ದಾವಣಗೆರೆ, ಸಂತೇಬೆನ್ನೂರು, ಚನ್ನಗಿರಿಯಲ್ಲಿ ಗ್ಯಾಂಬ್ಲಿಂಗ್ ಜಾಲ ಧ್ವಂಸ: ₹61 ಸಾವಿರಕ್ಕೂ ಅಧಿಕ ಹಣ ಸೀಜ್, 24 ಜೂಜುಕೋರರು ಪೊಲೀಸ್ ವಶಕ್ಕೆ!

ದಾವಣಗೆರೆ: ಜಿಲ್ಲೆಯ ವಿವಿಧ ಪೊಲೀಸ್ ಠಾಣಾ ವ್ಯಾಪ್ತಿಗಳಲ್ಲಿ ಕಾನೂನು ಬಾಹಿರವಾಗಿ ನಡೆಯುತ್ತಿದ್ದ ಇಸ್ಫೀಟ್ ಜೂಜಾಟದ ಅಡ್ಡೆಗಳ ಮೇಲೆ ಪೊಲೀಸರು ಭರ್ಜರಿ ದಾಳಿ ನಡೆಸಿದ್ದಾರೆ. ಪ್ರತ್ಯೇಕವಾಗಿ ನಡೆದ ಈ ದಾಳಿಗಳಲ್ಲಿ ಒಟ್ಟು 24 ಜನರನ್ನು ವಶಕ್ಕೆ ಪಡೆದು, ಅವರಿಂದ ಒಟ್ಟು ₹61,100/- ನಗದು ಹಣವನ್ನು ಜಪ್ತಿ ಮಾಡಲಾಗಿದೆ.

ದಾವಣಗೆರೆ ಜಿಲ್ಲಾ ಪೊಲೀಸ್ ಅಧೀಕ್ಷಕ ಶೇಖರ್ ಹೆಚ್.ಟಿ. ಅವರ ನಿರ್ದೇಶನ ಹಾಗೂ ಹೆಚ್ಚುವರಿ ಪೊಲೀಸ್ ಅಧೀಕ್ಷಕ ಪರಮೇಶ್ವರ ಹೆಗಡೆ ಅವರ ಮಾರ್ಗದರ್ಶನದಲ್ಲಿ ಈ ಯಶಸ್ವಿ ಕಾರ್ಯಾಚರಣೆಗಳನ್ನು ನಡೆಸಲಾಗಿದೆ.

1. ಸಂತೇಬೆನ್ನೂರು: ಹಳ್ಳದ ದಡದ ಜೂಜಾಟಕ್ಕೆ ಬ್ರೇಕ್, ₹46,000 ವಶ

ಸಂತೇಬೆನ್ನೂರು ಪೊಲೀಸ್ ಠಾಣೆ ವ್ಯಾಪ್ತಿಯ ಕಾಕನೂರು ಬಳಿಯ ಹಳ್ಳದ ದಡದಲ್ಲಿ ಇಸ್ಫೀಟ್ ಆಡುತ್ತಿದ್ದ ಖಚಿತ ಮಾಹಿತಿ ಮೇರೆಗೆ ಎ.ಎನ್.ಟಿ.ಎಫ್ ತಂಡ ದಾಳಿ ಮಾಡಿದೆ. ಚನ್ನಗಿರಿ ಪ್ರಭಾರ ಡಿವೈಎಸ್ಪಿ ಬಸವರಾಜ್ ಬಿ.ಎಸ್ ಮಾರ್ಗದರ್ಶನದಲ್ಲಿ ಇನ್ಸ್‌ಪೆಕ್ಟರ್ ಕೆ.ಟಿ. ಅಣ್ಣಯ್ಯ ಹಾಗೂ ಪಿಎಸ್ಐ ಸಾಗರ್ ಅತ್ತರ್ ವಾಲಾ ನೇತೃತ್ವದ ತಂಡ 6 ಜನರನ್ನು ಬಂಧಿಸಿ, ₹46,000 ನಗದು ವಶಪಡಿಸಿಕೊಂಡಿದೆ. ಈ ಯಶಸ್ವಿ ದಾಳಿ ನಡೆಸಿದ ತಂಡಕ್ಕೆ ಎಸ್ಪಿಯವರು ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.

