಮಾರ್ಗದರ್ಶನ ನೀಡಿದರು. ಈ ಯೋಜನೆಗಳು ಇಂದಿಗೂ ಭಾರತದ ರಕ್ಷಣಾ ಸಾಮರ್ಥ್ಯದ ಮೂಲಸ್ತಂಭಗಳಾಗಿವೆ.

ನೀರಿನಡಿ ತಂತ್ರಜ್ಞಾನಗಳ ಕ್ಷೇತ್ರದಲ್ಲಿ ಡಾ. ಆತ್ರೆ ಅವರ ಕೊಡುಗೆ ಅತ್ಯಂತ ಮಹತ್ವದ್ದಾಗಿದೆ. ಸೋನಾರ್ ಮತ್ತು ಟ್ರಾನ್ಸ್ಡ್ಯೂಸರ್ ತಂತ್ರಜ್ಞಾನಗಳಲ್ಲಿ ಅವರು ಭಾರತದಲ್ಲಿ ಮುಂಚೂಣಿಯವರಾಗಿದ್ದು, ಧ್ವನಿ ಎಂಬ ನೀರಿನಡಿ ಸಂಶೋಧನಾ ಮೂಲಸೌಕರ್ಯವನ್ನು ಸ್ಥಾಪಿಸುವ ಮೂಲಕ ದೇಶದ ಸಮುದ್ರ ರಕ್ಷಣಾ ಸಾಮರ್ಥ್ಯಕ್ಕೆ ಬಲ ನೀಡಿದರು. ಜೊತೆಗೆ, ಸಾಗರಧ್ವನಿ ಎಂಬ ಸಾಗರಶಾಸ್ತ್ರೀಯ ಸಂಶೋಧನಾ ಹಡಗಿನ ಅಭಿವೃದ್ಧಿಯಲ್ಲೂ ಅವರು ಪ್ರಮುಖ ಪಾತ್ರ ವಹಿಸಿದರು.

ಡಿಆರ್‌ಡಿಒಯಿಂದ ನಿವೃತ್ತಿಯಾದ ಬಳಿಕವೂ ಡಾ. ಆತ್ರೆ ಅವರು ವಿಜ್ಞಾನ, ತಂತ್ರಜ್ಞಾನ ಮತ್ತು ಶಿಕ್ಷಣ ಕ್ಷೇತ್ರಗಳಲ್ಲಿ ಸಕ್ರಿಯರಾಗಿಯೇ ಉಳಿದರು. ಭಾರತೀಯ ಎಂಜಿನಿಯರಿಂಗ್ ವಿಜ್ಞಾನ ಮತ್ತು ತಂತ್ರಜ್ಞಾನ ಸಂಸ್ಥೆ, ಶಿಬ್ಪುರದ ಅಧ್ಯಕ್ಷರಾಗಿಯೂ ಸೇರಿದಂತೆ ಅನೇಕ ಸಲಹಾ ಮತ್ತು ನಾಯಕತ್ವದ ಪಾತ್ರಗಳನ್ನು ವಹಿಸಿಕೊಂಡರು.

ಅವರ ವಿಶಿಷ್ಟ ಸೇವೆಗೆ ಗೌರವವಾಗಿ ಡಾ. ಆತ್ರೆ ಅವರಿಗೆ ಪದ್ಮ ಭೂಷಣ (2000) ಮತ್ತು ಪದ್ಮ ವಿಭೂಷಣ (2016) ಸೇರಿದಂತೆ ಅನೇಕ ಪ್ರತಿಷ್ಠಿತ ಪ್ರಶಸ್ತಿಗಳನ್ನು ನೀಡಲಾಗಿದೆ. ಸ್ವದೇಶಿ ರಕ್ಷಣಾ ತಂತ್ರಜ್ಞಾನಗಳ ಅಭಿವೃದ್ಧಿಗೆ ಅವರ ದೃಷ್ಟಿ, ನಾಯಕತ್ವ
ಮತ್ತು ನಿಷ್ಠೆ ಭಾರತೀಯ ವಿಜ್ಞಾನ ಇತಿಹಾಸದಲ್ಲಿ ಶಾಶ್ವತವಾದ ಸ್ಥಾನ ಪಡೆದಿದೆ.

ಎಲ್. ರೇವಣ್ಣಸಿದ್ಧಯ್ಯ, ವಿಶ್ರಾಂತ ಐ.ಪಿ.ಎಸ್ ಅಧಿಕಾರಿ:

ಎಲ್. ರೇವಣ್ಣಸಿದ್ಧಯ್ಯನವರು, ಕರ್ನಾಟಕದ ವಿಶ್ರಾಂತ ಡೈರೆಕ್ಟರ್ ಜನರಲ್ (ಕಾರಾಗೃಹ) ಮತ್ತು ಇನ್ಸ್ಪೆಕ್ಟರ್ ಜನರಲ್ ಆಫ್ ಪೊಲೀಸ್ ಅಧಿಕಾರಿಯಾಗಿ ಕರ್ತವ್ಯ ನಿರ್ವಹಿಸಿದ್ದು, ಸದರಿಯವರು 1940 ರಲ್ಲಿ ಕರ್ನಾಟಕದಲ್ಲಿ ಜನಿಸಿದವರಾಗಿದ್ದಾರೆ.

ಇವರು ಐ.ಪಿ.ಎಸ್. ಕರ್ನಾಟಕ ಕೇಡರ್ ಅಧಿಕಾರಿಯಾಗಿ 1965 ರಲ್ಲಿ ನೇಮಕಗೊಂಡಿದ್ದು, ಜಿಲ್ಲಾ ವರಿಷ್ಠಾಧಿಕಾರಿಯಾಗಿ ಸೇವೆಯನ್ನು ಪ್ರಾರಂಭಿಸಿದ್ದು, ಸುಮಾರು ನಾಲ್ಕು ದಶಕಗಳವರೆಗೆ ನಮ್ಮ ರಾಜ್ಯದಲ್ಲಿ ಪೊಲೀಸ್ ಇಲಾಖೆಯಲ್ಲಿ ಅನೇಕ ಸ್ತರದ ಉನ್ನತ ಹುದ್ದೆಗಳಲ್ಲಿ ಸೇವೆ ಸಲ್ಲಿಸಿದ್ದಾರೆ. ಅಂದಿನ ದಿನಗಳಲ್ಲಿ ಹೊಸದಾಗಿ ವ್ಯವಸ್ಥಿತವಾಗಿದ್ದ ಪತ್ತೇದಾರಿ ದಳ (ಸಿ.ಒ.ಡಿ) ಕೋರ್ ಆಫ್ ಡಿಟೆಕ್ಟಿವ್ ಇನ್ಸಪೆಕ್ಟರ್ ಜನರಲ್ ಆಗಿ ನಿಯೋಜಿಸಲ್ಪಟ್ಟ ಎಲ್. ರೇವಣ್ಣಸಿದ್ದಯ್ಯನವರು ಆ ವ್ಯವಸ್ಥೆಯ ಕಾರ್ಯ ನಿರ್ವಹಣೆಯ ಗುಣಮಟ್ಟವನ್ನು ಸ್ಕಾಟ್‌ಲ್ಯಾಂಡ್ ಯಾರ್ಡ್ ಪತ್ತೆದಾರಿ ತಂಡದ ಸಮಾನತೆಗೆ ಬೆಳೆಸುವ ಸಾಧನೆಯನ್ನು ಮಾಡಿ ತೋರಿಸಿದರು. ಬೆಂಗಳೂರು ನಗರ ಪೊಲೀಸ್ ಕಮೀಷನರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಅವಧಿಯಲ್ಲಿ ಕೆಲವು ವಿಶೇಷ ಯೋಜನೆಗಳನ್ನು ಹೊಯ್ಸಳ ಪೊಲೀಸ್ ಪಡೆ, ಮಕ್ಕಳ ಸಹಾಯವಾಣಿ, ವನಿತಾ ಸಹಾಯವಾಣಿ ಹಾಗೂ ಸಂಚಾರಿ ಪೊಲೀಸ್ ಸ್ಟೇಷನ್ ನಂತಹ ಕಾರ್ಯ ಯೋಜನೆಗಳನ್ನು ಜಾರಿಗೆ ತಂದ ಪರಿಪೂರ್ಣತೆಯ ಕೀರ್ತಿ ಇವರಿಗೆ ಸೇರಿದೆ.

ರೇವಣ್ಣಸಿದ್ಧಯ್ಯನವರು ಡಿ.ಜಿ ಮತ್ತು ಐ.ಜಿ.ಪಿ (ಕಾರಾಗೃಹ) ಯಾಗಿದ್ದ ಅವಧಿಯಲ್ಲಿ ಕೈದಿಗಳಿಗೆ ಅತ್ಯುತ್ತಮ ಸಲಹೆಗಾರ – ಅವರ ಮನ ಪರಿವರ್ತನೆಯಲ್ಲಿ ಶ್ಲಾಘನೀಯ ಸೇವೆ ಸಲ್ಲಿಸಿರುತ್ತಾರೆ. ಅಲ್ಲದೆ, ಬಂಧಿಖಾನೆಗಳಲ್ಲಿ ನೈರ್ಮಲ್ಯತೆ ಮತ್ತು ಸುಧಾರಿತ ಸೌಲಭ್ಯಗಳನ್ನು ಜಾರಿಗೊಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಪೊಲೀಸ್ ಸೇವೆಯು ಸಮಾಜದಲ್ಲಿ ಕೋಮು ಸಾಮರಸ್ಯಗಳನ್ನು ಮತ್ತು ಸೌಹಾರ್ಧತೆಯನ್ನು ಸೃಜಿಸುವ ದಿಸೆಯಲ್ಲಿ ಮುಖ್ಯ ಪಾತ್ರ ವಹಿಸುತ್ತದೆ. ಮಾನ್ಯರು ಇಂತಹ ಮಹಾತ್ಕಾರ್ಯದಲ್ಲಿ ಯಶಸ್ವಿಯಾಗಿದ್ದಾರೆ.

ಇವರು ಸೇವೆಯಿಂದ ನಿವೃತ್ತಿಯಾದ ನಂತರ ಅನೇಕಾನೇಕ ಶಿಕ್ಷಣ ಸಂಸ್ಥೆಗಳ ಸಲಹೆಗಾರರಾಗಿ, ಮುಖ್ಯಸ್ಥರಾಗಿ ಮತ್ತು ದಾನಿಗಳಾಗಿ ಗುರುತರ ಮತ್ತು ಜವಾಬ್ದಾರಿಯುತವಾಗಿ ಸಲ್ಲಿಸುತ್ತಿರುವ ಸೇವೆಯನ್ನು ಗುರುತಿಸಿ, 2026ರ ಜನವರಿ 30ರಂದು ನಡೆಯುವ ವಾರ್ಷಿಕ ಘಟಿಕೋತ್ಸವ ಸಮಾರಂಭದಲ್ಲಿ ದಾವಣಗೆರೆ ವಿಶ್ವವಿದ್ಯಾನಿಲಯದಿಂದ “ಡಿ.ಲಿಟ್ – ಗೌರವ ಡಾಕ್ಟರೇಟ್” ಪದವಿಯನ್ನು ಪ್ರದಾನ ಮಾಡಲಾಗುತ್ತಿದೆ.