2. ಚನ್ನಗಿರಿ: ರಸ್ತೆ ಪಕ್ಕದಲ್ಲೇ ಜೂಜಾಡುತ್ತಿದ್ದವರ ಬಂಧನ

ಚನ್ನಗಿರಿ ಠಾಣೆ ವ್ಯಾಪ್ತಿಯ ಗಾಳಿಹಳ್ಳಿ-ಮುದಿಗೇರೆ ರಸ್ತೆ ಪಕ್ಕದಲ್ಲಿ ಜೂಜಾಡುತ್ತಿದ್ದ ಅಡ್ಡೆಯ ಮೇಲೆ ಇನ್ಸ್‌ಪೆಕ್ಟರ್ ರವೀಶ್ ಕೆ.ಎನ್ ನೇತೃತ್ವದ ತಂಡ ದಾಳಿ ನಡೆಸಿ 4 ಜನರನ್ನು ವಶಕ್ಕೆ ಪಡೆದಿದೆ. ಆರೋಪಿಗಳಿಂದ ₹3,550 ನಗದು ಹಣವನ್ನು ಜಪ್ತಿ ಮಾಡಲಾಗಿದೆ.

3. ಕೆಂಪನಹಳ್ಳಿ: ಸಾರ್ವಜನಿಕ ಸ್ಥಳದಲ್ಲಿ ಇಸ್ಫೀಟ್ ಆಡುತ್ತಿದ್ದ 6 ಜನರ ಸೆರೆ

ಸಂತೇಬೆನ್ನೂರು ಠಾಣೆ ವ್ಯಾಪ್ತಿಯ ಕೆಂಪನಹಳ್ಳಿ ಗ್ರಾಮದ ಬಳಿ ರಸ್ತೆ ಬದಿಯಲ್ಲಿ ಇಸ್ಫೀಟ್ ಆಡುತ್ತಿದ್ದವರ ಮೇಲೆ ಸಂತೇಬೆನ್ನೂರು ಸಿಪಿಐ ಶ್ರೀಮತಿ ಮಲ್ಲಮ್ಮ ಚೌಬೆ ನೇತೃತ್ವದ ತಂಡ ದಾಳಿ ಮಾಡಿದೆ. ದಾಳಿಯಲ್ಲಿ 6 ಜನರನ್ನು ಬಂಧಿಸಲಾಗಿದ್ದು, ₹4,150 ಹಣ ಜಪ್ತಿ ಮಾಡಲಾಗಿದೆ.

4. ವಿದ್ಯಾನಗರ: ಶ್ರೀ ರಾಮನಗರದಲ್ಲಿ ದಾಳಿ, 8 ಮಂದಿ ಅರೆಸ್ಟ್

ದಾವಣಗೆರೆಯ ವಿದ್ಯಾನಗರ ಪೊಲೀಸ್ ಠಾಣೆ ವ್ಯಾಪ್ತಿಯ ಶ್ರೀ ರಾಮನಗರದಲ್ಲಿ ಜೂಜಾಡುತ್ತಿದ್ದವರ ಮೇಲೆ ಡಿವೈಎಸ್ಪಿ ಶರಣಬಸವೇಶ್ವರ ಬಿ ಮಾರ್ಗದರ್ಶನದಲ್ಲಿ ಇನ್ಸ್‌ಪೆಕ್ಟರ್ ಶ್ರೀಮತಿ ಶಿಲ್ಪಾ ಮತ್ತು ಪಿಎಸ್ಐ ಸಚಿನ್ ಬಿರದಾರ್ ದಾಳಿ ನಡೆಸಿದ್ದಾರೆ. ಇಲ್ಲಿ 8 ಜನರನ್ನು ಬಂಧಿಸಿ, ₹7,400 ನಗದು ವಶಪಡಿಸಿಕೊಳ್ಳಲಾಗಿದೆ.

ಈ ಎಲ್ಲಾ ನಾಲ್ಕು ದಾಳಿಗಳಿಗೆ ಸಂಬಂಧಿಸಿದಂತೆ ಆಯಾ ಪೊಲೀಸ್ ಠಾಣೆಗಳಲ್ಲಿ ಪ್ರಕರಣ ದಾಖಲಾಗಿದ್ದು, ಮುಂದಿನ ಕಾನೂನು ಕ್ರಮ ಕೈಗೊಳ್ಳಲಾಗಿದೆ.